2021 جىلى نەگىزگى كاپيتالعا سالىنعان ينۆەستيتسيالار كولەمى 13,2 ترلن تەڭگەنى قۇرادى, بۇل 2020 جىلعى كورسەتكىشتەن 7,3%-عا ارتىق. ينۆەستيتسيالار ءوسىمىنىڭ نەگىزگى لوكوموتيۆتەرى ەكونوميكانىڭ شيكىزاتتىق ەمەس سەكتورلارى بولدى. ماسەلەن, ينۆەستيتسيالاردىڭ ناقتى كولەم يندەكستەرى وڭدەۋ ونەركاسىبىندە 1,4 ەسە, قۇرىلىستا 1,2 ەسە, اۋىل شارۋاشىلىعىندا 1,3 ەسە ءوستى.
وڭدەۋ ونەركاسىبىندە ءوسىمىنىڭ نەعۇرلىم جوعارى كورسەتكىشتەرىنە مەتاللۋرگيادا (+27%), توقىما وندىرىسىندە (+28%), فارماتسەۆتيكادا (+39%), حيميا ونەركاسىبىندە (+55%), مينەرالدىق ونىمدەردە (+100%) قول جەتكىزىلدى.
رەسپۋبليكا بويىنشا نەگىزگى كاپيتالعا ينۆەستيتسيالار تارتۋ بويىنشا جىلدىق جوسپار 94%-عا ورىندالدى. نىسانالى كورسەتكىشتەر شىمكەنت قالاسىندا (115,5%), اقتوبە (101,8%) جانە قوستاناي (101,3%) وبلىستارىندا اسىرا ورىندالدى. قاراعاندى وبلىسىندا (99,9%), الماتى قالاسىندا (99,8%), اتىراۋ (99,1%), جامبىل (97,4%), پاۆلودار (96,2%) وبلىستارىندا, نۇر-سۇلتان قالاسىندا (96,1%) ءسال ارتتا قالۋشىلىق بار. شىعىس قازاقستان (92,1%) جانە ماڭعىستاۋ (90,8%), الماتى (89,7%), اقمولا (89,4%), تۇركىستان (82,5%), سولتۇستىك قازاقستان (80,4%) وبلىستارىندا جوسپار ورىندالماعان.
ەڭ تومەنگى كورسەتكىشتەر باتىس قازاقستان (69,6%) جانە قىزىلوردا (66,4%) وبلىستارىندا تىركەلدى. پرەمەر-ءمينيستردىڭ تاپسىرماسى بويىنشا اتالعان ەكى ءوڭىر اكىمدەرىنىڭ ورىنباسارلارى تارتىپتىك جاۋاپكەرشىلىككە تارتىلاتىن بولادى.
2021 جىلدىڭ 9 ايىنىڭ قورىتىندىسى بويىنشا قر ەكونوميكاسىنا تىكەلەي شەتەلدىك ينۆەستيتسيالار كولەمى 49%-عا ارتىپ, $18,7 ملرد قۇرادى. قازاقستان ەكونوميكاسىنا ءىس جۇزىندە بارلىق نەگىزگى ينۆەستور ەلدەر بويىنشا كاپيتال اعىنىنىڭ ءوسۋى بايقالادى. توپ-10 ينۆەستور مەملەكەتتىڭ قاتارىنا نيدەرلاندى, اقش, شۆەيتساريا, قحر, رەسەي, ۇلىبريتانيا, بەلگيا, تۇركيا, وڭتۇستىك كورەيا جانە فرانتسيا كىردى.
«كوش سوڭىندا قالعان وڭىرلەر بەلگىلەنگەن KPI قاتاڭ ساقتاۋ قاجەتتىگىنە نازار اۋدارۋى ءتيىس. نىسانالى ينديكاتورلارعا قول جەتكىزبەگەنى ءۇشىن اكىمدەرگە دەربەس جاۋاپكەرشىلىك جۇكتەلەدى. مەملەكەتتىك ورگاندار مەن اكىمدىكتەر ىشكى جانە سىرتقى ينۆەستيتسيالاردى تارتۋ بويىنشا جۇمىستى جۇيەلى تۇردە جالعاستىرسىن», دەدى ءا. سمايىلوۆ.
