توپ قۇرۋ باستاماشىلارىنىڭ ايتۋىنشا, دەپۋتاتتار مەملەكەتتىڭ ترانسفورماتسياسىنا ءوز ۇلەسىن قوسۋعا نيەتتى, ەڭ الدىمەن, مۇنداي كەشەندى ترانسفورماتسيا پارلامەنت قىزمەتىندە بولىپ, ءماجىلىس قابىرعاسىنان باستالۋى ءتيىس.
«وزدەرىڭىز بىلەتىندەي, كەشە ءماجىلىستىڭ جالپى وتىرىسىندا ارىپتەسىمىز ەدىل جاڭبىرشين ءوز مالىمدەمەسىن ايتقان بولاتىن. قازىر ول ۇكىمەتتە جاڭاوزەن ماسەلەسى بويىنشا كەلىسسوزدەر جۇرگىزۋدە. ءبىزدىڭ ماقساتىمىز – قاڭتار تراگەدياسىنان كەيىن ەلىمىزدە باستالعان رەفورمالاردى قولداۋ, جاڭعىرتۋ جونىندەگى باستامالاردى قولداۋ, ولاردىڭ ديۆەرسياسىنا جول بەرمەۋ. ەكىنشىدەن, كەز كەلگەن ءىرى ساياسي رەفورمالار زاڭ شىعارۋشى جانە وكىلدى ورگاننان باستالۋى ءتيىس. ءبىزدىڭ تۇپكى ماقساتىمىز – ءماجىلىس جۇمىسىن جاڭا جولعا, جاڭا ارناعا بۇرۋ. سونىڭ ىشىندە ءماجىلىستىڭ اشىقتىعىن, ونىڭ بەلسەندى جۇمىسىن قامتاماسىز ەتۋ, ءماجىلىستىڭ جۇمىس رەگلامەنتىنە, ءماجىلىس دەپۋتاتتارى تۋرالى زاڭناماعا وزگەرىستەر ەنگىزۋ قاجەت. جاقىندا پرەزيدەنت ناۋرىز ايىندا ءىرى ساياسي رەفورمالار جاريالاناتىنىن مالىمدەدى. ءبىزدىڭ ماقساتىمىز - ولاردى جۇزەگە اسىرۋعا بەلسەندى قاتىسۋ, ەلدە رەفورمالاردىڭ دۇرىس جۇرگىزىلۋىن قاداعالاۋ. ۇشىنشىدەن, وڭىردەگى ۋاكىلەتتى ورگانداردىڭ جۇمىسىن جانداندىرۋ قاجەت. قوعامدىق كەڭەستەرگە, ماسليحاتتارعا وزگەرىستەر ەنگىزۋ قاجەت. بۇل تۇرعىدا دا ەڭبەك ەتەمىز», دەدى دەپۋتات ايدوس سارىم ماجىلىستە دەپۋتاتتىق توپتىڭ قۇرىلۋىنا بايلانىستى وتكەن ءباسپاسوز ءماسليحاتىندا.
ءتورت دەپۋتات توپتىڭ تۇراقتى مۇشەسى بولاتىنى ايتىلدى, ولاردىڭ ىشىندە ايدوس سارىم, ەدىل جامبىرشين جانە باسقا دا دەپۋتاتتار بار, ال بىرلەستىكتە ازىرگە 30-دان استام قاتىسۋشى بار. دەپۋتاتتاردىڭ ايتۋىنشا, اتالعان توپقا باسقا دا دەپۋتاتتار قوسىلۋعا نيەت بىلدىرۋدە.
ايتا كەتسەك, توپقا كىرگەن دەپۋتاتتاردىڭ جالاقىسىنا ەشقانداي ۇستەمە اقى تولەنبەيدى.
