ء«بىزدىڭ باستى ماقساتىمىز – قاڭتار تراگەدياسىنان كەيىنگى ەلىمىزدەگى شىنايى رەفورمالاردى قولداۋ. بىرىنشىدەن, پرەزيدەنت باستاعان ەلدى جاڭعىرتاتىن باستامالاردى قولداپ, ولاردى توقتاتۋعا, سوڭىنا ىسىرۋعا, سابوتاجعا جول بەرمەۋ. ەكىنشىدەن, كەز كەلگەن ۇلكەن ساياسي رەفورمالار زاڭ شىعارۋشى جانە وكىلەتتى ورگاننان باستالۋى كەرەك ەكەنى ءسوزسىز. تۇپكىلىكتى ماقساتىمىز – ءماجىلىستىڭ جۇمىسىن جاڭا جولعا, جاڭا ارناعا بۇرۋ. ونىڭ ىشىندە ءماجىلىستىڭ اشىقتىعى, بەلسەندى اڭگىمە كوتەرىپ, ونى قوزعاۋى ماڭىزدى. بۇل – ۇلكەن ماسەلەنىڭ ءبىرى», دەدى ايدوس سارىم.
ەكىنشىدەن, «جاڭا قازاقستان» توبى ءماجىلىستىڭ رەگلامەنتىن, ءماجىلىس تۋرالى, ءماجىلىس دەپۋتاتتارى تۋرالى زاڭنامانى وزگەرتۋگە كۇش سالماق. ا.سارىمنىڭ ايتۋىنشا, مۇنىڭ ءبارى دەپۋتاتتاردىڭ قولىندا تۇرعان ماسەلە. «ەلىمىزدە جۇرگىزىلىپ جاتقان بيۋدجەتتىك باعدارلامالاردىڭ تيىمدىلىگىن ارتتىرۋ ماقساتىندا ۇكىمەتپەن جانە باسقا دا مەملەكەتتىك ورگاندارمەن قويان-قولتىق جۇمىس ىستەپ, تالاپتاردى كۇشەيتەمىز. جاقىندا پرەزيدەنت ناۋرىز ايىندا ۇلكەن ساياسي رەفورمالار جاريالاناتىنىن ايتتى. سوعان بەلسەنە اتسالىسامىز. ەلىمىزدەگى رەفورمالاردىڭ دۇرىس جۇرگىزىلۋىن, ونىڭ شىن مانىندە قوعامنىڭ, حالىقتىڭ تالابىنان شىعۋىن نازاردا ۇستاپ, ونىڭ بەلسەندى سۋبەكتىسىنە اينالامىز. ۇشىنشىدەن, ايماقتاعى وكىلەتتى ورگانداردىڭ جۇمىسىن جانداندىرۋ قاجەت. قوعامدىق كەڭەستەرگە, ماسليحاتتارعا وزگەرىستەر كەرەك. ولارعا جاقسى ۇلگى كورسەتۋ كەرەك دەپ ويلايمىز. وسى تۇرعىدا دا ەڭبەك ەتەمىز. الداعى ۋاقىتتا ۇندەۋمەن قاتار, ساياسي قۇجاتتارىمىزدى, ءار رەفورمانىڭ باعىتى بويىنشا بولەك ۇسىنىستارىمىزدى ايتامىز», دەدى ايدوس سارىم.
بۇدان كەيىن ءسوز العان ناتاليا دەمەنتەۆا دەپۋتاتتىق توپتىڭ قۇرىلۋ پروتسەسىنە توقتالدى. ونىڭ ايتۋىنشا, «جاڭا قازاقستان» دەپۋتاتتىق توبى پارلامەنت رەگلامەنتىنە سايكەس قۇرىلعان. ارناۋلى پروتسەدۋرا جۇرگىزىلگەن. «زاڭعا سايكەس بارلىق قۇجاتتى تىركەۋگە جىبەردىك. ياعني دەپۋتاتتىق توپتىڭ ەرەجەسى جاسالدى. سول ەرەجەگە سايكەس, دەپۋتاتتاردىڭ قۇقىقتارى, مۇمكىندىكتەرى ازىرلەندى. سونىڭ ءبارى ەرەجەدە جازىلعان. توپتى قۇرماس بۇرىن بارلىق ارىپتەسىمىزبەن اقىلداسا كەلە پارلامەنت جۇمىسىنا ترانسفورماتسيا قاجەت دەگەن ءبىر شەشىمگە كەلدىك. وسى ترانسفورماتسيانى «جاڭا قازاقستان» دەپۋتاتتىق توبىن قۇرۋ ارقىلى جاساماقپىز. نەگىزگى جۇمىس وسىدان باستالادى», دەدى ناتاليا دەمەنتەۆا.
ونىڭ ايتۋىنشا, دەپۋتاتتىق توپ ءۇش شاعىن سالاعا بولىنگەن. ءبىرىنشى باعىت اگروونەركاسىپ كەشەنى, ونەركاسىپ, ەكونوميكا جانە ەكولوگيانى قامتىماق. وعان ەدىل جاڭبىرشين جەتەكشىلىك ەتەدى. ەكىنشى سالا – ادام قۇقىقتارى, قاۋىپسىزدىك جانە قۇقىقتىق رەفورمالارعا ارنالعان. جەتەكشىسى – ايدوس سارىم. ءۇشىنشى سالانى ناتاليا دەمەنتەۆا باسقارادى. بۇل الەۋمەتتىك مادەني دامۋ جانە جاستار ساياساتىن قاراستىرماق. «ياعني ءار سەكتور ارنايى جاسالعان جوسپار, ەرەجە بويىنشا جۇمىس ىستەيدى. قوعامدا بولىپ جاتقان قانداي دا ءبىر ماسەلەلەردى, پروبلەمالاردى شۇعىل شەشۋ, حالىققا كومەك كورسەتۋ, شۇعىل بايلانىستا بولۋ ءۇشىن وسىنداي ءۇش سەكتور جاساقتالىپ وتىر. ءبارى زاڭ اياسىندا جۇزەگە استى, ەرەجەمىز بار», دەدى ءماجىلىس دەپۋتاتى.
وسى ورايدا ايدوس سارىم «جاڭا قازاقستان» دەپۋتاتتىق توبىنىڭ قۇقىقتارىنا توقتالدى. ونىڭ ايتۋىنشا, پارلامەنتتىڭ رەگلامەنتى مەن كونستيتۋتسيالىق زاڭ بويىنشا دەپۋتاتتىق توپ تىركەلگەننەن كەيىن پارلامەنتتىك تىڭداۋ ۇيىمداستىرۋعا, دەپۋتاتتىق ساۋال جولداۋعا, كەز كەلگەن ۇكىمەتتىك ۇيىمنىڭ باسشىسىن شاقىرۋعا, ەسەپ الۋعا, قۇجاتتارىن سۇراتۋعا قاقىسى بار. «ەستەرىڭىزدە بولسا, سوڭعى شاقىرىلىمدا دەپۋتاتتىق توپتار بولعان جوق. ءبىزدىڭ جۇمىسىمىز ءۇي ىشىنەن ءۇي تىگۋ ەمەس. ەڭ الدىمەن ءماجىلىستىڭ, پارلامەنتتىڭ جۇمىسىن بارىنشا جانداندىرۋىمىز, الەۋەتىن دۇرىس پايدالانۋىمىز, ىشكى رەفورمالاردى جۇزەگە اسىرۋعا كومەكتەسۋىمىز كەرەك. كوپتەگەن باعدارلاماعا سىن ايتىلدى, اقيقات تا ايتىلدى. وعان دا باس-كوز بولۋ قاجەت. وعان دا ساياسي قولداۋ كەرەك», دەدى ا.سارىم.
بۇدان كەيىن ءسوز العان بەرىك دۇيسەنبينوۆ «اق جول» پارتياسىنىڭ دەپۋتاتتارى باستامانى قولداعانىن جەتكىزدى. ونىڭ ايتۋىنشا, قازىر ىسكە كوشەتىن كەز كەلدى. «وسى ۋاقىتقا دەيىن قانشا جولداۋ جاسالدى؟ ونىڭ قالاي ورىندالعانى, نەمەن اياقتالعانى تۋرالى بۇگىندە انىق اقپارات جوق. سوندىقتان «اق جول» پارتياسى وسىنداي بىرلەسكەن الاڭنىڭ ارقاسىندا ەلدىڭ ماسەلەسىن شەشۋگە مۇمكىندىك تۋسا, نەلىكتەن قوسىلماسقا دەگەن شەشىمگە كەلدى. ءبىزدىڭ فراكتسيادان قارجى سالاسىنىڭ بەلگىلى مامانى دانيا ەسپاەۆا جانە مەن وسى توپقا كىردىك», دەدى ب.دۇيسەنبينوۆ.
قازاقستاننىڭ حالىق پارتياسىنىڭ وكىلى عازيز قۇلاحمەتوۆ ءوز سوزىندە قازاقستاننىڭ قوعامدىق ساياسي ومىرىندە بولىپ جاتقان وقيعالاردان بۇعان دەيىن دە, قازىر دە تىس قالمايتىنىن جەتكىزدى. «مۇنى ەمىن-ەركىن وي ءبولىسۋ مۇمكىندىگى بار قوسىمشا الاڭ رەتىندە قاراستىرىپ وتىرمىز. سايلاۋشىلار الدىندا ايتقان سوزدەرىمىزگە ادالدىعىمىزدى دالەلدەيمىز, راستايمىز. مۇنىڭ ەڭ نەگىزگى باستى شارتى – ساياسي مادەنيەتتى قالىپتاستىرۋ», دەدى ع.قۇلاحمەتوۆ.
