– راسىندا, كوپ نارسە بىلىكتى كادرلارعا بايلانىستى. مەنىڭ باستامام بويىنشا پرەزيدەنتتىك جاستار كادر رەزەرۆى قۇرىلدى. كادرلىق رەزەرۆكە وتكەن ازاماتتار بىرتىندەپ جاۋاپتى قىزمەتكە تاعايىندالىپ جاتىر. ارينە, مۇنىمەن شەكتەلۋگە بولمايدى. باسقا دا ادامدارعا جول اشۋىمىز كەرەك, – دەدى پرەزيدەنت.
سونداي-اق مەملەكەتتىك قىزمەتشىلەرگە قويىلاتىن تالاپ وتە جوعارى بولۋ كەرەتىگىن ەسكەرتتى.
– كەز كەلگەن ادام بىردەن مينيستر نەمەسە اكىم بولا سالمايدى. ول انىق نارسە. ءبىراز ۋاقىت, مول تاجىريبە كەرەك. ونداي لاۋازىمعا ءبىلىمدى, بىلىكتى, قىزمەتىنە ادال ازاماتتاردى تاعايىنداعان ءجون. بۇرىنعى مامانداردىڭ ءبارىن جۇمىستان شىعارۋ دۇرىس بولماس ەدى. ورىسشا «پوليتيچەسكايا چيستكا», ياعني «ساياسي تازالاۋعا» بارۋدىڭ قاجەتى جوق. مەملەكەتتىك باسقارۋ سالاسىنا بىرتە-بىرتە جاڭا ماماندار كەلەدى. كەلىپ تە جاتىر. بۇل – قالىپتى ۇدەرىس. بىراق, ءبىر نارسەنى ەستە ۇستاعان ءجون. مەملەكەتتىك قىزمەت – ەكسپەريمەنت الاڭى ەمەس! سوندىقتان بۇل جۇمىستى بىرتە-بىرتە جۇرگىزەمىز, – دەدى مەملەكەت باسشىسى.
