ول 1924 جىلى 22 قازاندا قىزىلوردا وبلىسى ارال اۋدانىنىڭ قۇلاندى اۋىلدىق كەڭەسىنە قاراستى ۇشكوڭ اۋىلىندا تۋعان.
مايدانگەر-جازۋشى 1942-1945 جىلدارى ۇلى وتان سوعىسىنا قاتىسقان. 1956 جىلى ماسكەۋدەگى م.گوركي اتىنداعى ادەبيەت ينستيتۋتىن بىتىرگەن, 1962-1964 جىلدارى «جۇلدىز» جۋرنالىنىڭ باس رەداكتورى بولدى. 1992 جىلدان حالىقارالىق قازاق پەن كلۋبىنىڭ پرەزيدەنتى, 2000 جىلدان «تاڭ-شولپان» جۋرنالى رەداكتورلار كەڭەسىنىڭ توراعاسى قىزمەتىن اتقاردى.
ادەبيەتكە 1947 جىلدان ارالاسا باستادى. تۇڭعىش شىعارماسى – سوعىس تاقىرىبىنا ارنالعان «كۋرليانديا» رومانى 1950 جىلى جارىق كوردى. بۇل شىعارماسى ءۇشىن جازۋشىعا جامبىل اتىنداعى رەسپۋبليكالىق سىيلىق بەرىلدى. «كۋرليانديا» رومانىن كەيىننەن وڭدەپ, تولىقتىرىپ, 1958 جىلى «كۇتكەن كۇن» دەگەن اتپەن قايتا جاريالادى. «قان مەن تەر» تريلوگياسى (1-كىتاپ – «ىمىرت», 1961; 2-كىتاپ – «سەرگەلدەڭ», 1964; 3-كىتاپ – «كۇيرەۋ», 1970) جانە «سەڭ» (1983), «سوڭعى پارىز» (1999) روماندارى كوپتەگەن تىلگە اۋدارىلعان.
«قان مەن تەر» رومانى بويىنشا جاسالعان ينستسەنيروۆكاسى م.اۋەزوۆ اتىنداعى اكادەميالىق قازاق دراما تەاترىنىڭ (1974 جىلدان) رەپەرتۋارىنان تۇراقتى ورىن الدى, ەكرانعا شىعارىلدى. «سوڭعى پارىز» رومان-ديلوگياسى – الەۋمەتتىك-پسيحولوگيالىق شىعارما. ديلوگيادا ارال تەڭىزىنىڭ اپاتقا ۇشىراۋ حيكاياسى ناقتى سۋرەتتەلگەن. شىعارمادا ەكولوگيا, تابيعات پەن ادام ارا قاتىناسىن تولعاعان قالامگەر وقىرمانداردى رۋحاني-ادامگەرشىلىك مۇراتتارعا جەتەلەيدى. تاڭدامالى ادەبي-سىن ماقالالارى «تولعاۋ» (كەيىننەن «جۇرەگى تولى جىر ەدى») دەگەن اتپەن قازاق جانە ورىس تىلدەرىندە جەكە كىتاپ بولىپ شىقتى (1972), 1985 جىلى «اقبيداي تۋرالى اڭىز» اتتى وچەركتەر جيناعى جارىق كوردى.
جازۋشى ا.پ.چەحوۆتىڭ, ا.م.گوركيدىڭ, نازىم حيكمەتتىڭ, يسپان جازۋشىسى ا.كەسوننىڭ شىعارمالارىن قازاق تىلىنە اۋدارعان.
2001 جىلى ماسكەۋدەگى حالىقارالىق ادەبي قوردىڭ «زا چەست ي دوستوينستۆو», 2003 جىلى حالىقارالىق م.شولوحوۆ اتىنداعى سىيلىقتاردىڭ لاۋرەاتى اتاندى. قىزىل جۇلدىز, ەڭبەك قىزىل تۋ, «قۇرمەت بەلگىسى», حالىقتار دوستىعى (1984), «وتان» (1994) وردەندەرىمەن جانە مەدالدارمەن, رسفسر جوعارعى كەڭەسى پرەزيديۋمىنىڭ قۇرمەت گراموتاسىمەن ماراپاتتالعان.
مادەنيەت جانە سپورت مينيسترلىگى
