قازاقستان تاريحىن وقىرماندار ءۇشىن ۇيرەنشىكتى ەمەس كوميكس فورماتىندا قايتا باسىپ شىعارۋدىڭ باستاماشىسى بولعان BAURZHAN foundation قايىرىمدىلىق قورى. جاڭا باسىلىمعا بىلتىر ەلىمىزدە وتكەن – «تاريحىم-بۇگىنىم, ەرتەڭىم!» اتتى سۋرەتشى-يلليۋستراتورلار بايقاۋى جەڭىمپازدارىنىڭ زاماناۋي تۋىندىلارى ەنگەن.
بەس مىڭ دانامەن جارىققا شىققان تىڭ تۋىندى كىتاپحانا مەكتەپتەرمەن قاتار, بالالار ۇيلەرىنە دە تاراتىلادى. KHAN Comics ارت-ستۋدياسى ۇسىنعان باستاماعا Samruk Kazyna Trust الەۋمەتتىك جوبالاردى دامىتۋ قورى قارجىلاي قولداۋ كورسەتىپتى.
اتاپ ايتقاندا, تاۋەلسىزدىك تاريحىن جاڭا فورماتتا تولعاعان تۋىندىعا 70 ۇزدىك يلليۋستراتسيا ەنگىزىلگەن. وقىرمانعا ەل ومىرىندە ماڭىزى ەرەك مادەني, سپورتتىق جانە ساياسي وقيعالار تۋرالى باياندايتىن كىتاپتىڭ باستى كەيىپكەرلەرى – ۇلتتىق ۆاليۋتا, قازاقستاننىڭ وليمپيادا ويىندارىنداعى جەتىستىكتەرى ءھام الەمدىك ارەنادا ەل مەرەيىن اسىرعان وتاندىق تانىمال تۇلعالار. ولاردىڭ ىشىندە گەننادي گولوۆكين, ديماش قۇدايبەرگەن سەكىلدى جەرلەستەرىمىز بار.
– كوميكستەر ماڭىزدى تاقىرىپتاردى نىساناعا العان. ونىڭ دالەلى قازاقستان تاريحىنىڭ جاڭا يلليۋستراتسيالانعان ۇلگىدە وقىرمانعا جول تارتۋى. بۇل جانردىڭ جاس بۋىن اراسىندا ۇلكەن اۋديتورياسى بار جانە جىل سايىن ولاردىڭ قاتارى ارتىپ كەلەدى. جوبانىڭ ماقساتى تەك اعارتۋشىلىق قىزمەت قانا ەمەس, ءبىرىنشى كەزەكتە – قازاقستاندىق جاس سۋرەتشى-يلليۋستراتورلاردى قولداپ, ولاردىڭ شىعارماشىلىعىن كوپشىلىككە تانىستىرۋ, – دەيدى BAURZHAN foundation قورىنىڭ جوبالىق ۇيلەستىرۋشiسi سايدا يبراگيموۆا.
الماتى
