تالاي دودادا قارسىلاستارىنان ايلاسىن اسىرىپ, كوك تۋدى كوكتە جەلبىرەتكەن سپورتشىلارىمىزدىڭ جەڭىستى ءھام جەمىستى كاسىبي مانسابى تۋرالى ءبارىمىز جاقسى بىلەمىز. الايدا ولاردىڭ العاشقى جەڭىسى مەن جەڭىلىسى تۋرالى سۇراي بەرمەيتىنىمىز بار. كاراتە سپورتىنان ەكى مارتە ازيا ويىندارىندا توپ جارعان گۋزاليا گافۋروۆا كوپتەگەن جارىستا جەڭىستىڭ بيىك تۇعىرىنان كورىنگەنى ءمالىم. الايدا العاش رەت جەڭىلىستىڭ كەرمەك ءدامىن تاتقان كەزدە ول قاتتى مۇڭايعان بولاتىن...
«العاشقى جەڭىستى ۇمىتۋ مۇمكىن بە ەكەن؟ ەڭ العاشقى جەڭىسىمە قاراتاۋ قالاسىندا وتكەن جارىستا قول جەتكىزدىم. ول كەزدە مەنىڭ سپورتپەن شۇعىلدانا باستاعانىما ءبىر اي دا تولماعان بولاتىن. بۇل – مەنىڭ ءبىرىنشى جارىسىم. ەڭ ءبىرىنشى تۋرنيرىمدە ءبىرىنشى ورىن العانىم ەستەن كەتپەيدى. بالالىق كوڭىلمەن وتە قاتتى قۋاندىم, باقىتتان باسىم اينالعانداي كۇي كەشتىم. اناشىم دا ءماز بولىپ, قۋانىشىمدى ءبولىستى. سول كۇنى جامبىل وبلىسىنىڭ بايزاق اۋدانىنا قاراستى قىزىل جۇلدىز اۋىلىنداعى بارلىق كورشىلەرىم جينالىپ, العاشقى جەڭىسىمدى جاقسى كوڭىل كۇيدە اتاپ وتتىك. ول كۇندى ەشقاشان جادىمنان شىعارمايمىن. ال ەڭ ءبىرىنشى جەڭىلىسىم پەتروپاۆل قالاسىندا وتكەن جارىستا تىركەلدى. ول كۇن مەن ءۇشىن كۇرسىنىسپەن ەسكە الاتىن ساتتەردىڭ ءبىرى بولىپ قالا بەرەدى. تۇڭعىش رەت وبلىس اۋماعىنان شىعىپ, سىرتتا ۇيىمداستىرىلعان جارىسقا اتتاندىم. مەنى سول جارىسقا جىبەرۋ ءۇشىن اناشىم بىزگە تيەسىلى جەردىڭ ءبىر بولىگىن ساتىپ جىبەردى. ءسويتىپ مەنى جالعىز جىبەرمەي, قاسىما اپكەمدى قوستى. باتاسىن بەرىپ, شىعارىپ سالدى. سول كەزدە جان دۇنيەم استان-كەستەن بولىپ كەتتى. سەنىم ۇدەسىنەن شىعا الماعانىم ءۇشىن قاتتى وكىندىم. اناشىمنىڭ مەنىڭ ەشكىمنەن كەم بولماۋىم ءۇشىن جەرىمىزدىڭ جارتىسىن ساتىپ جىبەرگەنىن ويلاپ ءتىپتى كۇيزەلىپ كەتتىم. ول كەز ەسىمە تۇسسە, ءالى دە مۇڭايامىن», دەيدى سپورتشى.
12 جاسىنان باستاپ كاراتە سپورتىن جانىنا سەرىك ەتكەن گۋزاليانىڭ 2014 جىلى وڭتۇستىك كورەيانىڭ ينچحون قالاسىندا وتكەن ازيا ويىندارىندا توپ جارۋى زاڭدىلىق سەكىلدى كورىنگەنىمەن, 2018 جىلى يندونەزيا استاناسى دجاكارتا قالاسىندا جالاۋى جەلبىرەگەن ازيا ويىندارىندا ودان كوپ ادام التىن جۇلدە كۇتپەگەن بولاتىن. سەبەبى دە تۇسىنىكتى عوي. وتباسىن قۇرعاننان سوڭ دەكرەتتىك دەمالىسقا كەتكەن ەدى. الايدا قىزى التى ايعا تولعاننان كەيىن تىنىش جاتپاي, جاتتىعۋدى باستاپ كەتتى. ءيا, ەلوردادان تارازعا قايتا كەلدى. جاتتىقتى. شۇمەكتەپ توككەن تەردىڭ ارقاسىندا ەكىنشى مارتە ازيا ويىندارىنىڭ چەمپيونى اتاندى. جارىسقا اتتانار الدىندا «قولا جۇلدە السام دا جەتەدى عوي» دەگەن گافۋروۆا وسىلايشا كوك تۋىمىزدى كوكتە جەلبىرەتكەن ەدى.
دۋلاتبەك قۇسبەكوۆ سەكىلدى بىلىكتى باپكەردەن ءتالىم العان گۋزاليا گافۋروۆا بابىندا جۇرگەن كەزدە كاراتە سپورتى وليمپيا ويىندارىنىڭ باعدارلاماسىنا ەنگەندە قازاقستاندىق سپورتشى تورتجىلدىقتىڭ باستى دوداسىنان دا ولجالى ورالار ما ەدى, كىم ءبىلسىن؟
