ء«بىز جوسپارلارىمىز بەن ۇسىنىستارىمىز تۋرالى ءجيى جازامىز. بىراق سونىمەن قاتار سىزدەرگە اتقارىلعان جۇمىستار تۋرالى اقپارات بەرۋ ماڭىزدى دەپ ەسەپتەيمىن.
سوندىقتان وتكەن جىلى ءبىلىم جانە عىلىم سالاسىندا قابىلدانعان كەيبىر ماڭىزدى شارالارعا توقتالعىم كەلەدى.
- ەلىمىزدىڭ بارلىق مەكتەبىنىڭ ءبىرىنشى سىنىپتارىندا احمەت بايتۇرسىنوۆتىڭ ادىستەمەسى نەگىزىندە ازىرلەنگەن «الىپپە» جانە «بۋكۆار» ەنگىزىلدى.
- 2021 جىلدىڭ قاڭتار ايىنان باستاپ مەكتەپ مۇعالىمدەرىنىڭ, بالاباقشا تاربيەشىلەرى مەن كوللەدج وقىتۋشىلارىنىڭ جالاقىسى 25%-عا ءوستى. وسى جىلدىڭ قاڭتار ايىنان باستاپ تاعى 25%-عا وسكەنىن ايتا كەتكەن ءجون. سونىمەن قاتار 2021 جىلدىڭ قىركۇيەگىنەن باستاپ پەداگوگتەردىڭ جۇمىس جۇكتەمەسى ازايتىلدى. بۇل ءبىر ستاۆكا ءۇشىن مۇعالىمدەر ەندى اپتاسىنا 18 ساعات ەمەس, 16 ساعات جۇمىس ىستەيتىنىن بىلدىرەدى.
- «پەداگوگ مارتەبەسى تۋرالى» زاڭ جوعارى وقۋ ورىندارىنىڭ وقىتۋشىلارىنا قولدانىلماۋىنا بايلانىستى, سايكەسىنشە, ولاردىڭ جالاقىسى كوتەرىلمەدى. سول سەبەپتى مينيسترلىككە باعىنىشتى جوو-لاردا 2021 جىلدىڭ 1 قىركۇيەگىنەن باستاپ پروفەسسورلىق-وقىتۋشىلىق قۇرامنىڭ جالاقىسىن كوتەرۋ تۋرالى ارنايى بۇيرىق قابىلدادىق.
قاتارداعى وقىتۋشىلار ءۇشىن ەڭ تومەنگى جالاقى 200 مىڭ تەڭگەنى, ال پروفەسسورلار ءۇشىن – 350-400 مىڭ تەڭگەنى قۇرايدى. بۇل رەتتە 1 ستاۆكانىڭ ماكسيمالدى كولەمى جىلىنا 680 ساعاتتان اسپاۋى ءتيىس. مۇنداي مۇمكىندىك پرەزيدەنتتىڭ قولداۋىنىڭ ارقاسىندا جانە 2011 جىلدان باستاپ العاش رەت وسىنداي كولەمدە گرانت قۇنىن ارتتىرۋدىڭ ناتيجەسىندە پايدا بولدى.
- 2021 جىلى ءبىز پەداگوگ بولىپ جۇمىس ىستەگىسى كەلەتىندەرگە جۇمىسقا ورنالاسۋ كەزىندە قويىلاتىن تالاپتاردى قاتاڭداتتىق. وسىلايشا, ەندى بۇل ماماندىققا كەز كەلگەن مەكتەپ تۇلەگى تۇسە المايدى, ويتكەنى پەداگوگيكالىق باعىتقا دايىندىقتىڭ بارلىق باعىتتارىنا ۇبت-نىڭ ەڭ جوعارى شەكتى بالى بەلگىلەندى. سونداي-اق پەداگوگيكالىق ماماندىقتار بويىنشا ءبىلىم الۋشىلار الاتىن شاكىرتاقىلاردىڭ كولەمى دە قازىر ەڭ جوعارى.
جالاقىنى كوتەرۋ, جۇكتەمەنى ازايتۋ, ەسەپتىلىكتى قىسقارتۋ, پەداگوگتەردى وزىنە ءتان ەمەس فۋنكتسيالارعا تارتۋعا جول بەرمەۋ شارالارى – ماماندىقتىڭ مارتەبەسىن ارتتىرۋ بارىسىنداعى ماڭىزدى قادامدار. ناتيجەسىندە قازىر مۇعالىم ماماندىعىنا ۇزدىك تۇلەكتەر عانا ءتۇسىپ جاتقانىن كورىپ وتىرمىز. وسى ماماندىققا تۇسۋشىلەردىڭ ورتاشا بالى ايتارلىقتاي ارتتى, پەداگوگ ماماندىعىن تاڭداعان «التىن بەلگى» يەگەرلەرىنىڭ سانى ەكى ەسە كوبەيدى.
- تاعى ءبىر جاڭالىق – پەداگوگيكالىق باعىتتا ءبىلىم بەرەتىن جوعارى وقۋ ورىندارىنىڭ تۇلەكتەرى ءۇشىن مىندەتتى تەستىلەۋ ەنگىزىلدى. ەندى دايىندىعى ناشار ۇمىتكەرلەر مۇعالىم بولىپ جۇمىسقا ورنالاسا المايدى. ياعني پەداگوگيكالىق ءبىلىم تۋرالى ديپلومنىڭ بولۋى ەندى جۇمىسقا بىردەن ورنالاسۋعا كەپىلدىك بەرمەيدى. بالالارمەن جۇمىس ىستەي ءبىلۋ وتە ماڭىزدى جانە جاۋاپتى مىندەت بولعاندىقتان, الدىمەن تاۋەلسىز تەستىلەۋدەن ءوتۋ كەرەك. مۇنداي سىرتقى ەمتيحاندى 2021 جىلى شامامەن 40 مىڭ تۇلەك تاپسىردى. ولاردىڭ ىشىندە شەكتى بالل جيناعاندار عانا مەكتەپتە جۇمىس ىستەۋگە مۇمكىندىك الدى. ەنگىزىلگەن بۇل جاڭاشىلدىق جوعارى وقۋ ورىندارى جۇمىسىنىڭ ساپاسىن دا كورسەتتى. 36 ۋنيۆەرسيتەت وسى ماماندىققا دايىنداۋ بويىنشا ليتسەنزياسىنان ايىرىلدى.
- ءبىر ۇيىمدا ۇزاق ۋاقىت جۇمىس ىستەيتىن مەكتەپ ديرەكتورلارى ءۇشىن العاش رەت روتاتسيا جۇيەسى ەنگىزىلدى. ەندى ولار ءبىر ۇيىمدا 7 جىلدان ارتىق باسشى بولا المايدى. روتاتسيا باستالدى جانە جىل بويى جۇرگىزىلەتىن بولادى.
- سونداي-اق 2021 جىلى ءبىلىم بەرۋ ۇيىمدارى ديرەكتورلارى قۇرامىنىڭ ساپاسىن جاقسارتۋ ءۇشىن ناقتى مەرزىمدەر, كريتەريلەر, تەستىلەۋدى ەنگىزە وتىرىپ, لاۋازىمعا تاعايىنداۋدىڭ جاڭا جۇيەسى ەنگىزىلدى.
- ديرەكتورلار ءۇشىن بىلىكتىلىك ساناتتارى ەنگىزىلدى, ولار ءوز جالاقىسىنان 30%-دان 100%-عا دەيىن اي سايىنعى ۇستەماقى الا باستادى. بۇل قالاي جۇمىس ىستەيدى؟ ءار 3 جىل سايىن ديرەكتور اتتەستاتسيادان وتۋگە مىندەتتى. اتتەستاتتاۋ ناتيجەسى بويىنشا باسشى ساناتتاردىڭ ءبىرىن الادى, ونىمەن بىرگە 3 جىلعا جانە اي سايىنعى قوماقتى ۇستەمە اقى (جالاقىنىڭ 30%-دان 100%-عا دەيىن) تاعايىندالادى. جۇمىس تيىمدىلىگى وتە تومەن بولعان جاعدايدا باسشى جۇمىستان شىعارىلادى.
- پەداگوگتەردى جۇمىسقا قابىلداۋدىڭ جاڭا قاعيدالارى ازىرلەنىپ, قابىلداندى. قىسقاشا ايتقاندا, بۇدان بىلاي ديرەكتورلاردىڭ ءوز قالاۋى بويىنشا مۇعالىمدەردى ءوزى جۇمىسقا قابىلداۋعا مۇمكىندىگى بولمايدى. ەندى ناقتى كريتەريلەر بەلگىلەنىپ, مۇعالىمدەر جۇمىسقا قىزمەتىنىڭ ناتيجەسى مەن جەتىستىكتەرى نەگىزىندە كونكۋرس ارقىلى ورنالاسادى. بيىل بۇل ءراسىم تسيفرلىق فورماتقا كوشىرىلەدى.
- ەسەپ بەرۋدى ازايتۋ جانە مۇعالىمدەردى ەرەكشە فۋنكتسيالارعا تارتپاۋ تۋرالى ايتا وتىرىپ, زاڭ نورمالارى جۇمىس ىستەيتىنىن اتاپ وتكىم كەلەدى. جاعداي بۇرىنعىدان تۇبەگەيلى وزگەردى. بۇل ماسەلەگە قاتىستى قاتاڭ ۇستانىمىمىز بار. 2021 جىلى جاڭا زاڭنىڭ نورمالارىن بۇزعانى ءۇشىن (ارتىق ەسەپتەردى تالاپ ەتۋ, قىزمەتتىك مىندەتىنە جاتپايتىن جۇمىسقا تارتۋ جانە ت.ب.) ءبىلىم بەرۋ ۇيىمدارىنىڭ جۇزدەگەن باسشىسىن جانە وزگە دە لاۋازىمدى تۇلعالاردى جازالاۋعا تۋرا كەلدى. بۇل جۇمىس جالعاساتىن بولادى.
- وتكەن جىلى العاش رەت ەرەكشە قاجەتتىلىكتەرى بار بالالارمەن جۇمىس ىستەيتىن پەداگوگ-اسسيستەنت قىزمەتى ەنگىزىلدى. بۇگىندە ەلىمىزدەگى مەكتەپتەردە وسىنداي 1200 مۇعالىم جۇمىس ىستەيدى. بۇل – ينكليۋزيۆتى ءبىلىم بەرۋدى دامىتۋ بويىنشا ماڭىزدى شارا. سونداي-اق 2021 جىلى رەسپۋبليكا بويىنشا 50-گە جۋىق ينكليۋزيانى قولداۋ كابينەتتەرى اشىلدى, پسيحولوگيالىق-مەديتسينالىق-پەداگوگيكالىق كابينەتتەر سانى 12 بىرلىككە ءوستى, پسيحولوگيالىق-پەداگوگيكالىق تۇزەتۋ كابينەتتەرىنىڭ سانى 13 بىرلىككە ءوستى. اۋتيزم ورتالىقتارى نومەنكلاتۋراعا ەنگىزىلدى.
- ال مەكتەپكە دەيىنگى ۇيىمدار تۋرالى ايتاتىن بولساق, مەكتەپكە دەيىنگى تاربيە مەن وقىتۋدى دامىتۋدىڭ جاڭا مودەلى ازىرلەندى. ول بالالاردى تاربيەلەۋ جانە وقىتۋ پروتسەستەرىنە كوزقاراستارىن وزگەرتۋگە باعىتتالعان. ساراپشىلارعا, عالىمدارعا جانە ۇكىمەتتىك ەمەس ۇيىم وكىلدەرىنە كومەكتەرى ءۇشىن العىس ايتامىن.
- 2021 جىلى بارلىعى 480 بالاباقشا اشىلدى, ونىڭ ىشىندە ۇشەۋى ەرەكشە ءبىلىم بەرۋدى قاجەت ەتەتىن بالالارعا ارنالعان, بۇل 35 مىڭعا جۋىق جاڭا ورىن اشۋعا مۇمكىندىك بەردى.
- 2021 جىلى ۇبت ەلەكتروندى فورماتقا كوشىرىلدى. ەندى تەستىلەۋ كەزىندە پروكتورينگ جۇيەسى پايدالانىلادى. تەست تاپسىراتىن كومپيۋتەرلەردە بەينەباقىلاۋ كامەرالارى ورناتىلعان. ولار ينتەرنەتتە تىكەلەي ترانسلياتسيا جۇرگىزۋگە جانە بەينەجازبانى قايتا تەكسەرۋگە مۇمكىندىك بەردى. بۇرىنعى قاعاز جۇيەسىنەن ايىرماشىلىعى, تەستىلەۋ كۇنى بارلىق بلانكى مەن سۇراق كىتاپشالارى جويىلاتىن. ەلەكتروندىق فورماتتىڭ ارقاسىندا تەستىلەۋ الدەقايدا وبەكتيۆتى ءارى اشىق تۇردە وتەتىن بولدى. 2021 جىلى دوكتورانتۋراعا ءتۇسۋ ءۇشىن ەمتيحان العاش رەت ورتالىقتاندىرىلىپ, ەلەكتروندى فورماتتا وتكىزىلدى.
- سونداي-اق وتكەن جىلدان باستاپ تالاپكەرلەرگە جىلىنا ءبىر رەت ەمەس, ەكى رەت ماگيستراتۋراعا جانە دوكتورانتۋراعا تۇسۋگە مۇمكىندىك بەرىلدى. بۇل جاڭاشىلدىق ماگيستراتۋرا مەن دوكتورانتۋرادا وقىعىسى كەلەتىندەر ءۇشىن وڭ وزگەرىس بولدى.
- ديسسەرتاتسيالىق كەڭەس قىزمەتتەرىنىڭ ەرەجەلەرى تولىعىمەن وزگەردى. ولاردىڭ جۇمىستارىنىڭ ساپاسىن جاقسارتۋ ماڭىزدى. ءبىزدىڭ كوميتەتكە 40-قا جۋىق كەڭەستىڭ جۇمىسىن توقتاتۋعا تۋرا كەلدى. سونىمەن قاتار وسى ەرەجەلەر قابىلدانعاننان كەيىن قورعالاتىن بارلىق ديسسەرتاتسيالار قولجەتىمدى بولدى, ال قورعاۋ پروتسەدۋراسى ەندى مىندەتتى تۇردە ونلاين-ترانسلياتسيا ارقىلى جۇزەگە اسىرىلادى. بۇل ەرەجەلەردە باسقا دا ماڭىزدى نورمالار قاراستىرىلعان.
- ءبىلىم بەرۋ ساپاسى تومەن 15 جوعارى وقۋ ورنى جۇمىسىن توقتاتتى. تاعى وقىتۋ ساپاسى ناشار 65 جوو-دان 500-دەن استام ليتسەنزيا كەرى قايتارىلدى. سونداي-اق 30 كوللەدج جۇمىسىن توقتاتىپ, ءتيىستى دەڭگەيدە ءبىلىم بەرمەگەن ماماندىقتار بويىنشا 2000 ليتسەنزيا مينيسترلىككە قايتارىلدى. 100 مىڭنان استام ستۋدەنت باسقا جوعارى وقۋ ورىندارىنا اۋىستىرىلدى. سونىمەن قاتار تەكسەرۋ كەزىندە ءىس جۇزىندە وقىتىلماعان ون مىڭعا جۋىق ستۋدەنت وقۋدان شىعارىلدى, جوعارى وقۋ ورىندارىندا ولاردىڭ قۇجاتتارى دا بولماعان.
- 2021 جىلى جەكەمەنشىك مەكتەپتەر سانى ارتىپ, سەرپىلىس بايقالدى. وتكەن جىلى 170-كە جۋىق جەكەمەنشىك مەكتەپ اشىلدى. بۇل, ەڭ الدىمەن, جان باسىنا قارجىلاندىرۋدى ەنگىزۋ جانە مەملەكەتتىك تاپسىرىستى ورنالاستىرۋدىڭ ناتيجەسىندە جۇزەگە اسىرىلدى.
- جوعارى وقۋ ورىندارىنىڭ جۇمىسىن قايتا قاراستىرۋعا بايلانىستى باسشىلار كونكۋرستىق راسىمدەر ارقىلى قايتا تاعايىندالىپ, باسشىلىققا بىلىكتى ءارى جاس ماماندار كەلدى. ولاردىڭ اراسىندا كەمبريدج ۋنيۆەرسيتەتىنىڭ, پەنسيلۆانيا ۋنيۆەرسيتەتىنىڭ, نازارباەۆ ۋنيۆەرسيتەتىنىڭ, «بولاشاق» باعدارلاماسىنىڭ جانە الەمنىڭ باسقا دا جەتەكشى ۋنيۆەرسيتەتتەرىنىڭ تۇلەكتەرى بار. سونداي-اق الەمنىڭ جەتەكشى ۋنيۆەرسيتەتتەرىنىڭ 20-دان استام تۇلەگى پروۆوست جانە پرورەكتور بولىپ تاعايىندالدى. پرەزيدەنتتىك جاستار كادرلىق رەزەرۆىنىڭ مۇشەلەرى مينيسترلىك پەن ۆەدومستۆولىق باعىنىشتى ۇيىمدارداعى جۇمىسقا بەلسەنە ارالاسا باستادى.
- مەملەكەت باسشىسىنىڭ تاپسىرماسىنا سايكەس, جوعارى وقۋ ورىندارى ستۋدەنتتەرىنىڭ شاكىرتاقىسى ءوستى. ماسەلەن, سوڭعى ەكى جىلدا دوكتورانتتاردىڭ شاكىرتاقىسى 82 مىڭنان 170 مىڭ تەڭگەگە دەيىن ءوستى. بيىل قىركۇيەك ايىندا شاكىرتاقى مولشەرى تاعى دا ارتادى.
- جوعارى وقۋ ورنىندا وقۋ ءۇشىن بولىنەتىن مەملەكەتتىك ءبىلىم بەرۋ گرانتتارىنىڭ سانى 5000-عا ارتتى. بيىل دا گرانتتار سانى وسىنداي كولەمدە ارتادى. گرانتتار ءبولۋ كەزىندە «merit based»-كە عانا ەمەس, «need based»-كە دە نازار اۋدارامىز. ماسەلەن, العاش رەت كۆوتا بويىنشا ءبىلىم بەرۋ گرانتتارى جالپى سانىنىڭ 5%-ى كوپبالالى وتباسىلاردان شىققان بالالارعا, 1%-ى تولىق ەمەس وتباسىلاردان شىققان بالالارعا بولىنەدى.
- العاش رەت 2021 جىلى جاس عالىمدارعا پوستدوكتورانتۋرا ەنگىزىلدى. ەندى پرەزيدەنت قولداۋىنىڭ ارقاسىندا جىل سايىن 1000 جاس عالىم 3 جىلعا پوستدوكتورانتۋراعا قابىلدانا الادى, وسى 3 جىلدا تۇراقتى تۇردە جالاقى الىپ, عىلىم سالاسىنداعى مانسابىن باستايدى.
- العاش رەت عالىمدارعا ارنالعان تاعىلىمدامالار پايدا بولدى. ەندى جىل سايىن بيۋدجەت ەسەبىنەن 500 عالىم ءبىر جىل بويى تاعىلىمدامادان وتۋگە شەتەلدەگى ۇزدىك عىلىمي ورتالىققا بارا الادى. 2021 جىلدىڭ جەلتوقسان ايىنداعى كوميسسيا وتىرىسىندا 500-گە جۋىق عالىم ستيپەندياعا يە بولدى.
- جاقىندا پرەزيدەنتتىڭ تىكەلەي تاپسىرماسىمەن قابىلدانعان «عىلىم تۋرالى» زاڭعا ەنگىزىلگەن وزگەرىستەر ءتىل ماماندارىن, تاريحشىلاردى, ارحەولوگتاردى, فيلوسوفتاردى جانە ت.ب. عالىمداردى گرانتتىق تاۋەلدىلىكتەن ءبىرجولا ارىلتتى. سايكەسىنشە, ولاردىڭ عىلىمي قىزمەتىن قولداۋعا كەپىلدىك بەرىلدى. كەم دەگەندە 1600 عالىم گرانتتىق كونكۋرستاردىڭ ناتيجەلەرىنە قاراماستان تۇراقتى جالاقى الاتىن بولدى. مۇنداي قولداۋدىڭ ماڭىزى زور.
- عىلىمي گرانتتار مەرزىمىن ۇزارتۋ جانە عىلىمي-زەرتتەۋ ينستيتۋتتارىندا كەپىلدەندىرىلگەن جالاقى الاتىن عالىمداردىڭ ءتىزىمىن كەڭەيتۋگە بايلانىستى عالىمدار كوپتەن بەرى كوتەرىپ كەلە جاتقان ماسەلە دە شەشىمىن تاپتى. ەندى گرانتتار 3 ەمەس, 5 جىل بويى جۇزەگە اسىرىلادى, ولاردىڭ ءتىزىمى دە كەڭەيتىلدى.
- QazVac – بۇرىن ءبىلىم جانە عىلىم مينيسترلىگىنە باعىنىشتى ۇيىم بولعان بيولوگيالىق قاۋىپسىزدىك پروبلەمالارى ينستيتۋتى عالىمدارىنىڭ جۇمىسىنىڭ ناتيجەسى. ۆاكتسينا جاساۋ جانە كلينيكالىق سىناقتار جۇرگىزۋ جۇمىسىن ۇيلەستىرۋ مينيسترلىككە جۇكتەلگەن بولاتىن. پرەزيدەنتتىڭ جان-جاقتى قولداۋىنىڭ ارقاسىندا ۆاكتسينا دايىندالىپ, بقپعزي بازاسىندا زاۋىت ىسكە قوسىلدى. ۆيرۋسولوگيا بويىنشا ءبىلىم بەرۋ باعدارلاماسى مەن بىرلەسكەن ديسسەرتاتسيالىق كەڭەس اشىلىپ, جالاقى بىرنەشە ەسە ءوستى, زاماناۋي زەرتحانالىق قۇرال-جابدىقتار ساتىپ الىندى.
- العاش رەت «ۇزدىك عىلىمي قىزمەتكەر-2021» بايقاۋىنىڭ قورىتىندىسىن شىعاردىق. بۇل بايقاۋدا لاۋرەات اتانعان 50 ادام قۇرمەتتى اتاققا يە بولدى جانە قوسىمشا 6 ميلليون تەڭگەگە جۋىق سىياقى الدى. ەندى بايقاۋ جىل سايىن وتكىزىلەتىن بولادى.
- مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ وتىرىسىندا بەرگەن تاپسىرمالارىن ىسكە اسىرۋ اياسىندا مەكتەپكە دەيىنگى تاربيە مەن وقىتۋدى دامىتۋدىڭ جاڭا مودەلىن بەكىتتىك. تيپتىك باعدارلامالار وزگەرىپ, بىلىكتىلىكتى ارتتىرۋ جۇمىستارى جۇرگىزىلىپ جاتىر. 2021 جىلى مەكتەپكە دەيىنگى ءبىلىم بەرۋ جۇيەسىنە مەملەكەتتىك باقىلاۋ ەنگىزىلدى. 10 جىل بۇرىن بالالاردى مەكتەپكە دەيىنگى بىلىممەن قامتۋدى ارتتىرۋ جانە جەكەمەنشىك بالاباقشالاردى دامىتۋدى جەدەلدەتۋ ماقساتىندا ولاردى ليتسەنزيالاۋ مەن اتتەستاتسيادان بوساتۋ تۋرالى شەشىم قابىلدانعان بولاتىن. قازىر بالالاردى 99 پايىز بالاباقشاعا ورنالاستىرىلدىق, ەندى بارلىق مەكتەپكە دەيىنگى ۇيىمداردا مەملەكەتتىك ستاندارتتىڭ ساقتالۋىن قامتاماسىز ەتۋ ماڭىزدى.
- دارىندى بالالاردى قولداۋ ماقساتىندا حالىقارالىق وليمپيادالاردىڭ جەڭىمپازدارىنا, سونداي-اق جاتتىقتىرۋشىلارعا قارجىلاي سىياقى تولەۋدى كوزدەيتىن زاڭ جوباسى ازىرلەنىپ, ماجىلىسكە ەنگىزىلدى. قابىلدانعان شارالارمەن قاتار جەڭىمپازدارعا ۇبت تاپسىرماي-اق جوعارى وقۋ ورىندارىنا گرانتقا ءتۇسۋ مۇمكىندىگىن بەرۋدى جوسپارلاپ وتىرمىز.
- تەحنيكالىق جانە كاسىپتىك ءبىلىم بەرۋدى دامىتۋ بويىنشا جاڭا تۇزەتۋلەر قابىلداندى. 2021 جىلدان باستاپ دۋالدىق جۇيە بويىنشا وقۋ ۋاقىتى جۇمىس ءوتىلى بولىپ ەسەپتەلەدى, كوللەدجدەر پراكتيكالىق جۇمىس كەزىندە العان ءونىمىن ساتا الادى. دۋالدى وقىتۋ كەزىندە ستۋدەنتتەرگە كومەكتەسەتىن وندىرىستەن كەلگەن تالىمگەرلەر جالاقى الادى, جاڭا كلاسسيفيكاتور بەكىتىلدى. سونداي-اق كوللەدجگە ستۋدەنتتەردى قابىلداۋدىڭ جاڭا جۇيەسى ەنگىزىلدى جانە مەملەكەتتىك تاپسىرىس «اقشا ستۋدەنتپەن بىرگە جۇرەدى» قاعيداتى بويىنشا ورنالاستىرىلادى.
- 2021 جىلدىڭ قاڭتارىنان باستاپ ايماقتاردا ءبىلىم بەرۋ جۇيەسىن باسقارۋدىڭ جاڭا مودەلى ەنگىزىلدى. 2021 جىلدان باستاپ اۋداندىق جانە قالالىق ءبىلىم بولىمدەرى وبلىستاردىڭ ءبىلىم باسقارمالارىنا قارجىلىق جانە ۇيىمداستىرۋشىلىق جاعىنان ەسەپ بەرە باستادى. وسى ۋاقىتقا دەيىن اۋداندىق, قالالىق بولىمدەردى ءىس جۇزىندە وبلىستىق باسقارمالار ەمەس, اۋداندىق, قالالىق اكىمدىكتەر باسقارعان بولاتىن. ورتا جانە مەكتەپكە دەيىنگى ءبىلىم بەرۋدى باسقارۋ جۇيەسىندە باسقارۋشىلار الدەقايدا كوپ بولدى. مەن بۇل شەشىمدى ورتا جانە مەكتەپكە دەيىنگى ءبىلىم بەرۋ جۇيەسى جۇمىسىنىڭ تيىمدىلىگىن ارتتىرۋ ءۇشىن ەڭ ماڭىزدى قادام دەپ ەسەپتەيمىن.
- «وقۋعا قۇشتار مەكتەپ» جوباسىن جۇزەگە اسىرۋ بويىنشا ناقتى جوسپار بەكىتىلدى. مەكتەپتەردە بالالاردىڭ كىتاپ وقۋىنا قولايلى جاعداي جاسالدى, كىتاپحانالار جاڭارتىلدى. 2021-2022 وقۋ جىلىندا مەكتەپ كىتاپحانالارىنا العاش رەت 2,5 ميلليون دانادان استام بالالار كوركەم ادەبيەتى ساتىپ الىندى. مۇنىڭ بارلىعى پرەزيدەنت قاسىم-جومارت توقاەۆتىڭ قولداۋىنىڭ ارقاسىندا 2021 جىلى اتقارىلعان جۇمىستاردىڭ ءبىر بولىگى عانا. بۇل جازبادا كوپتەگەن وزگەرىستەر مەن شەشىمدەر كورسەتىلگەن جوق. بىراق, ءاربىر باستامانىڭ ارتىندا ءبىلىم جانە عىلىم سالاسى قىزمەتكەرلەرىنىڭ ەڭبەگى جاتىر. كەي شارالار تانىمالدىلىققا يە بولمادى جانە بەلگىلى ءبىر مويىنداماۋشىلىقپەن, قىسىممەن قابىلداندى. دەگەنمەن, بۇرىن تەك ويدا بولعان شەشىمدەر بۇگىندە ءىس جۇزىندە ورىندالدى. قابىلدانىپ جاتقان شارالار ەلىمىزدىڭ ءبىلىم جانە عىلىم سالاسىن جاقسى جاققا وزگەرتەتىن بولادى.
ءوز تاراپىمنان, ءبىلىم جانە عىلىم جۇيەسىن جاقسارتۋ ءۇشىن كۇشەيتىلگەن جۇمىستى جالعاستىراتىنىمىزدى اتاپ وتكىم كەلەدى.
پروبلەمالار ءالى دە بار جانە سالامىزدىڭ ەرەكشەلىگىنە بايلانىستى ولاردىڭ كوپشىلىگى ءالى تولىعىمەن شەشىلگەن جوق. بىراق ءبىز وزەكتى ماسەلەلەردى تەز ارادا شەشۋ ءۇشىن بار كۇشىمىزدى سالامىز», دەلىنگەن ءمينيستردىڭ جازباسىندا.
