بەيبىت شەرۋگە شىققان ادال نيەتتى ازاماتتار مەن ارام پيعىلدى قاسكويلەردىڭ ارا جىگى اجىراتىلىپ, ءار وقيعا ءادىل تارازىلانۋى ءتيىس. قوعامنىڭ تالاپ ەتىپ وتىرعانى وسى. كوپشىلىكتى الاڭداتقان ماسەلەنى كوكەيگە ءتۇيىپ جازىقسىز جانداردىڭ جاپا شەكپەۋىنە, قۋدالانباۋىنا, زاڭمەن قورعالۋىنا كومەك كورسەتۋدى كوزدەگەن بەلسەندىلەر بۇگىنگە دەيىن 36 ازاماتتىڭ بۇلتارتپاۋ شاراسىن وزگەرتۋگە اتسالىسىپ, ياعني قاماۋدان ەشقايدا كەتپەۋ تۋرالى قولحاتقا اۋىستىرۋعا قول جەتكىزگەن. الماتىدا باستاۋ العان كوميسسيا جۇمىسى ەندىگى كەزەكتە ەل وڭىرلەرىن ارالاماق.
«2-اقپاندا تالدىقورعانعا بارامىز, ودان ارى وڭتۇستىك وڭىرلەرگە تابان تىرەيمىز. قىلمىستىق ءىس قۇجاتتارىن ءجىتى زەرتتەيمىز. ۇلگەرگەنىمىزشە ازاماتتار مەن ولاردىڭ ادۆوكاتتارىن قابىلداپ جاتىرمىز. تەرگەۋ يزولياتورى جاعدايىندا كامەرالاردى ارالاپ ونداعىلاردىڭ اربىرىمەن جەكە جۇزدەسىپ پىكىر الماسۋعا قول جەتكىزدىك. رەسپۋبليكاعا بەلگىلى قۇقىققورعاۋشىلارمەن جانە قوعام قايراتكەرلەرىمەن دە اقىلداسىپ ءبىراز وڭدى ناتيجەگە قول جەتكىزگەن جايىمىز بار. تۇرعىنداردان سەمەي قالاسىندا اتالعان جايعا قاتىستى پروبلەمالار ورشىگەنىن ەستىپ, سول وڭىرگە بەلگىلى زاڭگەر ەرلان قاليەۆ ارنايى باردى. ول جەرگىلىكتى پروكوراتۋرا وكىلدەرىمەن بىرلەسە وتىرىپ ءىس-قيمىل جاساۋعا كوميسسيا اتىنان كىرىسىپ كەتتى», دەيدى كوميسسيانىڭ قۇرىلۋىنا مۇرىندىق بولعان زاڭگەر ابزال قۇسپان.
كوپتەگەن جەلى قولدانۋشىلارى ءوز جازبالارىندا تەرگەۋ-تەكسەرۋ جۇمىستارىنىڭ ءادىل ءارى اشىق ءوتۋىن سۇراعان. بىرقاتار ساراپشىلار دا بۇل پىكىردى قۋاتتاپ «ايران ىشكەن قۇتىلىپ, ءتۇبىن جالاعاندار تۇتىلماسا» دەيدى. كوميسسيا مۇشەلەرى وسى سارىنداس حاتتار مەن ءوتىنىش-تىلەكتەردىڭ ءالى دە كوپتەپ كەلىپ جاتقانىن اتاپ ءوتتى.
– تاپ قازىرگى كەزدە قاڭتار وقيعاسىنا بايلانىستى قاماۋدا وتىرعان ايەل ادامداردى, ون سەگىزگە تولماعان جاس بالالاردى جانە جاراقات العان-الماعانىنا قاراماستان قولىنا قارۋ ۇستاپ قالانى تالقانداماعان, توناۋ مەن ۇرلىققا قاتىسپاعان, ەشكىمدى ۇرىپ-سوقپاعان, الايدا ءوز ازاماتتىق ءۇنىن ءبىلدىرىپ بەيبىت شەرۋگە شىققانداردى بوساتۋدى سۇراعىمىز كەلەدى. ولاردان قوعامعا ەشقانداي قاۋىپ جوق. ولار اككى قىلمىسكەرلەر ەمەس. ەڭ قۇرىعاندا تەرگەۋ اياقتالعانعا دەيىن ولاردى قوعامعا قاۋىپسىز دەپ ساناپ, قاماۋدان ەشقايدا كەتپەۋ تۋرالى قولحاتقا اۋىستىرۋىن سۇرايمىز. جالعىز الماتىدا عانا ەمەس, بارلىق وڭىرلەردە وسىنداي جاعدايلار ورىن العانىنا كوزىمىز جەتىپ وتىر. قۇقىق قورعاۋ ورگاندارىنا, پروكوراتۋراعا وسىنداي ماسەلە قويىپ وتىرمىز. ابىر-سابىر كەزىندە ءتۇرلى جاعدايلار ورىن الۋى بەك مۇمكىن. وقيعا ورىن العان ماڭنان ءوتىپ بارا جاتىپ كەزدەيسوق قولعا تۇسكەندەر دە تابىلىپ جاتىر. ولاردىڭ جازىقسىز جاپا شەكپەۋى, قوساق اراسىندا كەتىپ قالماۋى, وتباسىنا امان-ساۋ ورالۋى ماڭىزدى. وسى تۇستا تاعى ءبىر توقتالا كەتەر جاي, «امانات» قوعامدىق كوميسسياسىنىڭ اتىن جامىلىپ تەرگەۋ يزولياتورىنا ءبىر توپ ادامنىڭ كەلگەنى جونىندە حابار كەلدى. ولار قاماۋدا وتىرعانداردىڭ تۋىستارىمەن كەزدەسكەن كورىنەدى. ول ازاماتتار بۇل ارەكەتتەردى قانداي پيعىلمەن جاساپ وتىرعانى بىزگە بەيمالىم. الايدا ءبىز ازاماتتاردى ساقتاندىرعىمىز كەلەدى. وسىنداي قيىن-قىستاۋ ءساتتى پايدالانىپ, ءوزىنىڭ باس پايداسىن كۇيتتەپ كەتەتىندەر تابىلۋى مۇمكىن. سول سەبەپتى «امانات» قوعامدىق كوميسسياسىنىڭ جۇمىسى تەگىن ەكەنىن حابارلايمىز, – دەيدى ادۆوكات ءمادي مىرزاعاراەۆ.
قوعام تاراپىنان قاڭتار وقيعالارى كەزىندە ۇستالعاندارعا قىسىم جاسالىپ جاتىر دەگەن سارىنداعى ۇنقاتۋلار جيىلەگەن تۇستا مەملەكەت باسشىسى اتالعان جايعا قاتىستى پىكىر ءبىلدىرىپ, «باس پروكۋراتۋراعا باسقا ادامداردىڭ كىناسى قانداي دارەجەدە ەكەنىن انىقتاۋدى تاپسىرامىن. جاۋاپتىلىقتى اۋىرلاتاتىن ءمان-جاي بولماسا جازانى جەڭىلدەتۋ ءۇشىن شارا قابىلداعان ءجون», دەپ مالىمدەمە جاساعان بولاتىن.
زاڭگەرلەر ءبىر عانا الماتى قالاسىنىڭ وزىندە بۇگىنگە دەيىن قىلمىستىق ىسكە تارتىلعان 200 اداممەن جۇزدەسىپ, ۇستالعانداردىڭ ءىس-ماتەريالىمەن تانىسقاندارىن جەتكىزدى. كوميسسيانىڭ قۇرىلعانىنا نەبارى اپتا تولعانىن ەسكەرسەك, قۇقىقتىق كومەك كورسەتۋ ءالى دە جالعاسا بەرمەك.
