سۇحباتتاسۋ كەزىندە ماۋلەن اشىمباەۆ تاياۋدا ەل پرەزيدەنتى جاريالاعان جاڭا قازاقستاندى قۇرۋعا باعىتتالعان جۇيەلى شارالار تۋرالى ايتتى. سەنات سپيكەرى وسىعان بايلانىستى ەلىمىزدە ءتۇرلى سالادا بەلسەندى جۇمىس جۇرگىزىلىپ جاتقانىن, ولاردىڭ نەگىزگى مىندەتى الەۋمەتتىك تەڭسىزدىكتى ازايتۋ, مەملەكەتتىڭ ەكونوميكاعا قاتىسۋىن تومەندەتۋ, شاعىن جانە ورتا بيزنەستى جاپپاي دامىتۋ ەكەنىن تىلگە تيەك ەتتى. سونداي-اق ەلدىڭ ساياسي جۇيەسىن ودان ءارى دەموكراتيالاندىرۋ دا ماڭىزدى باسىمدىقتاردىڭ ءبىرى ەكەنىن ايتىلدى.
سونىمەن قاتار تاراپتار ەكى ەلدىڭ پارلامەنتارالىق بايلانىسىن ءارى قاراي دامىتۋ پەرسپەكتيۆالارىنا كەڭىنەن توقتالدى. ودان بولەك, قازاقستاننىڭ جاڭا ەكونوميكالىق باعدارىن ىسكە اسىرۋ اياسىنداعى ىنتىماقتاستىق ماسەلەلەرى ءسوز بولدى.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا ەلىمىزدىڭ الەۋمەتتىك-ەكونوميكالىق دامۋىنا قاتىستى جاڭا مىندەتتەردى بەلگىلەپ بەردى. پرەزيدەنتىمىز مەملەكەتتىك ساتىپ الۋلاردىڭ اشىقتىعىن قامتاماسىز ەتۋ, اگروونەركاسىپ كەشەنىنە قاتىستى ماسەلەلەردى شەشۋ, بانك سالاسىن رەفورمالاۋ, بارلىق سالادا باسەكەلەستىكتى ارتتىرۋعا ءتيىستى جاعداي جاساۋ جونىندە ناقتى تاپسىرمالار بەردى. قاسىم-جومارت توقاەۆتىڭ وسى جانە باسقا دا رەفورمالارى ەكونوميكالىق جۇيەمىزدى جاڭارتۋدى, ونىڭ ىشىندە شەتەلدىك كاسىپكەرلەر ءۇشىن ەلىمىزدىڭ ينۆەستيتسيالىق اشىقتىعى مەن تارتىمدىلىعىن قامتاماسىز ەتۋدى كوزدەيدى», دەدى ماۋلەن اشىمباەۆ.
ءوز كەزەگىندە ەلشى قازاقستان پرەزيدەنتىنىڭ رەفورمالارىنا قولداۋ ءبىلدىرىپ, ولاردى ەلدىڭ دامۋ جولىنداعى ماڭىزدى قادام دەپ اتادى. سونداي-اق ول مەملەكەت باسشىسىنىڭ باستامالارىن ىسكە اسىرۋ اياسىندا ەلدەرىمىز اراسىنداعى ىنتىماقتاستىققا دايىن ەكەنىن جەتكىزدى.
سونىمەن قاتار ماۋلەن اشىمباەۆ الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى رەتىندە ەلشىگە گەرمانيانىڭ بىرقاتار ءدىن ليدەرلەرى مەن كورنەكتى ساياسي قايراتكەرلەرىنە سەزگە شاقىرۋ حاتى جولدانعانىن ايتتى. ول الەمدىك جانە ءداستۇرلى دىندەر ليدەرلەرىنىڭ VII سەزى بيىلعى قىركۇيەك ايىندا وتەتىنىنە نازار اۋدارىپ, ديپلوماتتى گەرمانيادان شاقىرىلعان دەلەگاتتاردىڭ فورۋمعا قاتىسۋىنا جاردەمدەسۋگە شاقىردى.
