قوعام • 13 اقپان، 2022

ەلەكتروندىق فورمات – ەل يگىلىگىنە

69 رەت كورسەتىلدى

ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ورتالىق كوم­مۋنيكاتسيالار قىزمەتىنىڭ الاڭىندا وتكەن ءباسپاسوز ءماسليحاتىندا حالىققا قىز­مەت كورسەتۋ بارىسىندا ىڭعايلى ءارى قولجەتىمدى قىزمەتتەردى تسيفرلاندىرۋ جانە ترانسفورماتسيالاۋ بويىنشا اتقارىلىپ جاتقان جۇمىستار تۋرالى بايان­دادى.

بۇگىندە الەۋمەتتىك-ەڭبەك سالاسىندا مەملەكەتتىك قىزمەتتەردىڭ 45 ءتۇرى بار. 42 قىزمەتتى (93%) ەلەكتروندىق فورماتتا الۋعا بولادى. سونىڭ ىشىندە 21 قىزمەت (43%) – پرواكتيۆتى. سول 21 قىزمەتتىڭ 18-ءى بىلتىر زەردەلەنىپ، تالدانىپ، كورسەتى­لە­تىن قىزمەتتەردىڭ ماسەلەلەرى مەن تەجەۋىش فاك­تورلارى انىقتالدى.

– الەۋمەتتىك-ەڭبەك سالاسىنداعى مەم­لەكەتتىك قىزمەتتەردى تسيفرلان­دى­رۋ­دىڭ باسىم باعىتتارىنىڭ ءبىرى – ولاردى ەلەكت­روندى، اسىرەسە پرواكتيۆتى فورماتتا كورسەتۋ. مىسالى، بالا تۋعا بايلانىس­تى تولەماقىنى الساق، بىلتىر جىل باسىن­دا بۇل قىزمەتتى ازاماتتاردىڭ تەك 12%-ى عانا العان ەدى. ترانسفورماتسيالاۋ جۇ­مى­ستارىنىڭ اياسىندا بيزنەس پروتسەستەر وڭتايلاندىرىلىپ، 2021 جىلدىڭ سوڭىنا قاراي بۇل كورسەتكىش 53%-عا دەيىن ءوستى. ياعني جىلىنا شامامەن جاڭا تۋعان 440 مىڭ ءسابيدىڭ 230 مىڭعا جۋىق اناسى ۇيدەن شىقپاي-اق قىزمەتتى سمس ارقىلى الادى. بۇل وتە ىڭعايلى. ازاماتتار حالىق­قا قىزمەت كورسەتۋ ورتالىقتارىنا بارىپ، ۋاق­­ىت جوعالتپايدى. سونىمەن قاتار كوپبالالى انالارعا وتكەن جىلدىڭ باسىندا پرواكتيۆتى تۇردە قىزمەت كورسەتۋ كورسەتكىشى نەبارى 1% عانا بولسا، جىل سو­ڭىنا قاراي بۇل كورسەتكىش 41%-عا دەيىن ارتتى. جالپى، ەڭبەك جانە حالىقتى الەۋمەتتىك قورعاۋ مينيسترلىگىنىڭ الدىندا 2025 جىلعا قاراي بارلىق مەملەكەتتىك قىز­مەتتىڭ 100%-ى ەلەكتروندىق فورمات­قا، سونىڭ ىشىندە كەمىندە 60%-ىن پرواك­تيۆ­تى فورماتقا كوشىرۋ مىندەتى تۇر، – دەدى سپي­كەر.

ۆيتسە-ءمينيستردىڭ ايتۋىنشا، وتكەن جىل قورىتىندىسى بويىنشا 700 مىڭ ازا­مات قىزمەتتەردى پرواكتيۆتى تۇردە العان بولسا، 2025 جىلعا قاراي وسى فور­مات­تا مەملەكەتتىك قىزمەتتەر كورسەتۋ كولە­مىن جىلىنا 6 ملن-عا دەيىن ارتتىرۋ جو­س­پار­لانىپ وتىر.

– دەنساۋلىعىنان ايىرىلعان ازامات­تار­­عا مۇگە­دەك­تىك بەلگىلەنگەن كەزدە، سون­داي-اق جاردەماقىلار مەن تەحنيكالىق وڭالتۋ قۇرالدارىن العان كەزدە ءتورت ءتۇر­لى ينستانتسياعا جۇگىنۋگە تۋرا كەلدى. الدىمەن تەكسەرىلۋ ءۇشىن مۇقتاج جان ەمحا­ناعا جۇگىنەدى. سونىڭ ناتيجەسى بويىن­شا دارىگەرلەر قاجەتتى مەديتسينالىق نىسان­دى قاعاز فورماتتا تولتىرادى. سودان كەيىن وسى قاعاز قۇجاتتارىمەن ادام مۇ­گە­­دەكتىكتى انىقتاۋ ءۇشىن مەديتسينالىق-الەۋ­­مەتتىك ساراپ­تاما بولىمىنە بارادى. ودان كەيىن جاردە­ماقى الۋ ءۇشىن حالىققا قىزمەت كورسەتۋ ور­تالىقتارىنا، ال تەحني­كا­لىق وڭالتۋ قۇ­رالدارىن راسىمدەۋ جانە الەۋمەتتىك قىزمەتتەر الۋ ءۇشىن اكىم­دىك­تەرگە جۇگىنۋ قا­جەت بولدى، – دەدى ە.وس­پ­انوۆ.

وسىعان بايلانىستى 2021 جىلعى اقپان­دا ۇلت­تىق قوعامدىق سەنىم كەڭەسىنىڭ وتىرى­سىندا ەل پرەزيدەنتى مۇمكىندىگى شەكتەۋلى جاندار ءۇشىن بارىنشا قولايلى جاعداي جاساۋدى، ولاردىڭ ينستانتسيالاردا ءجۇرۋىن، قاعازباستىلىققا سالىنباۋىن، سونداي-اق قىزمەت كورسەتۋشىلەر مەن سول قىز­مەت­تى تۇتىنۋشىلاردىڭ بايلانىسىن بول­دىرماۋدى تاپسىردى.

– مەملەكەت باسشىسىنىڭ تاپسىرماسى شەڭبەرىندە ءبىز دەنساۋلىق ساقتاۋ مينيسترلىگىمەن جانە تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ مۇگەدەكتىگى بار ادامدارعا كەشەندى قىزمەت كورسەتۋدى ترانسفورماتسيالاۋ جونىندە جۇمىس جۇر­گىز­­دىك. ياعني ازامات تەك تۇرعىلىقتى جەرى بويىنشا ەمحاناعا بارۋى كەرەك. قال­عانى­نىڭ ءبارى اقپاراتتىق جۇيەلەردى ينتەگراتسيالاۋ ەسەبىنەن ادامنىڭ قاتىسۋىنسىز وتەدى. بارلىق دەرەك ءتيىستى مەملەكەتتىك ورگاندارعا بەرىلەدى جانە قۇزىرەتتى ساراپشىلار قاجەتتى شەشىمدەر قابىلدايدى. وسى جوبا اياسىندا 2021 جىلعى قازان ايىنان باستاپ، بۇگىنگە دەيىن 5 مىڭنان اسا ازامات ءوتىنىم بەردى. سول وتىنىمدەردىڭ نەگىزىندە ءتيىستى قىزمەت الدى. بۇل كەشەندى جوبا بيىلدان باستاپ قازاقستاننىڭ بارلىق وڭىرىندە ىسكە قوسىلدى. جۇمىس ءالى دە جالعاسادى ءارى اۋقىمى كەڭەيتىلەدى. جىل سوڭىنا دەيىن ءبىز وسى فورمات بو­يىنشا ءوتىنىش بىلدىرگەندەر سانىن جالپى جۇگىنگەن ازاماتتار سانىنىڭ 20%-عا دەيىن ارتتىرۋدى جوسپارلاپ وتىرمىز. بۇل شامامەن ايىنا 4-5 مىڭ مۇگەدەكتىگى بار ادام دەگەن ءسوز، – دەدى ۆيتسە-مينيستر.

تاعى ءبىر ماسەلە شەشىلدى. بۇعان دەيىن مۇگەدەكتىك بەلگىلەنگەننەن كەيىن ازاماتتار جىل سايىن اكىمدىك جانىنداعى جۇ­مىسپەن قامتۋ جانە الەۋمەتتىك باع­دارلامالار بولىمدەرىنە بارىپ، وڭال­تۋ­دىڭ تەحنيكالىق قۇرالدارى مەن قىز­مەت­تە­رىن الۋعا ءوتىنىش جازاتىن ەدى. سودان كەيىن كەيدە بىرنەشە ايعا سوزىلاتىن مەم­لە­كەتتىك ساتىپ الۋ راسىمدەرى ءوتىپ جاتا­تىن.

– وسىنداي پروبلەمالىق ماسەلەلەردى بولدىرماۋ ءۇشىن بىلتىردان باستاپ الەۋ­مەت­تىك قىزمەتتەر پورتالى ىسكە قوسىل­دى. وندا ازاماتتار تاۋار نەمەسە قىزمەت جەتكىزۋشىسىن ءوز بەتىنشە تاڭداي الادى. مەملەكەتكە تەك جەتكىزىپ بەرۋشىگە شى­عىنداردى وتەۋ عانا قالادى. وسى پور­تالدى ەنگىزۋ ەسەبىنەن 2019 جىلمەن سالىستىرعاندا (قامتاماسىز ەتۋ كور­سەتكىشتەرى 62% دەڭگەيىندە بولدى) كورسەتكىش 2021 جىلى 88%-عا دەيىن ۇلعايدى. بۇل بۇرىن مۇگەدەكتىگى بار ادام­دار ءۇشىن ءارتۇرلى سەبەپتەرمەن 100 مىڭ قىزمەت كورسەتىلمەگەنىن بىلدىرەدى، – دەدى سپيكەر.

بيىل مينيسترلىك پورتالدا قانات­قاق­تى رەجىمدە ينۆاتاكسي قىزمەتىن ەنگى­زۋدى جوسپارلاپ وتىر. بۇل قادام ينۆا­تاك­سيدىڭ مۇگەدەكتىگى بار ادامدار ءۇشىن قولجەتىمدىلىگىن ارتتىرۋعا مۇمكىندىك بە­رە­دى. سونداي-اق بيىلدان باستاپ 17 قىز­مەت ءتۇرى قىزمەت كورسەتۋدىڭ ەكستەرريتو­ريا­لى قاعيداتى بويىنشا ۇسىنىلادى.

– ءبىرىنشى كەزەكتە بىلتىر 3 قىزمەت ءتۇرى ىسكە قوسىلدى. سول جىلدىڭ سوڭى­نا قاراي تاعى 14 ءتۇرى قوسىلىپ، جالپى، 17 قىزمەت ءتۇرى ەكستەرريتوريالى پرين­تسيپ­پەن كورسەتىلەدى. بۇل دەگەنىمىز نە؟ مىسالى، ءبىر ادام نۇر-سۇلتان قالا­سى­نىڭ تۇرعىنى بولا تۇرىپ، ۋاقىتشا الماتى قالاسىندا بولسا، ول الماتى قالا­سىنىڭ كەز كەلگەن حالىققا قىزمەت كورسەتۋ ورتالىعىنا جۇگىنە الادى جانە وزى­نە تيەسىلى الەۋمەتتىك تولەمدى الۋ ءۇشىن ءوتىنىش بەرە الادى. بۇل بارىنشا ىڭعايلى ءارى ازاماتتاردىڭ قىزمەت الۋ شى­عىندارىن ازايتادى. جوبا ىسكە قوسىل­عان ساتتەن باستاپ، 2021 جىلدىڭ ءتورتىنشى توق­سانىندا 22 مىڭ ازامات پايدالانىپ ۇلگەردى، – دەدى ە.وسپانوۆ.

سونىمەن قاتار پروتسەستەردى وڭتاي­لان­دىرۋ ەسەبىنەن الەۋمەتتىك تولەمدەردى ۇيىمداستىرۋعا ارنالعان وپەراتسيالىق شىعىستاردى تومەندەتۋ قادامدارى دا جوسپارلانىپ وتىر.

– قىزمەت كورسەتۋگە قاتىستى وپەرا­تسيا­لىق شىعىنداردى ۇنەمدەۋ ماقساتىن­دا ازاماتتاردىڭ شوتتارىنا الەۋمەتتىك تولەمدەردى اۋدارۋ ۇدەرىستەرىن وزگەرتۋ بويىنشا جۇمىس جۇرگىزىلدى. بۇل وزگەرىس­تەر 2021 جىلدىڭ 7 ايىندا عانا مەملەكەتكە شامامەن 3 ملرد تەڭگەنى ۇنەمدەۋگە مۇمكىندىك بەردى. ال تۇتاستاي العاندا، بۇل تەتىك بيىل شىعىستاردى 6 ملرد تەڭ­گە­گە دەيىن ۇنەمدەۋگە جول اشادى. بۇل كور­سەت­كىش ودان ارتىق بولۋى مۇمكىن، – دەدى ۆيتسە-مينيستر.

تاعى ءبىر جوبا – مەملەكەتتىك قىزمەت­تەر­دى بانك پلاتفورمالارىندا ۇسىنۋ. بىلتىر قازان ايىندا مينيسترلىك ەكى بانكپەن بىرلەسىپ، ولاردىڭ پلاتفورما­لا­رىندا بالانىڭ تۋىنا بايلانىستى مەملەكەتتىك قىزمەت كورسەتۋ بويىن­شا جۇمىس اتقاردى. 2021 جىلدىڭ IV توقسانىندا 16 مىڭ ازامات بانك پلات­فور­مالارى ارقىلى قىزمەت الدى. قا­زىرگى كەزدە باسقا بانكتەر دە بىرگە جۇ­مىس ىستەۋگە ۇسىنىستارىن بىلدىرۋدە. ۆە­دوم­ست­ۆو وسى باعىتتاعى اشىق ءارى ءتيىمدى جۇ­مىس­تى الداعى ۋاقىتتا دا جالعاستىرا بەرمەك. سونداي-اق ەڭبەك جانە حالىقتى الەۋمەتتىك قورعاۋ مينيسترلىگى ءۇشىن نە­گىز­­گى باسىمدىقتاردىڭ ءبىرى 2021 جىلى حا­­لىقتى جۇمىسپەن قامتۋ سا­لا­سىنداعى مەم­لەكەتتىك قىزمەتتەردى ترانسفورماتسيا­لاۋ بولدى. تسيفرلى جۇ­مىس­پەن قامتۋ ورتالىقتارى ەنگىزىلدى. 2020 جىلدىڭ قاراشا ايىنان باستاپ كەزەڭ-كەزەڭىمەن قا­ناتقاقتى جوبا ىسكە قوسىلدى.

– جوعالعان نەمەسە جۇمىس ىزدەپ جۇر­گەن ادام ەلەكتروندىق ەڭبەك بيرجاسى پورتالى ارقىلى ونلاين رەجىمدە قىز­مەت الا الادى. سونىڭ ەسەبىنەن ۋاقىت ۇنەم­دەۋگە، شىعىندى قىسقارتۋعا، جۇ­مىس­قا ورنالاسۋداعى ادامي فاكتوردى بول­­دىرماۋعا بولادى. 2021 جىلى جۇمىس ىزدەپ جۇرگەن ادام رەتىندە تىركەۋگە ءوتى­نىش بىلدىرگەن ادامداردىڭ اراسىنان 143 مىڭ ازامات ونى ەلەكتروندىق ەڭبەك بيرجاسى پورتالى ارقىلى الۋى­نا مۇمكىندىك پايدا بولدى. بۇل – وتى­نىش­­­تەردىڭ جالپى سانىنىڭ 33%-ى عانا. بۇل ادامداردىڭ 66%-ى ونلاين رە­جىمدە جۇمىسقا ورنالاس­تى. قىزمەت كورسەتۋ مەرزىمى 10 كۇننەن 3 كۇنگە دەيىن قىس­قار­تىلدى. ونلاين تىركەۋ مەملەكەت سۋب­سيديالايتىن جۇمىس ورىندارىنا دا قول جەتكىزۋگە مۇمكىندىك بەرەدى، – دەدى سپي­كەر.

ە.وسپانوۆ بۇل باعىتتاعى جۇمىستار ءالى دە جالعاساتىنىن جەتكىزدى. بيىل جۇ­مىس­پەن قامتۋ سەرۆيستەرىن ەلەكترون­دىق ۇكىمەت پورتالىنا شىعارۋ جانە ولاردى ونلاين رەجىمدە كورسەتۋ جوسپارلانىپ وتىر.

سوڭعى جاڭالىقتار

دوللار ارزاندادى

ەكونوميكا • بۇگىن، 15:50

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

1227 قازاقستاندىق ىندەتتەن ساۋىقتى

كوروناۆيرۋس • بۇگىن، 09:08

وتكەن تاۋلىكتە 1169 ادام ىندەت جۇقتىردى

كوروناۆيرۋس • بۇگىن، 09:01

ۇقساس جاڭالىقتار