سەرتيفيكاتتى سالتاناتتى تاپسىرۋ ءراسىمى قازاقستان پاۆيلونىنىڭ ساحناسىندا ءوتتى.
«الەم بەينەسى» ارت-جوباسى – پاۆيلونعا الەمنىڭ تۇكپىر-تۇكپىرىنەن كەلگەن ادامدار قىلقالام جانە بوياۋلاردىڭ كومەگىمەن ءوز قولتاڭباسىن قالدىرعان جەر پلانەتاسىنىڭ كەنەپتەگى ءتۇپ بەينەسى. كەنەپتىڭ ولشەمى پلانەتامىزدىڭ كىشىرەيتىلگەن فيزيكالىق پارامەترلەرىنىڭ ۇزىندىعى مەن ەنىنە سايكەس كەلەدى.
كارتينانىڭ نەگىزگى يدەياسى EXPO 2020 Dubai كورمەسىنىڭ «اقىل-ويدى بىرىكتىرە وتىرىپ, بولاشاقتى قالىپتاستىرۋ» تاقىرىبىمەن ۇندەسەدى. ارت-جوبانىڭ ماقساتى – ءبىزدىڭ عالامشارىمىزدا ءومىر سۇرەتىن ادامداردى ۇلتتىق پاۆيلوننىڭ اۋماعىندا ورنالاسقان ءبىر ونەر تۋىندىسى ارقىلى بىرىكتىرۋ. كارتينا – بەيبىتشىلىك, بىرلىك, ۇيلەسىمدىلىك جانە دوستىق سياقتى قۇندىلىقتاردىڭ نىشانى. جوبانى ۇيىمداستىرۋشى – قازاقستاندىق DPARTNERS كومپانياسى.
بۇگىنگى تاڭدا الەمنىڭ 193 ەلىنەن كەلگەن 1900-دەن استام پاۆيلون قوناقتارى مەن كەلۋشىلەرى كارتينا بەتىندە وزدەرىنىڭ ء«ىزىن» قالدىردى. ولاردىڭ اراسىندا الەمگە تانىمال گولليۆۋد اكتريساسى باي لينگ, امەريكالىق بۇرىنعى كاسىپقوي بوكسشى روي دجونس, قازاقستاندىق رەجيسسەر تيمۋر بەكمامبەتوۆ, رەسەيلىك ءانشى ۆالەريا, قازاقستاندىق كاسىبي ۆەلوشاباندوز الەكساندر ۆينوكۋروۆ جانە وزگەلەر بار.
ارت-جوبا قىلقالاممەن سۋرەت سالىپ, ونى ءارى قاراي تىزبەك ارقىلى تاراتقان ادامداردىڭ ەڭ كوپ سانىمەن گيننەستىڭ رەكوردتار كىتابىنىڭ سەرتيفيكاتىنا يە بولدى.
