پرەزيدەنت 2021 جىلعى 1 قىركۇيەكتەگى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا سىبايلاس جەمقورلىققا قارسى ءتيىمدى كۇرەستى جالعاستىرۋ قاجەتتىگى تۋرالى تاپسىرما بەردى. بۇل رەتتە تۇرمىستىق سىبايلاس جەمقورلىقتى جويۋعا ەرەكشە نازار اۋدارۋ قاجەت.
سەناتتىڭ بەيىندى كوميتەتىنىڭ توراعاسى ۆلاديمير ۆولكوۆ ءوز سوزىندە سىبايلاس جەمقورلىققا قارسى ىمىراسىز كۇرەس مەملەكەتتىك ساياساتتىڭ نەگىزگى باسىمدىقتارىنىڭ ءبىرى بولىپ تابىلاتىنىن اتاپ ءوتتى.
«تۇرمىستىق دەڭگەيدەگى سىبايلاس جەمقورلىقتىڭ اۋقىمى اسا ماڭىزدى, سوندىقتان بەلگىلى ءبىر قىزمەتكەردى نەمەسە لاۋازىمدى ادامدى «ىنتالاندىرۋسىز» بىردە-ءبىر كۇندەلىكتى ماسەلەنى شەشۋ مۇمكىن ەمەس دەگەن پىكىر كوپشىلىكتىڭ ساناسىنا ەنىپ كەتتى. سوندىقتان تۇرمىستىق سىبايلاس جەمقورلىققا قارسى ءىس-قيمىل شارالارىن ازىرلەۋ جانە ىسكە اسىرۋ باعىتىندا جۇمىس ەكى باعىت بويىنشا – لاۋازىمدى ادامدارمەن جانە قوعاممەن تىكەلەي اراقاتىناستا جۇرگىزىلۋگە ءتيىس دەپ ويلايمىز», دەدى دەپۋتات.
سەناتورلاردىڭ پايىمداۋىنشا, تۇرمىستىق سىبايلاس جەمقورلىق ازاماتتىق قوعامعا كەرى اسەرىن تيگىزىپ, شەنەۋنىكتەردى جەمقور ەتەدى, سىبايلاس جەمقورلىقتى كۇندەلىكتى, قاراپايىم, جالپى قابىلدانعان, ءتىپتى قوعام تاراپىنان ايىپتالمايتىن قۇبىلىسقا اينالدىرادى. وسىعان بايلانىستى دەپۋتاتتار ازاماتتىق قوعامدى تارتۋ جانە تۇراقتى ءتۇسىندىرۋ جۇمىستارىن جۇرگىزۋدىڭ ماڭىزدىلىعى مەن قاجەتتىلىگىن اتاپ ءوتتى.
تۇرمىستىق سىبايلاس جەمقورلىققا قارسى ءىس-قيمىل سالاسىندا قابىلدانىپ جاتقان شارالار تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ سوتقا دەيىنگى تەرگەۋ قىزمەتىنىڭ باسشىسى اسحات جۇماعاليەۆ باياندادى.
«سىبايلاس جەمقورلىقتىڭ قۇرىلىمدىق سيپاتىنا جۇرگىزىلگەن تالداۋ مىنانى كورسەتىپ وتىر. قۇقىق بۇزۋشىلىقتاردىڭ باسىم بولىگى جەرگىلىكتى اتقارۋشى ورگانداردىڭ, ىشكى ىستەر ورگاندارىنىڭ, كۆازيمەملەكەتتىك سالانىڭ قىزمەتكەرلەرىنە تيەسىلى. اتاپ ايتقاندا, كەدەن قىزمەتى, ءبىلىم سالاسى, قۇرىلىس, تۇرعىن ءۇي-كوممۋنالدىق شارۋاشىلىق جانە دەنساۋلىق ساقتاۋ سالاسىندا كوپتەپ كەزدەسەدى. اسىرەسە كەيىنگى جىلدارى پارا الۋ ماسەلەسى وزەكتى بولىپ تۇر. وسىلايشا, سىبايلاس جەمقورلىقتىڭ كۇندەلىكتى ۇلەسى 60 پايىزعا تەڭ. جىلدان-جىلعا پارا بەرۋ ارتىپ كەلەدى. مىسالى, 2015 جىلى وسىنداي بۇزۋشىلىقتىڭ ۇلەسى 33 پايىز-
دى قۇراسا, بىلتىر ونىڭ كولەمى 60 پايىزعا جەتكەن», دەدى ا.جۇماعاليەۆ.
تۇرمىستىق سىبايلاس جەمقورلىققا قارسى ءىس-قيمىل بويىنشا جۇرگىزىلىپ جاتقان جۇمىستار تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باسقارما توراعاسىنىڭ ورىنباسارى ءبىرجان ءجۇنىسوۆ ايتىپ بەردى. ول سىبايلاس جەمقورلىق تاۋەكەلدەرىن تومەندەتۋ ماقساتىندا 2021 جىلدىڭ 20 قىركۇيەگىنەن باستاپ بىرىڭعاي نوتارياتتىق اقپاراتتىق جۇيە, نوتارياتتىق مامىلەلەردىڭ بارلىق ءتۇرى بويىنشا, مۇراعا قۇقىق تۋرالى كۋالىك, جىلجىمايتىن م ۇلىككە مەنشىك قۇقىعى تۋرالى كۋالىك ارقىلى جەدەلدەتىلگەن تىركەۋ قىزمەتى ىسكە اسىرىلعانىن جەتكىزدى.
«قابىلدانىپ جاتقان شارالار مەملەكەتتىك قىزمەتتەگى سىبايلاس جەمقورلىق تاۋەكەلدەرىن تومەندەتۋگە جانە قىزمەتتەردىڭ سىبايلاس جەمقورلىققا قارسى مادەنيەتىن قالىپتاستىرۋعا باعىتتالعان. بۇگىنگى تاڭدا كورسەتىلەتىن قىزمەتتى الۋشىلارمەن بايلانىستى كەلەڭسىزدىكتەردى ازايتۋ ماقساتىندا الەۋمەتتىك-ەڭبەك سالاسىنادعى 10 مەملەكەتتىك قىزمەت ەلەكتروندى فورماتقا اۋىستى», دەدى ب.ءجۇنىسوۆ.
ءوز كەزەگىندە سەنات جانىنداعى جاس ساراپشىلار كلۋبىنىڭ مۇشەسى شىڭعىس لەپسىباەۆ وتىرىسقا قاتىسۋشىلار الدىندا تۇرمىستىق سىبايلاس جەمقورلىق فاكتورلارىن, ونىڭ ىشىندە قوعامنىڭ قۇقىقتىق ساۋاتتىلىعىنىڭ تومەن دەڭگەيىن, قۇقىق قورعاۋ ورگاندارى مەن سوت تورەلىگىنە سەنىمنىڭ بولماۋىن, ايىپپۇلداردىڭ, سالىقتاردىڭ جوعارى دەڭگەيىن, سونداي-اق مەملەكەتتىك قىزمەتشىنىڭ بەدەلىنىڭ بولماۋىن اتاپ ءوتتى.
وتىرىسقا جوعارعى سوتتىڭ, باس پروكۋراتۋرانىڭ, سىبايلاس جەمقورلىققا قارسى ءىس-قيمىل اگەنتتىگىنىڭ, بىرقاتار مينيسترلىكتەردىڭ, سونداي-اق سەنات جانىنداعى جاس ساراپشىلار كلۋبىنىڭ وكىلدەرى قاتىستى.
