توتەنشە جاعداي كەزىندە قاۋىرت جەلى نومىرىنە حابارلاسقان بارلىق قازاقستاندىقتارمەن تاۋلىك بويى 38 كاسىبي پسيحولوگ جۇمىس ىستەگەن.
«توتەنشە جاعداي جاريالانعان العاشقى كۇندەردە ءبىزدىڭ قىزمەتكەرلەر الەۋمەتتىك جەلىلەر ارقىلى قاۋىرت جەلىنىڭ جۇمىسىنا كاسىبي پسيحولوگتاردى تارتۋ قاجەتتىگىن حابارلاپ, ماماندارعا ىزدەۋ سالعان بولاتىن. ءبىزدىڭ ءوتىنىشىمىزدى جەرگە تاستاماي, ازاماتتارعا كومەك كورسەتۋگە نيەت بىلدىرگەندەر از بولعان جوق. ۆولونتەر رەتىندە جۇمىس ىستەۋگە دايىندىعىن كورسەتكەن بارلىق پسيحولوگتارعا ءبىز كومەككە جۇگىنگەن تۇرعىندارعا قولداۋ كورسەتكەنى ءۇشىن ءوز العىسىمىزدى ايتامىز», دەدى ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياس.
جەدەل جەلى جۇمىسىنا العاش قوسىلعانداردىڭ ءبىرى تاجىريبەلى پسيحولوگ زارينا كەنجەقار جاعدايدىڭ وڭاي ەمەس ەكەنىن بىردەن ءتۇسىنىپ ىسكە كىرىسكەنىن ايتتى.
«پسيحولوگتاردىڭ كومەگى قاجەت ەكەنىن مەن جالپى چاتتان بىلگەن سوڭ بۇل جۇمىسقا بىردەن كىرىسىپ كەتتىم. مەنىڭ اعام اسكەري ادام بولعاندىقتان, مەن جاعدايدىڭ وتە قيىن ەكەنىن ءبىلدىم. ازاماتتار ءارتۇرلى ماسەلەلەر بويىنشا قوڭىراۋ شالسا, جادىمدا الماتى قالاسىنان حابارلاسقان تۇرعىننىڭ وقيعاسى ەرەكشە ساقتالىپتى. ول قاۋىرت جەلىگە تۇنگى ۋاقىتتا حابارلاسىپ, ءوزىنىڭ ەكى بالاسىمەن اتىس ءجۇرىپ جاتقان جەردىڭ ماڭايىندا تۇراتىنىن جانە ءوزى ءۇشىن ەمەس, بالالارى ءۇشىن الاڭدايتىنىن ايتتى. تۇنگى ۋاقىتتا قورقىنىش دەگەن سەزىم كۇشەيە تۇسەدى عوي. مەن بۇل ايەلگە دە, كومەگىمىزگە جۇگىنگەن باسقا ازاماتتارعا دا مازاسىزدىقتى جەڭۋگە, پسيحولوگتاردىڭ ارنايى ادىستەرىن قولدانا وتىرىپ, بارىنشا قولداۋ كورسەتۋگە تىرىستىم», دەيدى زارينا كەنجەقار.
پسيحولوگيالىق قولداۋ باعىتىنداعى جۇمىس ودان ءارى جالعاساتىن بولادى. ازاماتتىق باستامالاردى قولداۋ ورتالىعى باسقارما ءتورايىمىنىڭ ايتۋىنشا, ەندى جاپپاي تارتىپسىزدىكتەردىڭ كۋاسى بولعان جانە پسيحولوگتاردىڭ كاسىبي كومەگىنە مۇقتاج بالالار مەن جاسوسپىرىمدەرگە كومەك كورسەتىلمەك.
ەسكە سالايىق, قاڭتار ايىنىڭ باسىندا قر اقپارات جانە قوعامدىق دامۋ مينيسترلىگى قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, 1414 بىرىڭعاي كولل-ورتالىعى بازاسىندا جەكە تەلەفون جەلىسىن قۇرعان بولاتىن. مۇندا ەلىمىزدىڭ كومەككە مۇقتاج تۇرعىندارىنا كاسىبي پسيحولوگيالىق كومەك كورسەتىلدى.
