وسى جارىستىڭ 6-راكەتكاسى بولىپ تىركەلگەن ا.بۋبليك ەكىنشى اينالىمدا دۇنيەجۇزىلىك رەيتينگتە 113-ساتىدا تۇرعان فرانتسيالىق پەر-يۋگ ەربەرمەن كۇش سىناستى. ءبىرىنشى پارتيادا ەكى برەيك جاساعان قازاقستاندىق تەننيسشى باسىمدىق تانىتتى – 6:3. ال ەكىنشى سەتتەگى تاي-برەيكتە ەربەردىڭ اسىعى الشىسىنان ءتۇستى – 7:6 (7:2). ءۇشىنشى, شەشۋشى پارتيانى ا.بۋبليك برەيكپەن باستادى – 2:0. تاعى ءبىر برەيك – 5:2. سودان كەيىن ماتچقا دوپ بەرگەندە, ءوز مۇمكىندىگىن جىبەرگەن جوق – 6:2. ەكى ساعاتقا جۋىق ۋاقىتقا سوزىلعان تارتىستى باسەكە بارىسىندا قازاقستاندىق سپورتشى 11 ەيس جاساپ, 14 برەيك-پوينتتىڭ التاۋىن ءوز ەسەبىنە جازدى. ا.بۋبليك جارتىلاي فينالعا شىعۋ ءۇشىن الەمنىڭ 19-شى, وسى دودانىڭ 2-راكەتكاسى, يسپانيالىق روبەرتو باۋتيستا-اگۋتپەن كەزدەسەدى.
