ادەتتە, حالىقتىڭ جاعدايىن ناشارلاتقان داعدارىستار تۇسىندا قوعامدىق-ساياسي پروتسەستەرگە تەرىس ىقپال ەتەتىن دەسترۋكتيۆتى كۇشتەر بەلسەندىلىك كورسەتەدى. بۇل ۇدەرىستەر, نەگىزىنەن, بۇقارا حالىق پەن «حالىقتىڭ الدىندا بەرگەن ءوز ۋادەسىن ورىندامايتىن پوپۋليستەر مەن بيۋروكراتيالىق, يكەمسىز بيلىك» اراسىنداعى قايشىلىقتارعا اكەلەدى. وسىلاي ەكى تاراپتىڭ اراسىنداعى «تۇسىنبەۋشىلىكتەردى» ء«تيىمدى» پايدالانۋعا تىرىساتىن ارانداتۋشىلاردىڭ زامانى تۋادى. مۇندايلار «حالىقتىڭ مۇددەسىن قورعاۋ» دەگەندى جەلەۋ ەتىپ, ولاردىڭ الەۋمەتتىك ماسەلەلەرىن تەز جانە وڭاي شەشەمىز دەگەن پوپۋليستىك ۋادەلەرىن ءۇيىپ-توگىپ, ساياسي ۇپاي جيناپ, بيلىككە كەلۋ, مەملەكەتتىك شەشىمدەر قابىلداۋ مەن باسقارۋ ىسىنە ارالاسۋ ماقساتىندا حالىقتى ءوز جاعىنا تارتۋعا تىرىسادى. «قاراپايىم حالىقتىڭ» اتىنان, سولاردىڭ مۇددەسىن قورعاعان بولىپ, ەشبىر نەگىزسىز جانە ورىندالمايتىن قۇر ءسوز بەن بوس ۋادە بەرەتىندەر بيلىك ورگاندارىنا قىسىم جاساۋدى ادەتكە اينالدىرۋدا. بۇلاردا جاۋاپكەرشىلىك دەگەن تۇسىنىك, بەرگەن ۋادەنى ورىنداۋ دەگەن ۇعىم اتىمەن جوق. پوپۋليستەرگە ودان گورى قوعامداعى تانىمالدىلىققا جەتۋ ماڭىزدىراق. ولاردى «ۇراندارى» مەن «ۇسىنىستارىنىڭ» سوڭى ناسىرعا شابۋ مۇمكىندىگى, وتىرىكتەرىنىڭ اشىلۋى دا الاڭداتپايدى. ولار ءوز ماقساتتارىنا جەتۋ ءۇشىن دەموكراتيانى جەلەۋ ەتىپ, قيتۇرقى ارەكەتتەرىن «دەموكراتيالىق قۇندىلىقتارمەن» اقتاعىسى كەلەدى.
سوندىقتان اۋىزبەن وراق ورىپ, ۇرانداتۋمەن اينالىساتىندارعا ەرىپ جۇرە بەرسەك, سولار قازعان ورعا ءتۇسىپ, جاپپاي پوپۋليزم ەلىنە اينالىپ كەتۋىمىز ابدەن مۇمكىن. «پوپۋليست-دەموكراتتاردىڭ» بەلسەندى ارەكەت ەتۋلەرىنە الەۋمەتتىك جەلىلەردىڭ پايدا بولۋى سەپتىگىن تيگىزۋدە. وسىلايشا, تەرىس اقپارات تاراتىپ جۇرگەن ارام پيعىلدى ادامداردىڭ ارەكەتتەرى كۇشەيىپ, ولار شىن مانىندە حالىقتى اداستىرۋدا. كەيبىرەۋلەر ساياسي ويىندار ۇيىمداستىرۋدان تايىنباي, ءتۇرلى سىبىس تاراتىپ, ونسىز دا ۋشىعىپ تۇرعان احۋالدى ودان بەتەر قوزدىرۋدا. ءپوپۋليزمدى مەملەكەتتىك قاراجاتتى ۇرلاۋدىڭ «وڭتايلى قۇرالى» رەتىندە پايدالانۋ ورىن الۋدا. ۇزاق جىلدار شالاعايلىقتان ورىن العان كوپتەگەن كەلەڭسىز پروبلەمانى بايقاماعان بولىپ, بارىنە كوزدى جۇما قاراعاندىعىمىز سولاردىڭ پايداسىنا جۇمىس ىستەدى. بۇل كەمشىلىكتەر ەندى عانا ايقىن كورىنە باستادى. نەگە سەنەرىن بىلمەي دال بولىپ الدانعان, سونىڭ زاردابىن شەككەن تۇرعىنداردى پوپۋليستىك ارزان ۋادەلەرىمەن ارانداتىپ, قوعامدا الاۋىزدىق تۋدىرىپ, ولاردى نارازىلىق جاساۋعا يتەرمەلەۋ قيىن بولمادى. بۇل تۇپتەپ كەلگەندە, قوعامدىق ورتادا الالاۋ, جاتتىق سەزىم مەن الاۋىزدىق, تىپتەن دۇشپاندىق پەن قىرعي-قاباقتىق كوڭىل كۇيىن كۇشەيتۋگە اكەلىپ سوعۋدا. ال مۇنداي جەردە شىنايى كوڭىل, ادالدىق, ادامي قارىم-قاتىناستاردىڭ بولۋى مۇمكىن ەمەس.
سوندىقتان ق.توقاەۆ ءپوپۋليزمدى جاھاندىق تەرىس ۇدەرىس دەپ باعالاپ, بۇل ايقاي-شۋعا تولى ەموتسيونالدى ۇرانداردىڭ ايقىن ستراتەگياسىنىڭ جوقتىعىمەن بايلانىستىرا قارايدى. ونىڭ كەز كەلگەن ەلدىڭ دامۋىن توقتاتىپ, ۇلتتىق بىرلىگىن السىرەتەتىن قاۋىپتى ءۇردىس ەكەندىگىنە كوڭىل اۋدارادى. ال اباي مۇندايلار تۋرالى بىلاي دەگەن: «قۋ تىلمەنەن قۇتىرتىپ, كەتەر ءبىر كۇن وتىرتىپ, قىلىپ جۇرگەن ونەرى: قارەكەتى – ارەكەت». ياعني ارەكەتى مەن تىرلىگى – قىرسىق, ب ۇلىك, لاڭ جانە پالە دەگەن ءسوز. ۇلى حاكىم ءارى قاراي «پىسىق دەگەن انت شىقتى. ءجۇز قۇبىلعان سالت شىقتى. بوس ماقتانعا سالىنىپ. بەكەر كوكىرەك كەرۋگە. ءوزى وڭباعان انتۇرعان راسى جوق ءسوزىنىڭ, وڭكەي جالعان ماقتانمەن شىننىڭ بەتىن بويايدى» دەپ سۋرەتتەگەن جايتتار بۇگىن دە ءوزىنىڭ وزەكتىلىگىن جوعالتپاعانعا ۇقسايدى. ناتيجەسىندە, اتالعان كەلەڭسىزدىكتەر حالىقتىڭ تۇرمىس ساپاسىنا جانە كوڭىل كۇيىنە كەرى اسەرىن تيگىزۋدە. ەندەشە, مەملەكەتتىك اپپاراتتىڭ السىزدىگىنە اكەلىپ وتىرعان وسى ەلەۋلى كەمشىلىكتەردىڭ الدىن الىپ, ولاردى بولدىرماۋ كەرەك. ولاي بولسا, ەلدەگى جاعدايدى تۇبەگەيلى وزگەرتۋ ءۇشىن باتىل قادامدار جاسالىپ, پوپۋليزمنەن ارىلۋ تۇرعىسىندا باسقارۋ جۇيەسىن وزگەرتۋگە باعىتتالعان جانە ناقتى ناتيجە بەرەتىندەي ساياسي-ەكونوميكالىق رەفورمالار جۇرگىزۋ قاجەت. سوندىقتان پرەزيدەنت تاۋەلسىزدىك پەن ەگەمەندىككە, ەلىمىزدىڭ شەكاراسى مەن اۋماقتىق تۇتاستىعىنا نۇقسان كەلتىرەتىن ءبىر دە ءبىر كەلىسىمگە جول بەرمەۋىمىز كەرەك دەگەن ماڭىزدى وي-تۇجىرىم جاساپ, ءبىز ءۇشىن بارىنەن قىمبات, وسى قاسيەتتى قۇندىلىقتار مەن قازاقستاننىڭ مۇددەلەرىن تاباندىلىقپەن قورعاۋ قاجەتتىگىن اتاپ كورسەتتى. دەمەك الا-قۇلالىق دەگەن تەك قانا ارتۇرلىلىك ەمەس ەكەن. ول سونىمەن بىرگە قوعامدا كىربىڭ, رەنىش, وكپە جانە شالاعايلىقتى تۋدىراتىن قاۋىپتى قۇبىلىستارعا جول بەرمەۋ دەگەن ءسوز. سوندا عانا ۇلتتىق مۇددەمىز تولىققاندى قورعالىپ, تاۋەلسىزدىك پەن مەملەكەتتىلىگىمىز نىعايادى.
