جارتىلاي فينال
ءتۋرنيردىڭ ءبىرىنشى جارتىلاي فينالىندا رەسەي مەن ۋكراينا قۇرامالارى كەزدەستى. اسا تارتىستى وتكەن باسەكەدە سولتۇستىكتەگى كورشىلەرىمىز 3:2 ەسەبىمەن جەڭىسكە جەتىپ, فينالعا ءبىرىنشى بولىپ جولداما الدى. ماتچتىڭ العاشقى بولىگىندە رەسەيلىكتەر 2:1 ەسەبىمەن العا شىقتى. ەكىنشى تايمدا ارتەم نيازوۆ رەسەيدىڭ ءۇشىنشى گولىن سوققانىمەن, ارادا 4 مينۋت وتكەندە دانيل اباكشين ەسەپتى 3:2-گە دەيىن قىسقارتتى. ويىننىڭ سوڭعى مينۋتىندا تورەشى رەسەي قۇراماسىنىڭ قاقپاسىنا پەنالتي بەلگىلەپ, ۋكراينالىقتارعا ەسەپتى تەڭەستىرۋگە زور مۇمكىندىك پايدا بولعان ەدى. الايدا پەتر شوتۋرما ايىپ دوبىن ءساتسىز ورىنداپ, كومانداسىن جەڭىلىستەن قۇتقارىپ قالا المادى.
ەكىنشى جارتىلاي فينالدا پيرەنەي تۇبەگىنىڭ ەكى وكىلى – يسپانيا مەن پورتۋگاليا فۋتزالشىلارى شەبەرلىك بايقاستى. بۇل ماتچ پورتۋگاليانىڭ تاماشا كامبەگىمەن اياقتالدى. كەزدەسۋدىڭ ءبىرىنشى 20 مينۋتىندا يسپانيالىقتار 2:0 ەسەبىمەن العا شىقسا دا, ەكىنشى تايمدا پورتۋگاليا قۇراماسى يسپانيا قاقپاسىنا جاۋاپسىز ءۇش گول سالىپ, قارسىلاستارىنان جەڭىستى ج ۇلىپ الدى. قورىتىندى ەسەپ – 3:2. وقىرمانداردىڭ ەسىندە بولسا, يسپانيا مەن پورتۋگاليا بىلتىرعى الەم چەمپيوناتىنىڭ شيرەك فينالىندا دا ءبىر-بىرىمەن كەزدەسىپ, ول ماتچتا دا پورتۋگاليالىقتاردىڭ مەرەيى ۇستەم بولعان ەدى.
ءۇشىنشى ورىن
ەۋروپا چەمپيوناتىنىڭ قولا جۇلدەسى ءۇشىن وتكەن ماتچتا يسپانيا مەن ۋكراينا كەزدەستى. ماتچ الدىندا فۋتزال ماماندارى يسپانيانى فاۆوريت ساناعان. الايدا ۋكراينا فۋتزالشىلارى قاراجاياۋ ەمەس ەكەندىكتەرىن كورسەتىپ, العاشقى تايمدا جەتى دۇركىن ەۋروپا چەمپيوندارىنا لايىقتى قارسىلىق كورسەتتى. كەزدەسۋدىڭ 11-مينۋتىندا يسپانيالىقتار ەسەپ اشسا, 17-مينۋتتا ۋكراينالىقتار تارازى باسىن تەڭەستىرىپ كەتتى. ارادا ءبىر مينۋت وتكەندە يسپانيا قايتادان ەسەپتە باسىمدىققا يە بولدى. تابلوداعى 2:1 ەسەبى ەكىنشى تايمنىڭ بەل ورتاسىنا دەيىن ساقتالىپ تۇرعانىمەن, 31 جانە 32 مينۋتتاردا پيرەنەي تۇبەگىنىڭ وكىلدەرى ۋكراينا قاقپاسىنا جاۋاپسىز ەكى گول سوعىپ, كارى قۇرلىق بىرىنشىلىگىنىڭ قولا جۇلدەسىن جەڭىپ الدى. قورىتىندى ەسەپ – 4:1.
بۇل – يسپانيانىڭ ەۋروپا چەمپيوناتى تاريحىنداعى ءۇشىنشى قولا جۇلدەسى. ولار بۇعان دەيىن 2003 جانە 2014 جىلدارى ءۇشىنشى ورىنعا تابان تىرەگەن. ال 1998 جانە 2018 جىلدارى ەكى رەت فينالدا سۇرىنگەن. ال ۋكراينا فۋتزالشىلارى ءوز تاريحىندا ەكى رەت (2001 جانە 2003 جىلدارى) فينالعا شىعىپ, 2005 جىلى ءتورتىنشى ورىن العان. مىنە, بيىل ولار ەكىنشى رەت ۇزدىك تورتتىكتىڭ قاتارىنان كورىندى.
فينال
2022 جىلعى قۇرلىق دوداسىنىڭ فينالىندا رەسەي قۇراماسىمەن شەبەرلىك بايقاسقان پورتۋگاليا فۋتزالشىلارى ءتورت جىل بۇرىنعى اتاقتارىن ساقتاپ, ەكى دۇركىن ەۋروپا چەمپيونى اتاندى. ءبىر قىزىعى, پورتۋگاليالىقتار فينالدا دا قارسىلاستارىنان 0:2 ەسەبىمەن جەڭىلىپ جاتىپ, كامبەك جاسادى. كەزدەسۋدىڭ ءبىرىنشى كەزەڭىندە رەسەيلىك انتون سوكولوۆ (9-مينۋت) پەن اندرەي افاناسەۆ (12-مينۋت) مەرگەندىگىمەن كوزگە تۇسسە, 18-مينۋتتا توماش پاكۋ ەسەپ ايىرماسىن قىسقارتتى. ەكىنشى كەزەڭدە پورتۋگاليا ساپىنان اندرە كوەليۋ 26 جانە 31-مينۋتتاردا ءدۋبلدىڭ اۆتورى اتانسا, پاني ۆارەلا 39-مينۋتتا ويىننىڭ نۇكتەسىن قويدى. وسىلايشا, پورتۋگاليا قۇراماسى كامبەك جاساپ, رەسەيدەن 4:2 ەسەبىمەن باسىم ءتۇستى.
پورتۋگاليا قۇراماسى 1996 جىلى تۇساۋى كەسىلگەن ەۋروپا چەمپيوناتىنىڭ فينالىندا وسىمەن ءۇشىنشى رەت باق سىنادى. 2010 جىلعى جارىستىڭ فينالىندا يسپانيادان جەڭىلسە, 2018 جىلى سلوۆەنيادا وتكەن چەمپيوناتتا ءدال وسى يسپانياعا ەسە قايتارىپ, تۇڭعىش رەت ەۋروپا چەمپيونى اتانعان بولاتىن. رەسەي قۇراماسى بولسا, التىنشى مارتە فينالدا جەڭىلدى. ولار تەك 1999 جىلى عانا قارت قۇرلىق بىرىنشىلىگىندە توپ جارعان ەدى. سونىمەن قاتار رەسەيلىكتەر ءۇش مارتە قولا جۇلدەنى جەڭىپ العان.
ءۇشىنشى ەۋروپا چەمپيوناتىنا قاتىسقان قازاقستان قۇراماسى شيرەك فينالدا جارىس جولىنان شىعىپ قالسا دا, جەرلەستەرىمىز جەكەلەي ناتيجەدە ۇزدىك شىقتى. ماسەلەن, ءبىرجان ورازوۆ بيىلعى چەمپيوناتتىڭ ۇزدىك سۇرمەرگەنى اتانسا, دۋگلاس ناتيجەلى پاس بەرۋدە ءبىرىنشى بولدى. ورازوۆ بيىلعى بىرىنشىلىكتە نەبارى 4 ماتچ وتكىزسە دە, 7 گول سوعىپ, ارىپتەستەرىنە 2 مارتە ناتيجەلى پاس بەردى. توپتىق كەزەڭدە سلوۆەنيا قاقپاسىنا 1 گول, فينلياندياعا 2 گول, يتالياعا 2 گول جانە 1\4 كەزەڭدە ۋكراينا قۇراماسىنا 2 گول سالدى. ال ەكى پاستىڭ بىرەۋىن توپتىق كەزەڭدە فينليانديامەن بولعان ويىندا ارنولد كناۋبقا, ەكىنشىسىن ۋكراينامەن بولعان ويىندا دۋگلاسقا شىعاردى. ال دۋگلاس 4 ويىندا 5 گولدىڭ سوعىلۋىنا جاعداي جاسادى.
مەرگەندەر تىزىمىندە رەسەيلىك انتوشكين, چيشكالا, سوكولوۆ سىندى فۋتزالشىلار 5 گولدان سالىپ, ەكىنشى ورىنعا جايعاستى. ورازوۆ ەۋروعا العاش رەت قاتىسقان 2018 جىلى توپتىق كەزەڭدە پولشا قاقپاسىنا سوعىلعان ءبىر گولمەن شەكتەلگەن ەدى. 2016 جىل سەربيادا وتكەن ەۋرودا قازاقستاندىق سەرىك جامانقۇلوۆ, ريكاردينيۋ (پورتۋگاليا) جانە الەكس, ماريو ريۆيلوس, ميگۋلين ء(بارى دە – يسپانيا) سىندى ويىنشىلارمەن بىردەي 6 گول سالىپ, ءبىرىنشى ورىندا بولدى. ال 2018 جىلى سلوۆەنيادا بولعان بىرىنشىلىكتە ريكاردينيۋ ۇزدىك اتانعان ەدى. ول 5 ويىندا 7 گول سالعان بولاتىن.
