قازاق تاستاياقشىلارى دەسە الدىمەن قانىبەك ساعىندىقوۆ ء(ۇش دۇركىن الەم چەمپيونى), ءاليحان قارانەەۆ ء(ۇش دۇركىن الەم چەمپيونى), ەرنار شىمباەۆ (ەكى دۇركىن الەم چەمپيونى), الىبەك وماروۆ (الەم چەمپيونى) سىندى تاستاياق شەبەرلەرىنىڭ ەسىمدەرى ەسىمىزگە ورالادى. دەگەنمەن ءبىز بۇل جولى بيليارد الەمىندەگى قازاقستاندىق سپورتشىلاردىڭ ەڭ ماڭىزدى بەس كەزدەسۋىنە نازار اۋدارعىمىز كەلەدى.
ابراموۆقا ارنالعان «تاربيە ساعاتى»
ءبارى دە الەۋمەتتىك جەلىدەن باستالعان. 2020 جىل اياقتالار تۇستا الەم چەمپيونى, وتانداسىمىز ەرنار شىمباەۆ ينستاگرامدا جازبا قالدىردى.
«بارلىقتارىڭىزدى جاڭا جىل مەرەكەسىمەن قۇتتىقتايمىن. 2021 جىلى پوستكەڭەستىك ەلدەردىڭ كەز كەلگەن سپورتشىسىمەن كوممەرتسيالىق كەزدەسۋ وتكىزگىم كەلەدى. بارلىق ۇسىنىستى قاراستىرامىن», دەگەن شىمباەۆتىڭ جازباسى رەسەيلىك يوسيف ابراموۆتىڭ شىمبايىنا قاتتى باتسا كەرەك. جەدەل جاۋاپ بەردى. جاۋاپ بەرگەندە دە ادەپسىزدىگىمەن كوزگە ءتۇستى.
«سەن ارقاشان جەلىدە جازۋدان جالىقپايسىڭ. ءىس جۇزىنە كەلگەندە سەن قايدا بولاسىڭ؟ بالا, بۇل ساعان تۋرنير ەمەس», دەپ جازدى ەكى دۇركىن الەم چەمپيونى, الەمدىك رەيتينگتىڭ كوشباسشىسى يوسيف ابراموۆ وزىنەن 13 جاس ۇلكەن ەرنار شىمباەۆقا قاراتىپ. مۇنى قالاي ادەپسىزدىك دەمەيسىڭ؟ ەكەۋارا داۋعا ەرنار نۇكتە قويدى.
«اقىرى ينستاگرامدا وسىنداي ءسوز سايىس باستالعان ەكەن. مەن ساعان كەلەسىدەي ۇسىنىس جاسايمىن. قاي جەردە جولىمىز تۇيىسسە دە, ءبىرىنشى كەزدەسۋدە ەسكى ماسكەۋ ەرەجەسى بويىنشا كوممەرتسيا وينايىق. ەگەر سەن مەنىڭ تالابىمدى قابىلداساڭ, وزىڭنەن جاۋاپ كۇتەمىن», دەدى ەرنار. ابراموۆ جازبا استىنا پىكىر قالدىرمادى.
ەكى سپورتشىنىڭ جولى رەسەيدەگى الەم چەمپيوناتىندا ءتۇيىستى. ەركىن پيراميدا بويىنشا وتكەن كەزدەسۋ تاعدىرى سوڭعى كەزەڭدە شەشىلدى. ءبىر-ءبىرىن جاقتىرماعان ەكى سپورتشى دا كوپ قاتەلەستى. الايدا شەشۋشى ساتتە سالقىنقاندىلىق تانىتقان ەرنار شىمباەۆ قارسىلاسىنان 7:6 ەسەبىمەن باسىم ءتۇسىپ, ابراموۆتىڭ اۋزىن جاپتى.
ستالەۆتەن قارىمتا قايتارعان قازاق
بەس ماڭىزدى كەزدەسۋدى تۇزگەن كەزدە العاشقىلاردىڭ ءبىرى رەتىندە ويىمىزعا ءاليحان قارانەەۆ پەن بيليارد الەمىنىڭ اڭىزى, الەمنىڭ سەگىز دۇركىن چەمپيونى ەۆگەني ستالەۆ اراسىنداعى قارىمتا كەزدەسۋ ورالادى. 2007 جىلى وتكەن «ەۋرازيا قالالارى: گران-پري» دوداسىندا جاس پەرى ءاليحان كارانەەۆ پەن بيليارد اڭىزىنىڭ جولى ءتۇيىستى. ءاليحاننىڭ بابى مەن باعى قاتار كەلىسپەي تۇرعانىن اڭعارعان ستالەۆ ادەتىنە باستى. ىرجالاقتاپ ءجۇرىپ وتانداسىمىزدى 6:0 ەسەبىمەن ويسىراتا جەڭدى. ويىن بىتكەننەن كەيىن ءسوز العان ءاليحان سوندا ءبۇي دەدى:
«بۇگىن دۇرىس ويىن كورسەتە المادىم. ەۆگەني ءوز دەڭگەيىندە وينادى. بۇيىرتسا ەكەۋمىز سانكت-پەتەربۋرگ قالاسىندا وتەتىن ۇزدىك سەگىزدىك الامانىندا كەزدەسەمىز. سول كەزدە ەسە قايتارۋعا بار كۇش-جىگەرىمدى سالامىن».
17 جاستاعى جامپوز ەشقانداي ەموتسياعا ەرىك بەرمەدى. ەركىن, سابىرلى سويلەدى. ارادا ۋاقىت ءوتتى. ستالەۆپەن ءوزى ايتقان جارىستا جولى ءتۇيىستى. «ۇزدىك سەگىزدىك» دوداسىنىڭ جارتىلاي فينالىندا جۇرت «نەۆكا» دەپ اتاپ كەتكەن ديناميكالىق پيراميدادان وتكەن ويىندا ستالەۆتىڭ جۇزىنەن كۇلكىنىڭ تابى عايىپ بولدى. 17 جاستاعى بوزبالانىڭ دايىندىعى مىعىم ەكەن. بيليارد ويىنىنىڭ بارلىق پارامەترى بويىنشا جەنيادان ءبىر باس جوعارى ەكەنىن بايقاتتى. قورىتىندى ەسەپ 7:4. ءاليحان سوزىندە تۇردى.
كاسىپقوي كەزدەيسوق شارعا قۋانبايدى
2016 جىلى ەركىن پيراميدادان وتكەن الەم چەمپيوناتى جۇرت جادىنان وشپەك ەمەس. ءاليحان قارانەەۆ پەن بۇگىنگى بيليارد الەمىنىڭ كوشباسشىسى, مولدوۆالىق سەرگەي كرىجانوۆسكي 1/8 فينالدا كەزدەستى. بىرقالىپتى ءوتىپ جاتقان ويىننىڭ ىرعاعىن كرىجانوۆسكي بۇزدى. شەشۋشى ساتتە كەزدەيسوق شارى لۋزاعا توپ ەتە قالعاندا قۇددى ءبىر كەزدەسۋ تاعدىرى شەشىلگەندەي قۋاندى. بيلياردتا «كەزدەيسوق شارعا قۋانساڭ, ويىن سەنى جازالايدى» دەگەن ۇعىم بار. ءدال سولاي بولدى. جەڭىسكە جاقىن تۇرعان مولدوۆالىقتى وتانداسىمىز ساباسىنا ءتۇسىردى. وتە مۇقيات ويناعان ءاليحان سەرگەي كرىجانوۆسكيدى شەشۋشى پارتيادا جەڭىپ, ۇيىنە قايتاردى.
ءمادامينوۆتىڭ مىسىن باسقان الماز
2021 جىلى وتكەن الەم كۋبوگى («كرەمل كۋبوگى» دەپ تە اتالادى) دوداسىنا جاھاندىق رەيتينگتە كوش باستاپ تۇرعان مىقتىنىڭ ءبارى قاتىستى. ارينە, قازاقستاندىق الماز ابسەيىت بۇل الاماندا فاۆوريتتەردىڭ قاتارىندا بولعان جوق. ايتكەنمەن وتانداسىمىز مىقتىلاردى بىرىنەن كەيىن ءبىرىن جەڭىپ, جانكۇيەرلەردى جەلپىنتتى. ول دودادا سەرگەي كرىجانوۆسكيدى, دميتري شكودانى جارىس جولىنان ىعىستىرعانى ءمالىم. سونداي-اق دميتري شكودادان ساۆۆيدي دوداسىندا كەتكەن ەسەسىن قايتاردى. شەشۋشى كەزەڭدە ءبىر دەممەن 8 شاردى لۋزاعا توعىتىپ, ءوزىنىڭ تاس ءتۇيىن دايىندىقپەن كەلگەنىن كورسەتتى.
دەگەنمەن الماز ەڭ ۇزدىك ويىنىن قىرعىز ازيز مادامينوۆكە قارسى كورسەتتى دەپ پايىمدايمىز. قارسىلاسىنا 0:2 ەسەبىمەن ەسە جىبەرىپ جاتقان ول ءوزىنىڭ پسيحولوگيالىق دايىندىعىنىڭ مىعىم ەكەنىن ايقىن تانىتا ءبىلدى. قاتارىنان 5 پارتيادا مەرەيى ۇستەم بولعان الماز جەڭىستى جورىعىن فينالدا عانا توقتاتتى. ايتكەنمەن جارىس جولىندا كىل مىقتىلاردى جەڭگەن المازدىڭ كۇمىس جۇلدەسى التىنعا پارا-پار ەدى. ويتكەنى ودان ەشكىم جۇلدە كۇتپەدى.
سوڭعى قادام... جەڭىلىس...
2014 جىل. تاراز قالاسىنداعى «تاراز ارەنا» سپورت سارايىندا وتكەن الەم چەمپيوناتىنىڭ فينالىنا شىققان داۋرەن ورىنباەۆ قىرعىز وعلانى قانىبەك ساعىنباەۆپەن كەزدەستى. قانىبەك ءا دەگەننەن باسىمدىقتى قولعا الىپ, 3:0 ەسەبىمەن ەسەپتە العا ۇزاپ كەتتى. بىراق داۋرەن ساسقان جوق. كەيىننەن 3:6 ەسەبىمەن باسىم تۇرعان قانىبەكتى قۋىپ جەتۋدىڭ بارلىق امالىن قاراستىردى. قانىبەكتىڭ دە ويىنى توقتاپ قالدى. داۋرەن قاھارىنا ءمىندى. تابلوداعى ەسەپ ايىرماسىن 5:6-عا دەيىن قىسقارتتى. ءدال وسى ساتتە اككى قانىبەك قازاق سپورتشىسىنىڭ مىسىن باسۋ نيەتىمەن ءۇزىلىس الدى. بىلۋىمىزشە ءۇزىلىس مەديتسينالىق سيپاتقا يە بولىپ, 20 مينۋتقا سوزىلدى. قايتا باستالعان ويىندا داۋرەن ءوزىن جوعالتتى. قانىبەك ءوز ويىنىن تاۋىپ, 7:5 ەسەبىمەن باسىم ءتۇسىپ, ءۇش دۇركىن الەم چەمپيونى اتاندى. اتتەڭ, داۋرەننىڭ ارمانىنا ءبىر عانا قادام قالىپ ەدى. سپورتتا قارسىلاستىڭ قارقىنىن باسۋ نيەتىندە جاسالاتىن ارەكەتتەر بولادى. قانىبەك ءدال سول ساتتە سونداي قادامعا باردى. ويىننان كەيىن ساعىنباەۆقا جاقىندادىق. «نەگە ۇزاق ءۇزىلىس الدىڭ؟» دەگەن سۇراقپەن قايىرىلدىق. جىميدى. «مەن ءۇشىن قانىبەك ساعىندىقوۆتى قۋىپ جەتۋ ماڭىزدى بولدى. ەندى مەن دە ءۇش دۇركىن الەم چەمپيونىمىن». جاۋابى وسىدان اسپادى.
جالپى, قازاقستاندىق تاستاياق شەبەرلەرىنىڭ الەم چەمپيوناتى سەكىلدى وزگە دە ماڭىزدى دودالارداعى عاجاپ كەزدەسۋلەرى كوپ-اق. الايدا ءبىز جانكۇيەرلەردىڭ جادىنان وشپەيتىن بەس ماتچتى ەسكە ءتۇسىرىپ كوردىك. ازىرگە وسى.
