سۋرەتشىنىڭ زايىبى گۇلجامىش جولامانوۆا وسى كارتينانى مۇراتبەكتىڭ وزىنە ۇقساتادى. قىلقالام شەبەرىنىڭ ءوزى دە جىلقى جىلى ومىرگە كەلگەندىكتەن بە, تابيعاتى دا سوعان تارتىپ تۋىپتى. نەبارى وتىز ءۇش جاس قانا ءومىر سۇرگەن تالانت يەسى بەينەلەۋ ونەرىندە ءوز قولتاڭباسىن ايشىقتاعان سۇبەلى دۇنيەلەر قالدىردى.
جازۋشى ايگۇل كەمەلباەۆانىڭ قىلقالام شەبەرىنىڭ «قۇلاگەر» كارتيناسى جايىندا جازعان كولەمدى ماقالاسى بار, سوندا قالامگەر: «مۇراتبەكتىڭ قۇلاگەرى عاجاپ بولعاندا اق ءتۇستى. قۇلاگەردىڭ سۋرەتتەگى كوزىنە اربالعانداي كوپ قارادىم, ول قۇسا-شەر, ارمان, قيالىن جىلقى جارىقتىقتىڭ كوز جانارىنا اۋماي كوشىرگەن. قۇلاگەردىڭ كوز سيپاتى ۇشىپ بارا جاتقان قۇس بەينەلى ەكەن. جادىما اڭىراتىپ قازاقتىڭ قوس حالىق ءانى ءتۇسسىن: «ۇشىردىم ۇياسىنان بالاپان قاز-اي» مەن «ۇشادى كوگالا ۇيرەك كولگە قارسى, ۇياسى جانۋاردىڭ جەلگە قارسى». جۇلدىزداي اققان قۇلاگەر. كوز ەمەس, بەينە قۇس قاناتىنداي اعىپ بارا جاتقان داۋرەننىڭ ءوزى بار», دەپ سۋرەتشىنىڭ بىرەگەي تۋىندىسى تۋرالى شىنايى تولعاپتى.
بالا كۇنىنەن اۋىلداعى كارىقۇلاق قاريالاردىڭ اڭىز-اڭگىمەلەرىن قۇلاعىنا قۇيىپ وسكەن سۋرەتشىنىڭ شىعارماشىلىعىندا تاريحي تاقىرىپتار ەرەكشە ورىن الادى. اسىرەسە اۆتور «سىرىم باتىر», «رۋح شاقىرۋ», «ەدىل-جايىق», «كۇلتەگىن مەن بىلگە تۋرالى جىر», «سارىن», «قازانات», «تۇمار», «قورقىتتىڭ تەڭىزگە كەلۋى», «كەرەي-جانىبەك», «جامان ىرىم نەمەسە قاعاناتتىڭ قۇلاۋى», «قىزعىش قۇس», «جەكپە-جەك», «اتتيلانىڭ ەلەسى» سەكىلدى تۋىندىلارىندا عاسىرلار قويناۋلارىنىڭ قاتپارىنا ءۇڭىلىپ, تاريحي بەينەلەردى بوياۋ تىلىمەن شەبەر سويلەتە بىلگەن.
ونەرتانۋشىلار مۇراتبەك جولامانوۆتىڭ شىعارماشىلىعىن ەكى كەزەڭگە ءبولىپ, ولاردى اكادەميالىق جانە «جۋسان ءيىسى» دەپ قاراستىرادى. «جۋسان ءيىسى» اتتى تسيكلدىك جۇمىستارىن سۋرەتشى ءومىرىنىڭ سوڭعى جىلدارىندا سالعان. ونەر زەرتتەۋشىلەرىنىڭ پىكىرىنشە, قىلقالام شەبەرى تۋىندىلارىنىڭ ىشىندەگى كاسىبي جوعارى دەڭگەيدە سالىنعان, مىقتىلارى دا – وسىلار دەپ ايتىلادى. بۇل تسيكلدىك جۇمىسقا 15 كارتينا كىرەدى.
«ونىڭ سۋرەتتەرىنىڭ كوبى − تاريحي تاقىرىپتا جازىلعان كورىنىستەر. ەرتە جاۋگەرشىلىك زامانداردا, سوعىسقا اتتانعان باتىردىڭ اناسى شۇبەرەككە وراعان جۋساندى بىرگە بەرىپ جىبەرەدى ەكەن. سول جۋسان يىسىنەن ەلىن ساعىنعان باتىر ءوز اناسىن كورۋگە, ەلىن كورۋگە قۇشتار بولادى. اڭىزدار مەن تاريحي شەجىرەلەردە وسىلاي ايتىلادى», دەيدى زايىبى گۇلجامىش باكەيقىزى.
قامشىنىڭ سابىنداي قىسقا عۇمىر كەشسە دە, ونەردە ءوز ءىزىن قالدىرعان سۋرەتشى باتىس قازاقستان وبلىسىنىڭ جوسالى اۋىلىندا دۇنيەگە كەلگەن. 1990 جىلى و. تاڭسىقباەۆ اتىنداعى كوركەمسۋرەت كوللەدجىنىڭ «كەسكىندەمە» ءبولىمىن, ال 1996 جىلى ت.جۇرگەنوۆ اتىنداعى قازاق ۇلتتىق ونەر اكادەمياسىن تامامداعان. ونەر اكادەمياسىندا اتاقتى سۋرەتشى, اكادەميك ق.تەلجانوۆ پەن پروفەسسور م.قالىموۆتىڭ شەبەرحاناسىندا وقىعان. ودان كەيىن وقۋ ۇزدىگى رەتىندە وسى جوعارى وقۋ ورنىندا ۇستازدىق قىزمەتكە قالدىرىلادى. وسى جىلدار ارالىعىندا ول كوپتەگەن رەسپۋبليكالىق جانە حالىقارالىق كورمەگە قاتىسىپ, شەبەرلىگى شىڭدالا ءتۇستى. العاشقى جەكە كورمەسى 1999 جىلى ورال قالاسىندا ۇيىمداستىرىلدى.
بۇعان دەيىن ەلوردادا قىلقالام شەبەرىنىڭ كورمەسى ەكى-ءۇش مارتە ۇيىمداستىرىلدى, سونداي ءبىر كورمەسىندە ۇستازى, قازاقستان سۋرەتشىلەر وداعىنىڭ مۇشەسى سەمبىعالي سماعۇلوۆ مۇراتبەكتىڭ قىسقا, بىراق وتە جارىق عۇمىرى شىعارماشىلىق ىزدەنىستەر مەن باستامالارعا تولى بولعاندىعىن ايتقانى بار.
«ول ءوزىن ءتۇرلى جانرلاردا بايقاپ كوردى. ونى جانىبەك پەن كەرەي حاندار, ماحامبەت, سىرىم باتىرلار سەكىلدى ۇلى تاريحي تۇلعالار قىزىقتىراتىن. شىعارماشىلىق سامعاۋىنىڭ ەرتە ۇزىلگەنى وكىنىشتى, الايدا مۇراتبەك ارتىنا مول شىعارماشىلىق مۇرا قالدىردى. ونىڭ ءومىرى بۇگىنگى وسكەلەڭ ۇرپاق ءۇشىن ءوز وتانىنا قالتقىسىز قىزمەت ەتۋدىڭ جارقىن مىسالى بولارى ءسوزسىز», دەدى ول.
بۇگىندە مۇراتبەك جولامانوۆتىڭ بەينەلەۋ ونەرىمىزدىڭ قازىناسىن بايىتقان تاماشا تۋىندىلارى ەلىمىزدە عانا ەمەس, تۇركيا, پولشا, ۇلىبريتانيا, كورەيا سەكىلدى مەملەكەتتەردىڭ جەكە قورلارىندا ساقتاۋلى تۇر. جەرلەستەرى دە تۇعىرلى تالانت يەسىن ۇمىتپاي, ۇنەمى ەسكە الىپ وتىرادى. قىلقالام شەبەرىنىڭ تۋعان جەرى جوسالى اۋىلىنا سۋرەتشىنىڭ ءمۇسىنى ورناتىلىپ, تۇرعان ۇيىنە ەسكەرتكىش تاقتا قويىلعان.
