كوللاجدى جاساعان زاۋرەش سماعۇل, «EQ»
– ءار وتباسىنىڭ اڭسايتىنى – ءسابي. ويتكەنى دۇنيەگە امان-ساۋ كەلگەن ءسابي اتا-اناسىن كول-كوسىر قۋانىشقا بولەيدى. الايدا كەيبىر وتباسىنىڭ مۇنداي باقىتقا بولەنە المايتىن جايى بار. دەگەنمەن سونداي وتباسىلارعا ەكۇ تاسىلىمەن نارەستەلى بولۋعا مۇمكىندىك جاسالىپ وتىر. وسى ورايدا جىل سايىن ەكستراكورپورالدى ۇرىقتاندىرۋ پروتسەدۋراسىنا بولىنەتىن كۆوتا كوبەيتىلدى. بىلتىر اتىراۋ وبلىسىندا تۇراتىن انالارعا ەكستراكورپورالدى ۇرىقتاندىرۋ (ەكۇ) ءۇشىن «اڭساعان ءسابي» باعدارلاماسىمەن 232 كۆوتا بولىنگەن ەدى. بۇل كۆوتا تولىق يگەرىلدى. ال بيىل اتالعان جوبامەن ءسابي ءسۇيۋدى اڭساعان انالارعا 233 كۆوتا بەرىلەدى. سەبەبى وڭىردە بەدەۋلىك دياگنوزى بار ايەلدەر سانى ازايار ەمەس. قازىر وسىنداي 840 ايەل تىركەۋدە تۇر, – دەيدى رەپرودۋكتولوگ-دارىگەر گۇلنار ەسقايىروۆا.
«اڭساعان ءسابي» باعدارلاماسىمەن تۇڭعىشىن ومىرگە اكەلگەن انالاردىڭ قاتارىندا 52 جاستاعى ايگۇل بيسەنباەۆا دا بار. قازىر ول جىلىوي اۋدانىنىڭ ورتالىعى – قۇلسارى قالاسىندا تۇرادى.
– اتىراۋ قالاسىنا تاياۋ ورنالاسقان تومارلى اۋىلىندا دۇنيەگە كەلگەن ەدىم. ءوزىم – ەگىزدىڭ سىڭارىمىن. كەيىن 90-جىلدارى قۇلسارى قالاسىنا قونىس اۋداردىم. كۇيەۋىم يبراگيممەن ەكى جىل بۇرىن تانىسىپ, ەكەۋمىز وتباسىن قۇرۋعا بەل بايلادىق. ونىڭ بۇرىنعى وتباسىنان ۇلى مەن قىزى, نەمەرە-جيەندەرى بار. ءبارىمىز ءبىر شاڭىراقتا تاتۋ تۇرامىز, – دەيدى ايگۇل بيسەنباەۆا.
ونىڭ نەگىزگى ماماندىعى – اسپاز. «ماڭعىستاۋ سەرۆيس كومپاني» جشس-دە جۇمىس ىستەگەن. جۇكتىلىگىنە بايلانىستى جۇمىسىنان شىعىپ كەتكەن.
– تۇرمىسقا شىققان سوڭ بالالى بولۋدى ويلانا باستادىم. ويتكەنى وتباسىنىڭ باقىتى – بالا تاربيەلەۋ. بىراق «بۇل مەنىڭ جاسىمدا مۇمكىن بە؟» دەگەن كۇدىگىم بولعانىن جاسىرمايمىن. سول سەبەپتەن قۇلسارىلىق دارىگەرلەر رۋسلان اكەنوۆ پەن نۇرشات قاليەۆا, اتىراۋداعى گينەكولوگ گۇلسارا باساروۆانىڭ كەڭەسىنە جۇگىندىم. دارىگەرلەردىڭ كەڭەسىمەن ەكۇ ارقىلى بالا كوتەردىم. وبلىستىق پەريناتالدىق ورتالىقتىڭ بىلىكتى دارىگەرى دينارا ماراتقىزى وتا جاسادى. ءبارى ءساتتى بولىپ, ومىرگە دەنى ساۋ ۇل اكەلدىم. ەسىمىن نۇرگەلدى دەپ قويدىق, – دەيدى ايگۇل بيسەنباەۆا.
اتىراۋ وبلىسى
