اتالعان تەاتردا بۇعان دەيىن دە بالالارمەن جۇمىس ىستەۋگە ەرەكشە كوڭىل ءبولىنىپ, شىعارماشىل جاستاردى تاربيەلەۋگە جانە دامىتۋعا كوپتەگەن جوبا وتكىزىلىپ كەلەدى. بالالار قولونەر ستۋدياسى – وقۋشىلارمەن جۇرگىزىلگەن كەشەندى جۇمىستىڭ جالعاسى ىسپەتتەس. تەاتر بازاسىندا 6-دان 14 جاسقا دەيىنگى بالالارعا ارنالعان بىرنەشە ۇيىرمە اشىلادى: «كيىم ۇلگىلەۋ, ءپىشۋ جانە تىگۋ», «قۇراق قۇراۋ», «اعاشقا ورنەك سالۋ», «كەسكىندەمە جانە سۋرەت». ايتا كەتەيىك, وقۋعا وتىنىمدەردى اتا-انالار artsport.edu.kz بىرىڭعاي پورتالى ارقىلى بەرە الادى. ۇيىرمەلەردى تەاتردىڭ كاسىبي تاجىريبەلى قىزمەتكەرلەرى جۇرگىزەدى.
– مەملەكەت باسشىسى قاسىم-جومارت توقاەۆ ءوزىنىڭ جولداۋىندا اتاپ وتكەندەي, ءبىلىم ساپاسىن ارتتىرۋدا ەرتە كاسىپتىك باعدار بەرۋدىڭ ماڭىزى زور. وسكەلەڭ ۇرپاق بولاشاق ماماندىقتى تاڭداۋعا سانالى تۇردە قاراۋى ءتيىس. ادامنىڭ بويىنا بىتكەن دارىنى بالالىق شاقتا بايقالادى. ۇلكەندەردىڭ مىندەتى – بالالاردىڭ الەۋەتىن اشۋ ءۇشىن مۇمكىندىكتەر ۇسىنا وتىرا ءوزىن تابۋعا كومەكتەسۋ. ونەر الەمىنە باستاۋشى رەتىندە تەاترعا جۇكتەلگەن جاۋاپكەرشىلىكتى تۇسىنە كەلە, «استانا وپەرا» وسكەلەڭ ۇرپاقتى قولداۋ ماقساتىندا كوپ جۇمىس اتقارۋدا. سەگىز جىل بويى بىزدە حور جانە بالەت بولىمدەرىنەن تۇراتىن بالالار وپەرا ستۋدياسى جۇمىس ىستەيدى. جاس ارتىستەر تابيعي دارىندارىن دامىتا وتىرىپ, مۋزىكا مەن ءبيدى مەڭگەرۋدە تەاترلىق قويىلىمدارعا ەرەسەك ارتىستەرمەن قاتار قاتىسۋدا. ماماندىقپەن بۇلاي ەتەنە جاقىن تانىسۋ ولارعا بارىنشا سانالى تۇردە تاڭداۋ جاساۋعا مۇمكىندىك بەرەدى, – دەيدى «استانا وپەرا» ديرەكتورى عالىم احمەدياروۆ.
سونداي-اق ول تەاتر ۇجىمى مادەنيەت جانە سپورت مينيسترلىگى جانە ەلوردا اكىمدىگىمەن بىرلەسىپ جۇزەگە اسىراتىن تاعى ءبىر اۋقىمدى جوبا – «تەاتر ساباعى» ەكەنىن دە اتاپ ءوتتى. ونىڭ قاتىسۋشىلارى – جوعارى سىنىپ وقۋشىلارى تەك كورەرمەن بولىپ قانا قويماي, قويىلىمنىڭ ماعىناسىن الدىن الا تۇسىنۋگە كومەكتەسەتىن تانىمدىق دارىستەردىڭ تىڭداۋشىلارىنا اينالادى. جۇمباق اتموسفەراعا تەرەڭىرەك ءۇڭىلۋ ءۇشىن وقۋشىلارعا شىمىلدىقتىڭ ارعى جاعىنا ساياحات ۇيىمداستىرىلادى, وندا ولار گريمدەۋ, كوستيۋمەرلىك تسەحتاردى, مۋزىكالىق كىتاپحانانى, دايىندىق زالدارىن ارالاپ كورەدى.
جاڭا ءبىلىم باعدارلاماسىن وقىتۋ بارىسىندا تەاترلىق قولونەردىڭ سان الۋان تۇرلەرىمەن تانىستىرۋ جوسپارلانىپ وتىر. بالالار تاڭدالعان سپەكتاكلگە رەكۆيزيت, بۋتافورلىق زاتتار مەن كوستيۋمدەردى دايىندايدى. وقۋشىلاردىڭ شىعارماشىلىق امبيتسياسىن قايراۋ جانە ىنتالاندىرۋ ءۇشىن اشىق ساباقتار مەن بايقاۋلار ۇيىمداستىرىلماق. وقۋ جىلىنىڭ اياعىندا بالالاردىڭ جۇمىستارى كورمەدە تانىستىرىلىپ, ءار وقۋشى سەرتيفيكاتقا يە بولادى.
ايتا كەتەيىك, «كەسكىندەمە جانە سۋرەت» كۋرسىنا 6-دان 14 جاسقا دەيىنگى بالالار قابىلدانىپ, جاس ەرەكشەلىكتەرىنە ساي ەكى توپقا بولىنەدى. بالالارعا كومپوزيتسيا نەگىزدەرىن, بەينەلەۋ ونەرىنىڭ ءتۇرلى جانرى مەن ءتاسىلىن, قولدا بار ماتەريالداردى پايدالانۋدى ۇيرەتەدى. ال «اعاشقا ورنەك سالۋ» كۋرسى اعاشتى وڭدەۋ تاسىلدەرىمەن جانە ەرەكشەلىكتەرىمەن تانىستىرۋ, ويۋ-ورنەك تۇرلەرىن ۇيرەتۋ, بۋتافورلىق بۇيىمدار جاساۋ سەكىلدى باعىتتاردى كوزدەيدى.
كيىم ۇلگىلەۋدى, ءپىشۋ مەن تىگۋدى ۇيرەنۋ دە قىزىقتى بولعالى تۇر. كۋرس 10-نان 14 جاسقا دەيىنگى جاسوسپىرىمدەرگە ارنالعان, مۇندا ولارعا ماتامەن جۇمىس ىستەۋدىڭ نەگىزگى تاسىلدەرى مەن داعدىلارىن, كيىمنىڭ ءتۇرلى بولىكتەرىنىڭ, ونىڭ ىشىندە باس كيىمنىڭ تىگىسىن كەلتىرۋدى وقىتادى. البەتتە, بارلىعى تەاترلىق كوستيۋممەن بايلانىستىرىلىپ جاسالادى.
– ستۋديا تەاترعا دەگەن قىزىعۋشىلىقتى وياتۋ, بالالاردىڭ دارىنىن دامىتۋعا سەپتەسۋ جانە قول ەڭبەگىنە باۋلۋدى عانا ماقسات ەتپەيدى, سونىمەن قاتار وقۋشىلار اراسىندا تەاترلىق قولونەردى ناسيحاتتاۋدى كوزدەيدى. بالكىم, ستۋديا تاربيەلەنۋشىلەرىنىڭ اراسىنان بىرەۋ ءوزىن ونەرمەن بايلانىستى كاسىپتە تاۋىپ قالار. ستۋديا قىزمەتىندەگى ماڭىزدى جەتىستىك, مىنە, وسى بولماق, – دەيدى تەاتر باسشىسى.
