ول ءداۋىر حالىقتار دوستىعىنا ەرەكشە كوڭىل ءبولىنىپ, كوركەم اۋدارما قولعا الىنىپ, ادەبيەتتەگى يدەيالار ارقىلى ادامزاتتىق اقىل-وي قوزعالىسى الابوتەن العا جىلجىپ, ناتيجەسىن كورسەتكەن كەزەڭ بولدى. سوندا ءساتى ءتۇسىپ, مۇحتار اۋەزوۆ 1955 جىلى العاش رەت, 1961 جىلى ەكىنشى رەت ۇندىستانعا, 1956 جىلى چەحوسلوۆاكياعا, 1957 جىلى جاپونياعا, 1958 جىلى گەرمانياعا, 1960 جىلى امەريكاعا ساپار شەككەن ەدى. سول ۋاقىتتا ءار مەملەكەتتەن جازىلعان جولجازبالار وزگە تىلدەرگە, ءتىپتى ورىس تىلىنە اۋدارىلماي جازۋشى مۇراعاتىندا مۇرتى بۇزىلماي جارتى عاسىردان استام ۋاقىت جاتتى. كەيىن سۋرەتكەردىڭ 100 جىلدىق مەرەيتويىنا وراي شىعارىلعان ەلۋتومدىق تولىق جيناعىنىڭ 38-ءشى تومىندا تولىق ءماتىنى العاش رەت قازاق وقىرماندارىنا جول تارتقان بولاتىن.
سونىڭ ءبىرى «امەريكا اسەرلەرى» اۋەزوۆتىڭ بيىلعى – 125 جىلدىعىنا وراي قازاقستانداعى امەريكا ەلشىلىگىنىڭ قولداۋىمەن العاش رەت اعىلشىن تىلىنە اۋدارىلىپ, الەمدىك رۋحانياتقا جول تارتتى. امەريكا ەلشىلىگىنىڭ باستاماسىمەن جارىق كورگەن بۇل جيناققا م.و.اۋەزوۆ اتىنداعى ادەبيەت جانە ونەر ينستيتۋتى «اۋەزوۆ ءۇيى» عمو-نىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور گۇلزيا ءپىرالى مەن وسى ورتالىق ديرەكتورى, فيلولوگيا عىلىمدارىنىڭ كانديداتى ديار قوناەۆتىڭ «امەريكا-قازاق جازۋشىسىنىڭ كوزىمەن» اتتى عىلىمي زەرتتەۋ ەڭبەگى, جازۋشىمەن ساپارلاس بولعان ۋكراين جازۋشىسى ولەس گونچاردىڭ «جارىق جۇلدىز» ەستەلىگى ءھام مۇحتار اۋەزوۆتىڭ «امەريكا ساپارى» مەن «امەريكا اسەرلەرى» اتتى ساپارنامالارى, «مارشرۋت جانە مەرزىم» اتتى جازۋشى ءجۇرىپ وتكەن جول ىزىمەن تۇسىرىلگەن جازبا-كارتا جاريالانعان. ايتا كەتەيىك, بۇل ەڭبەكتەر ەكى تىلدە بەرىلىپ وتىر.
سۋرەتكەردىڭ ءار جازۋىنان انىق سەزىلەتىن «مىڭ بوياۋدىڭ توي-توعىسى» «امەريكا اسەرلەرىندە» دە بايقالادى. اۆتور بوتەن ەلدەگى كورگەندەرى مەن كوكەيىنە تۇيگەن جاقسى اسەرلەرى, كۇندەلىگىنە جازىلعان شتريحتار, قيالعا قانات بىتىرگەن عاجايىپ كورىنىستەر, كەزدەسىپ, سۇحباتتاسقان جاندارمەن بولعان جۇرەكجاردى اڭگىمەلەر, ول ەلدىڭ بىزگە بەيمالىم جۇمباق ومىرلەرى مەن تاريحى, مادەنيەتى مەن ادەبيەتى تۋراسىندا تولعانادى. جازۋشىنىڭ ناۋقاستانۋىنا بايلانىستى جولجازبانىڭ ەكىنشى ءبولىمى جازىلماي قالعان. ال ءبىرىنشى ءبولىمى العاش رەت «سوتسياليستىك قازاقستاندا» 1960 جىلى 24 ءساۋىر كۇنى جاريالاندى.
جاڭا جيناقتى اعىلشىن تىلىنە اۋدارعان ءارى العىسوز اۆتورى دەننيس كين: «...قازاق دالاسى تۋرالى تاريحي ادەبيەتىندەگى ەگجەي-تەگجەيگە ەنتسيكلوپەديالىق نازار اۋدارۋمەن تانىمال جازۋشى ديسنەيلەند ساپارلارىن مۇقيات جازىپ, بولاشاقتا ديسنەي زەرتتەۋشىلەرى ءۇشىن رەسۋرس بولا الاتىن جازبالار جاسادى. بۇل جازۋشىنىڭ كەز كەلگەن باقىلاۋىنا, قىزىعۋشىلىعىنا جانە يمپۋلسىنە تۇسىنىكسىز كوزقاراس بولعاندىقتان, «امەريكا ساپارى» بۇل جاريالانىمداعى ەڭ قىزىقتى قۇجات بولۋى مۇمكىن. ول مۇندا العاش رەت اعىلشىن تىلىندە شىعادى», دەپ اتاپ وتەدى.
اۋەزوۆتىڭ ءوز كوزىمەن كورىپ, كوكەيىنە تۇيگەن سول كەزەڭنىڭ قوعامدىق, ساياسي, رۋحاني احۋالدارى, الەمدىك وركەنيەتتە وزىندىك ورنى بار بىرنەشە الىپ مەملەكەتتەر اراسىنداعى مادەني, عىلىمي, ادەبي ديالوگتەردىڭ بولۋىنا تىكەلەي تۇرتكى بولىپ, حالىقتار دوستىعىنا دانەكەرلىك ەتكەن ساپارلارى جايلى جازۋشىلىق پىكىر-پايىمدارى وقىرمان ءۇشىن تىڭ تاقىرىپ. اۋەزوۆ كورگەن امەريكا بۇگىندە سان قۇبىلىپ, وزگەرسە دە سول ۋاقىتتاعى جازۋشىلىق اسەرلەردىڭ وزىندىك ءبىر شىنايىلىعى بارداي.
