ءمينيستردىڭ سوزىنشە بيىلدان باستاپ ۇبت تاپسىرۋشىنى تەست بارىسىندا ءبىر ەمەس ەكى كامەرا قاداعالايدى.
«ۇلتتىق بىرىڭعاي تەستىلەۋدى بيىل دا ەلەكتروندى فورماتتا وتكىزۋىمىز قاجەت. اشىقتىقتى, ادىلدىكتى قامتاماسىز ەتۋ – باستى مىندەتتىڭ ءبىرى. بيىل جاڭا تەتىكتەر دە ەنگىزىلەدى. ونىڭ ىشىندە قوسىمشا كامەرا بولادى. ياعني, ەندى ءبىر كامەرا ەمەس, 2 كامەرا ءبىر تەست تاپسىرۋشىعا ارنالىپ قويىلادى. ءبىر كامەرا تالاپكەردىڭ تەست تاپسىرۋ بارىسىن قاداعالاسا, ەكىنشى كامەرا سول ادامنىڭ ءوزى وتىرعان-وتىرماعانىن بەلگىلەنگەن ۋاقىتتىڭ ىشىندە سۋرەتكە ءتۇسىرىپ, تىركەيدى. تەستىلەۋدىڭ باسىنان اياعىنا دەيىن باسقا ادام ەمەس تەستى تاپسىرۋشىنىڭ ءوزى وتىرعانىن باقىلايدى. Fist Id فۋنكتسياسى بار ارناۋلى كامەرا بولادى. سوندىقتان وسى جوسپارلاردى ءتيىستى دەڭگەيدە ورىنداۋ قاجەت», دەدى اسحات ايماعامبەتوۆ.
سونداي-اق ول اقپان ايىندا تاپسىرىلاتىن تەستتىڭ ماڭىزىنا توقتالدى.
«بۇل – بىزدە جىل سايىن ءداستۇرلى فورماتتا وتكىزىلەتىن تەستىلەۋ. بيىل ونى اقپان ايىنىڭ سوڭىنا دەيىن جالعاستىرامىز. ءوتىنىش بىلدىرگەن بارلىق ازامات وسى تەستىنى تاپسىرىپ ۇلگەرۋى كەرەك. بۇل مىندەتتى گرانتتى الۋعا باعىتتالعان تەست ەمەس. مۇنى كەيبىر ازاماتتارىمىز دايىندىق رەتىندە قارايدى. باسقالارى جوعارى وقۋ ورىندارىنا اقىلى تۇردە ءتۇسۋ ءۇشىن تاڭدايدى, وعان سەرتيفيكاتى جارامدى. قالاي دەسەك تە, بۇل تەستىلەۋ تۇلەكتەرىمىز ءۇشىن ماڭىزدى. سوندىقتان وسى جۇمىستى ءتيىستى دەڭگەيدە جۇرگىزۋىمىز كەرەك», دەدى اسحات ايماعامبەتوۆ.
