ەكونوميكالىق ىنتىماقتاستىق ۇيىمىنا (ەىۇ) مۇشە مەملەكەتتەردىڭ كولىك مينيسترلەرىنىڭ 11-كەزدەسۋى بەينەكونفەرەنتسيا رەجيمىندە ءوتتى.
وتىرىسقا ۇيىمعا مۇشە ەلدەردەن باسقا MCAT, OTIF, بۇۇ ەەك, تجىۇ, ساۋدا جانە دامۋ بانكىنىڭ حالىقارالىق ۇيىمدارىنىڭ باسشىلارى قاتىستى.
قازاقستان دەلەگاتسياسىن قر يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ باسقارىپ, ترانزيتتىك كولىك دالىزدەرىنىڭ تيىمدىلىگىن ارتتىرۋ تۋرالى بايانداما جاسادى.
جيىندا كولىك سەكتورى, ونىڭ ىشىندە مۋلتيمودالدىق تاسىمالدار, اسىرەسە, پاندەميادان كەيىنگى كەزەڭدە ترانزيتتىك تاسىمالداردى جەڭىلدەتۋ جانە قالپىنا كەلتىرۋدىڭ ماڭىزىن اتاپ ءوتتى. سونداي-اق وڭىردەگى تاسىمالدار تۇراقتىلىعىن ارتتىرۋ جونىندەگى ودان ارعى ءىس-قيمىلدارعا, ونىڭ ىشىندە ەىۇ ەلدەرى ارقىلى جەتكىزۋ تىزبەگىنىڭ ۇزدىكسىز جۇمىس ىستەۋىنە قاتىستى ۇسىنىمدار بەرىلدى.
بۇدان باسقا, ۆيتسە-مينيستر ۇيىمعا مۇشە ەلدەردىڭ كولىك مينيسترلەرىن قازاقستاندا كولىك سالاسىن دامىتۋ بويىنشا قابىلدانىپ جاتقان شارالار تۋرالى حاباردار ەتتى. اتاپ ايتقاندا:
- كاسپيدەگى اقتاۋ جانە قۇرىق پورتتارىن قوسا العاندا, ترانسكاسپي حالىقارالىق كولىك باعدارىن (تحكب) دامىتۋ;
- اقتاۋ پورتىندا قۋاتى 100 مىڭ جيىرما فۋتتىق ەكۆيۆالەنتتەن اساتىن «كونتەينەرلىك حاب» قۇرۋ جونىندەگى جوسپارلار;
- يران, ءازىربايجان جانە رەسەي پورتتارىمەن پارومدىق قاتىناستار مەن فيدەرلىك جەلىلەردى دامىتۋ;
- ەىۇ ەلدەرىنە اميراباد/انزالي (يران) – اقتاۋ باعىتىن پايدالانىپ, بەندەر-ابباس (يران) پورتىنان اقتاۋ پورتىنا دەيىنگى باعداردى دامىتۋعا جايىنا توقتالدى.
2021 جىلدىڭ قورىتىندىسىندا جۇكتەر مەن كونتەينەرلەر ءترانزيتىنىڭ كولەمى 21,6% ارتىپ, 1 065,6 مىڭ جفە قۇرادى.
سونىمەن قاتار وڭىردەگى قۋاتتى كولىك-لوگيستيكالىق حابقا اينالعان «قورعاس - شىعىس قاقپاسى» اەا-داعى قۇرعاق پورتتى دامىتۋ; قازاقستان قولداناتىن, سونداي-اق كەدەن قىزمەتتەرى پايدالاناتىن كاسپي ماڭى ەلدەرىنىڭ پورتتارى اراسىندا دەرەكتەر الماسۋعا مۇمكىندىك بەرەتىن اقپاراتتىق جۇيەلەر; ستانتسيالاردى باسقارۋدىڭ اۆتوماتتاندىرىلعان جۇيەلەرىن پايدالانۋ, جەرگىلىكتى جۇمىس جانە پوەزدار قوزعالىسىن ۇيىمداستىرۋ كەزىندە ورىندالعان قوزعالىس كەستەسىن جۇرگىزۋ جانە تالداۋ تۋرالى ايتىلدى.
قىتايمەن شەكارادا ءترانزيتتىڭ وسۋىنە جانە كەپتەلىستىڭ الدىن الۋعا باعىتتالعان «تەمىر كەرۋەن» تەمىرجول ترانزيتتىك تاسىمالدارىن دامىتۋ جونىندەگى ىنتىماقتاستىق تۋرالى مەموراندۋمدى پىسىقتاۋ, تاريفتىك شارتتاردى بەلگىلەۋ بويىنشا جۇمىستاردى جالعاستىرىپ, قىتاي-قازاقستان-تۇرىكمەنستان-يران ءدالىزىن دامىتۋ قاجەتتىلىگىنە نازار اۋدارىلدى.
وتىرىس قورىتىندىسىندا ەىۇ كولىك مينيسترلەرىنىڭ 11-ءشى كەڭەسىنىڭ انكارا دەكلاراتسياسى - 2022 قابىلداندى.
