«قازىرگى ۋاقىتتا اقپاراتتىق كەڭىستىكتە تەرگەۋ يزولياتورلارىندا جاسالعان ازاپتاۋلار تۋرالى شىندىققا سايكەس كەلمەيتىن اقپاراتتاردى جاپپاي تاراتۋ ءجۇرىپ جاتقانى بايقالادى. ءبىز بۇل اقپاراتتاردىڭ شىندىققا سايكەس كەلمەيتىنىن, سونداي-اق مۇنداي جالعان حابارلامالاردىڭ قوعامدى ادەيى اداستىرىپ, بولعان وقيعالاردى بۇرمالايتىنىن رەسمي تۇردە ءارى ۇلكەن جاۋاپكەرشىلىكپەن مالىمدەيمىز», دەدى ج.ەشماعامبەتوۆ. ول قازىرگى تاڭدا بۇكىل قوعامنىڭ نازارى قاڭتار وقيعالارى كەزىندە قاماۋعا الىنعان ازاماتتاردى ۇستاۋ جاعدايلارىنا اۋىپ وتىرعانىن دا جاسىرمادى. «وسىعان وراي ءبىز تەرگەۋ يزولياتورلارىنداعى باقىلاۋدى ەكى ەسە كۇشەيتىپ, بۇل مەكەمەلەردەگى قوعامدىق مونيتورينگ ءۇشىن بارىنشا اشىقتىق تانىتىپ وتىرمىز», دەدى گەنەرال-مايور. ونىڭ مالىمدەۋىنشە, كوميتەت اشىقتىق پەن ايقىندىقتى قامتاماسىز ەتۋ ماقساتىندا قوعامدىق باقىلاۋ كوميسسيالارى, ۇلتتىق الدىن الۋ تەتىگى جانە ۇكىمەتتىك ەمەس ۇيىمدارمەن ىنتىماقتاستىقتى جالعاستىرا بەرەدى. بۇل ۇيىمدار قاماۋدا وتىرعان ازاماتتاردى ۇستاۋ قۇقىقتارى مەن شارتتارىنىڭ ساقتالۋىنا تاۋەلسىز مونيتورينگ جۇرگىزەدى. «قاسىرەتتى قاڭتار» وقيعالارىنان كەيىن تاۋەلسىز ساراپشىلار 13 تەرگەۋ يزولياتورىندا 60-تان استام رەت بولعان. ول سونداي-اق ادام قۇقىقتارى جونىندەگى ۋاكىل ەلۆيرا ءازىموۆا, «ادام قۇقىقتارى ءۇشىن حارتيا» قوعامدىق قورىنىڭ باسشىسى جەمىس تۇرماعامبەتوۆا باستاعان كوميسسيانىڭ بىرقاتار قوعامدىق قۇقىق قورعاۋشى جانە ادۆوكاتتارمەن بىرگە تەرگەۋدەگىلەردى ۇستاۋ جاعدايلارىن تەكسەرگەنىن ايتتى. ارنايى كوميسسيا ەلىمىزدىڭ 6 وڭىرىندە بولىپ, 100-دەن استام قاماۋعا الىنعانداردى قابىلداعان.
بۇگىنگى تاڭدا تەرگەۋ يزولياتورلارىندا 728 ادام قاماۋدا وتىر. كوميتەت توراعاسىنىڭ ايتۋىنشا, ولاردىڭ بارلىعى اۋىر جانە اسا اۋىر قىلمىستار بويىنشا كۇدىكتى. «تاعىلعان ايىپتارعا سوت قۇقىقتىق باعا بەرەدى. ناقتى شەشىم شىعارۋ كەزىندە بەينەجازبالار, كۋالاردىڭ ايعاقتارى جانە باسقا دا ماتەريالداردى قوسا العاندا ۇسىنىلعان دالەلدەمەلەر نەگىزگە الىناتىن بولادى», دەدى ول. قاماۋعا تەك اۋىر جانە اسا اۋىر قىلمىس جاساعانى ءۇشىن ايىپتالعان ادامداردىڭ الىنعانىن اتاپ وتكەن گەنەرال 270 كۇدىكتىنىڭ باس شاراسى وزگەرتىلىپ, ۇيقاماققا الىنعانى, ەشقايدا كەتپەۋ تۋرالى قولحاتپەن بوساتىلعانىن مالىمدەدى. ول سونداي-اق بۇل ناتيجەگە تەرگەۋ ورگاندارى مەن پروكۋراتۋرانىڭ قىلمىستىق ىستەر جونىندەگى ماتەريالداردى مۇقيات تەكسەرۋىنىڭ ارقاسىندا قول جەتكىزگەندەرىن ايتتى.
قوعامدى قاتتى تولعاندىرىپ وتىرعان ماسەلەنىڭ ءبىرى – جاراقات العانداردىڭ ءتيىستى مەديتسينالىق كومەك الۋىنا قاتىستى. وسىعان وراي ج.ەشماعامبەتوۆ قايعىلى قاڭتار وقيعالارىنا بايلانىستى تەرگەۋ يزولياتورىنا دەنە جاراقاتىمەن 267 ادامنىڭ جەتكىزىلگەنىن, ونىڭ ىشىندە 33-ءنىڭ قالالىق اۋرۋحانالاردا ستاتسيونارلىق ەمدەۋدەن وتكەنىن حابارلادى. «جاراقات العانداردىڭ بارلىعى مەكەمەلەردىڭ مەديتسينالىق بولىمدەرىندە ەمدەلدى, سونىمەن بىرگە ولاردى ازاماتتىق دارىگەرلەر ۇنەمى تەكسەرىپ وتىرادى», دەدى گەنەرالدىڭ مالىمدەۋىنشە, قازىرگى تاڭدا تەك ءبىر ادام عانا تارازداعى اۋرۋحانادا جاتىر. ال 30 ايىپتالۋشى كاج مەكەمەلەرىنىڭ مەديتسينالىق بولىمدەرىندە امبۋلاتوريالىق ەم الىپ جاتىر. كوميتەت توراعاسى سونىمەن قاتار تەرگەۋ ءىس-شارالارىنىڭ بەينەباقىلاۋ كامەرالارى ورناتىلعان, ارنايى جابدىقتالعان مەكەمەلەردە جۇرگىزىلەتىنىن, يزولياتوردا وتىرعانداردىڭ وزدەرىنەن كەلىپ تۇسكەن بارلىق ارىز-شاعىمداردى ءىىم-ءنىڭ وزىندىك قاۋىپسىزدىك قىزمەتتەرى تىركەپ, تەكسەرەتىنىن دە ءتۇسىندىردى. «تەرگەۋدىڭ زاڭدىلىعىن پروكۋراتۋرا ورگاندارى قاداعالايدى. ال ادۆوكاتتار مەن قوعامدىق قورعاۋشىلار اقپارات سۇراۋعا قۇقىلى. ولاردىڭ كليەنتتەرىمەن كەزدەسۋگە ەشقانداي شەكتەۋ جوق. تەرگەۋ يزولياتورىندا وتىرعانداردىڭ بارلىعى سوت شەشىمىمەن قاماۋعا الىنعانىن تاعى ءبىر رەت اتاپ وتكىم كەلەدى», دەدى ج.ەشماعامبەتوۆ.
