«جالپى قازاق جۋرناليستيكاسىنىڭ دەڭگەيى تومەن دەپ ايتۋعا بولمايدى. كەرىسىنشە قازاق جۋرناليستيكاسىنىڭ دەڭگەيى جوعارى ەكەنى كۇمانسىز. قاڭتار وقيعالارى كەزىندە اقپاراتتىق ۆاكۋم بولدى. ونى كاسىبي تۇرعىدا دايىندالعان لاڭكەستەر, قىلمىسكەرلەر ءوز مۇددەسىنە پايدالاندى. ينتەرنەتتى بۇعاتتاۋعا ءماجبۇر بولدىق. بۇل – الەمدىك پراكتيكا. بىراق, باسقا دا اقپارات قۇرالدارىمىز بار عوي. سودىرلار كەيبىر تەلە-راديو ارنالاردىڭ عيماراتىن ورتەپ, قيراتتى. ودان باسقا اقپارات قۇرالدارى ۇزدىكسىز حابار تاراتتى. ەشقانداي شەكتەۋ بولعان جوق.
ال, ءباسپاسوز بوستاندىعىنا كەلسەك, بىزدە زاڭ بويىنشا تسەنزۋرا جوق. اقپارات ەركىندىگىن بارىنشا قامتاماسىز ەتىپ جاتىرمىز. بىراق, ەركىندىك دەگەن ويىڭا نە كەلسە, سونى ايتۋ ەمەس. كەز كەلگەن دەموكراتيالىق ەلدەردە جالعان اقپارات تاراتقان ادام جاۋاپقا تارتىلادى. مەن ءاربىر جۋرناليست, ەڭ الدىمەن, مەملەكەتشىل ازامات بولۋى كەرەك دەپ سانايمىن. وسى ورايدا ن.نەكراسوۆتىڭ: «اقىن بولۋ شارت ەمەس, ازامات بولۋ – مىندەتىڭ» دەگەن قاناتتى ءسوزى بار. سوندىقتان ارقايسىمىز ەلىمىزدىڭ پاتريوتى بولۋعا ءتيىسپىز.
قازاقتىڭ «ايتىلعان ءسوز – اتىلعان وق» دەگەن دانالىعى بار. وسى رەتتە, وكىنىشكە قاراي, كەيبىر جۋرناليستەر جالعان اقپارات تاراتىپ, ەلدىڭ مۇددەسىنە قارسى جۇمىس ىستەيدى. قازىرگى زاماندا بلوگەرلەر كوبەيىپ كەتتى. ولاردىڭ كەيبىر ارەكەتتەرى كەرى اسەر ەتەدى. ءبىر بلوگەرلەر جاقسى جازادى. ال ەكىنشى بىرەۋلەرى ماسەلەنىڭ بايىبىنا بارماي, زەرتتەمەي, ءۇستىرت قارايدى. دەگەنمەن, ازاماتتارىمىز اق پەن قارانى اجىراتا الادى دەپ ويلايمىن. راسىندا, اقپاراتتىق «سوعىس» بۇكىل الەمدە بولىپ جاتقان ءۇردىس. سوندىقتان, ءبىز دە وعان بەيىمدەلۋىمىز كەرەك», دەدى پرەزيدەنت ماسەلەنىڭ مانىسىنە تەرەڭىرەك ءۇڭىلىپ.
مەملەكەت باسشىسى ءوز سوزىندە ەلىمىزدە شەكتەۋلى ادامداردىڭ ۇستەمدىگى قازاقستاندا شىنايى باسەكە مەن ادىلەتتىلىككە كەدەرگى كەلتىرىپ وتىرعانىن دا تىلىنە تيەك ەتتى.
«وليگوپوليا – بۇل ەكونوميكا سالاسىنداعى سانى شەكتەۋلى ادامداردىڭ ۇستەمدىگى دەگەن ءسوز. بىزدە وسىنداي ءۇردىس بەلەڭ الۋدا, كوپشىلىك, اسىرەسە, كاسىپكەرلەر ونى جاقسى بىلەدى. بۇل شىنايى باسەكەگە, جالپى ايتساق, ادىلەتتىلىككە كەدەرگى بولىپ وتىر. وسى ماسەلەنى شەشپەسەك, ەكونوميكامىز دامىمايدى, ىشكى ساياسي احۋال مۇلدەم ناشارلاپ كەتەدى. سوندىقتان مەنىڭ باستى ماقساتىم – ەكونوميكادا بولسىن, ساياساتتا بولسىن مونوپوليانى مەيلىنشە جويۋ. ودان ءبىرجولا قۇتىلعان ءجون. بۇل, ارينە, وڭاي ەمەس, بىراق مىندەتتى تۇردە وسى جۇمىسقا كىرىسۋىمىز كەرەك. باسقا جول جوق», دەدى پرەزيدەنت ءوز ويىن تۇيىندەپ.
