ەلەكتروندى قىزمەت قوعام يگىلىگىنە

كەشە ورتالىق كوممۋنيكاتسيالار قىزمەتىندە «زەردە» ۇلتتىق اقپاراتتىق-كوممۋنيكاتسيالىق حولدينگى» اق-تىڭ باسقارما توراعاسى ميربولات ايۋپوۆ ءباسپاسوز ءماسليحاتىن وتكىزدى. ول ەلىمىزدە اقپاراتتىق-كوممۋنيكاتسيالىق تەحنولوگيالار مەن وسى سالاداعى نارىقتى دامىتۋ تۋرالى اڭگىمەلەدى. اتالعان حولدينگ ەلىمىزدە ەلەك­ترون­دىق مەملەكەتتىك قىزمەتتەردى دا­مىتۋ سالاسىنداعى وپەراتور ەكەنى ءمالىم. سوندىقتان, مەملەكەت باسشىسى نۇر­سۇلتان نازارباەۆتىڭ بيىلعى جولداۋىنا وراي حولدينگتە قابىلدانعان نەگىزگى شارالار جونىندە ءسوز بولدى. «ەلباسى جولداۋىندا ايقىنداعان نەگىزگى مىندەتتەردىڭ ءبىرى – ەكونوميكانى يندۋس­تريالاندىرۋ جانە يننوۆاتسيالاندىرۋ نەگىزىندە قۇرۋ قاجەت ەكەندىگى تۋرا­لى ۇندەۋ بولدى», دەپ باستادى ءسوزىن باس­قارما توراعاسى. ونىڭ سوزىنە قارا­عاندا, بۇگىنگى تاڭدا اقىلدى ەكونوميكا­نى اقپاراتتىق-كوممۋنيكاتسيالىق تەحنولوگيالار سالاسىن دامىتۋسىز قۇرۋ مۇمكىن ەمەس. سوندىقتان, بىلتىر «اق­پاراتتى قازاقستان-2020» مەم­لەكەت­تىك باع­دارلاماسى جاسالىپ, قابىل­دانعان ەكەن. ودان بەرى ءبىرتالاي جۇمىس اتقارىلعان. بۇل باعدارلامانىڭ باستى ماقسا­تى – ­اق­پا­راتتى قوعامعا ءوتۋ ءۇشىن قاجەتتى شارتتار جاساۋ. سەبەبى, ءومىردىڭ بارلىق سالاسىنا اقپاراتتىق-كوممۋنيكاتسيالىق تەحنولوگيالاردى ەنگىزۋ زاماناۋي شىنايىلىقتىڭ اجىراماس بولىگىنە اينالىپ ۇلگەرگەن. اتالعان باعدارلامانىڭ سالاداعى الدىڭعىلارىنان ۇلكەن ايىر­ماشىلىعى بار. وندا ەلدەگى اقپاراتتىق-كوممۋنيكاتسيالىق ينفراقۇرىلىمنىڭ بارىنە تولىق قولجەتىمدىلىكتى قامتاماسىز ەتۋدەن باستاپ, قوعامنىڭ الەۋمەتتىك-ەكونوميكالىق جانە مادەني دامۋى ءۇشىن اقپاراتتىق ورتا قۇرىپ, قالىپتاستىرۋعا دەيىن قامتىلعان. قازاقستاندا سوڭعى جىلدارى ەلەكتروندى ساۋدا سالاسىنىڭ قارقىندى دامىپ كەلە جاتقانى دا نازاردان تىس قالمادى. «ەلەكتروندى ساۋدانىڭ دامۋى – ول قوعام دامۋىنىڭ كورسەتكىشتەرىنىڭ ءبىرى. وسى جولدا ينفراقۇرىلىمدى, مالىمەتتەر بەرۋدىڭ ينفراقۇرىلىمىن دامىتۋ قاجەت. ال بۇل ماسەلە قازاقستاندا تولىقتاي شەشىلگەن. سونداي-اق, كون­تەنت­تىڭ, سەرۆيستىڭ پايدا بولۋى دا ماڭىزدى مىندەتتەردىڭ ءبىرى», دەدى م.ايۋپوۆ. ول مامىر ايىندا حولدينگ ەلەكتروندى ساۋدا تاقىرىبىنا ارنالعان «استەكس-2014» حالىقارالىق كورمە-كونفەرەنتسياسىن وتكىزگەلى وتىرعانىن دا ايتتى. «ەلەكتروندى ساۋدا قازىر قا­زاقستاندا وتە ۇلكەن قارقىنمەن دامىپ كەلەدى. جاڭا يندۋستريا رەتىندە ول نەگىزگى سەرۆيستەر بويىنشا دامۋ ۇستىندە. قازىردىڭ وزىندە «ەير استانا», «قازكوم» سىندى ەلەكتروندى ساۋدا نارىعىندا كوشباسشىلار دا پايدا بولدى», دەدى حولدينگ توراعاسىنىڭ ورىنباسارى ب.قۇرمانعاليەۆا. بريفينگتە سالاعا قاتىستى زاڭ تۋرالى دا اڭگىمە بولدى. «زاڭنامالىق بازا ءاربىر سالانىڭ دامۋى ءۇشىن نەگىز بولاتىنى بەلگىلى. سول سياقتى, ەلەكتروندى ساۋداعا قاتىستى زاڭ جوباسى قازىر تولىق دايىن جانە الداعى ۋاقىتتا ۇكىمەتكە جولدانادى. زاڭ جوباسىن ازىرلەۋگە بارلىق ينتەرنەت-قاۋىمداستىق قاتىستى دەۋگە بولادى. ولار وزدەرىنىڭ مۇددەلەرى مەن قۇقىقتارىن تالاپ ەتىپ, ونىڭ قۇجاتتا قاراستىرىلۋىنا قول جەتكىزدى. مىسالى, ەلەكتروندى شوت-فاكتۋرانىڭ ەنگىزىلۋى دە ۇلكەن جەتىستىك بولىپ تابىلادى», دەدى ءتيىستى زاڭعا قاتىستى سۇراققا جاۋاپ بەرگەن باسقارما توراعاسى. ءسوز قورىتىندىسىندا حولدينگ جەتەكشىسى ەلەكتروندى قىزمەت ەلىمىزدە ىركىلىسسىز دامي بەرەتىنىن ايتىپ, قوعام يگىلىگى ءۇشىن كۇن ساناپ قۇزىرەتىن كەڭەيتە بەرەتىنىنە توقتالدى. نۇرباي ەلمۇراتوۆ, «ەگەمەن قازاقستان».