كوركەم ەڭبەك قولتاڭباسى

«بابالار اماناتى» جوباسىنىڭ ماقساتى ەلىمىز­دىڭ بۇكىل ايماقتارىنداعى كوركەم ەڭبەك ءپانى مۇعالىمدەرىن ءبىر ارنادا توعىستىرۋ. سول ارقىلى وسكەلەڭ ۇرپاقتىڭ ءتالىم-تاربيەسى مەن ءبىلىم نەگىزىن ۇشتاستىرۋ ءھام ارقيلى جانرداعى تۋىندىلاردىڭ قىر-سىرىن تاريح تاعىلىمىنا تەرەڭ بويلاتا وتىرىپ كورەرمەنگە جەتكىزۋ.

بيىل «بابالار اماناتى» ۇلتتىق جوباسىنىڭ قۇرىل­عانىنا ءۇش جىل تولدى. جوباعا سۋرەت­شىلەر وداعى، رەسپۋبليكا ديزاينەرلەرىنىڭ ەۋرا­زيالىق وداعى، قول­ونەر وداعى جانە شىعار­ماشى­لىقپەن اينالىساتىن ەلى­مىزدىڭ كوركەم ەڭ­بەك مۇعالىمدەرى كىرەدى. ولار تۇر­كيا، گرەكيا جانە ور­تالىق ازيا ەلدەرى اراسىندا وتەتىن حالىقارالىق كورمەلەرگە ۇزبەي قاتىسىپ كەلەدى.

جوبا جەتەكشىسى – قاناعات كودەكوۆ. «بابالار اماناتى» – حالىقارالىق كاسىبي سۋرەتشىلەرى مەن تالانتتى كوركەم ەڭبەك مۇعالىمدەرىنىڭ ۇزدىك شىعار­مالار جيناعىنىڭ اۆتورى «ۇزدىك پەداگوگ-2021» بايقاۋىنىڭ جەڭىم­پازى اتانعان بولاتىن. سونداي-اق ونىڭ قولتاڭ­باسىنان ءال-ءفارابيدىڭ 1150 جىل­دىعىنا، اباي قۇنانباي ۇلىنىڭ 175 جىل­دىعىنا، مۇقاعالي ماقا­تاەۆتىڭ 90 جىلدى­عىنا، ەل تاۋەلسىزدىگىنىڭ 30 جىلدىعىنا ارنالعان شى­عارمالار جيناقتارى جارىق كوردى.

– كوركەم ەڭبەك پاندەرىن وقىتاتىن رەسپۋب­ليكانىڭ بارلىق وڭىرلەرىنەن كەلگەن 800-دەن استام ۇستاز، شىعارماشىل پەداگوگ «بابالار اماناتى» جوباسىندا رەسپۋبليكالىق جانە حالىقارالىق دەڭگەيدە پەداگوگيكالىق ونەردى ناسيحاتتاۋ ماق­ساتىندا بىرىكتى. جوبا مۇشەلەرى ەلىمىزدە ءوتىپ جاتقان مادەنيەت كۇندەرىنە بەلسەندى قاتىسىپ، كورمەلەر وتكىزەدى. قازىرگى ۋاقىتتا ەلىمىزدىڭ پەداگوگيكالىق قوعامداستىعى وسكەلەڭ ۇرپاقتى ۇلتتىق بەينەلەۋ ونەرىنىڭ قۇپيالارى مەن قىر-سىرىنا ۇيرەتۋ ءۇشىن تىنىمسىز ەڭبەك ەتۋدە، ونەر ارقىلى ولاردى قازىرگى زامانعى كوركەمدىك باعىتتارمەن تانىستىرادى، ەستەتيكالىق تاربيەنى، سۇلۋلىقتى دۇرىس ءتۇسىنۋدى قالىپتاستىرادى. قازاقستاننىڭ ۇلتتىق ونەرىن ناسيحاتتاۋ ىسىندە شىعارماشىل پەداگوگتەردىڭ ورنى ەرەك، – دەيدى قاناعات كودەكوۆ.

بيىلعى كورمەگە قاراعاندى، اتىراۋ، اقتاۋ، شىمكەنت، ماڭعىستاۋ، پاۆلودار، سەمەي، وسكەمەن جانە تاعى باسقا دا ايماقتاردان حالقىمىزدىڭ ۇلتتىق مادەنيەتىن، تاريحىن، سالت-ءداستۇرىن، قا­زاقستان تابيعاتىنىڭ سۇلۋلىعىن بەينەلەيتىن 40-تان استام تۋىندى ۇسىنىلعان. الماتىلىق كورەرمەندەر مەن قالا قوناقتارى اتالعان ونەر جارمەڭكەسىن 2022 جىلدىڭ 23 اقپانىنا دەيىن تاماشالاي الادى.

الماتى