زاعيپ ادام سەزۋمەن, ويشا ەلەستەتۋمەن, سيۋجەتپەن ءومىر سۇرەدى. ولار ءبارىن ساناسىندا قالىپتاستىرادى, ياعني سيۋجەت قۇراستىرادى. سوندىقتان دا زاعيپ ادامدارعا كوركەم شىعارما وقۋدىڭ سەپتىگى كوپ. قاعاز بەتىندەگى نۇكتەلەردىڭ ىزىمەن ءجۇرىپ وتىرىپ, قاي كەيىپكەردىڭ قانداي كۇي كەشىپ, وقيعانىڭ قالاي ورىلگەنىن «وقۋ» – وڭاي ءىس ەمەس. الايدا جانارىنان ايىرىلىپ, ءومىردى ساۋساق ۇشىمەن تانيتىن تاعدىرلى جانداردىڭ قاجەتىنە جارارلىق قازاقتىلدى اۋديتورياعا ارنالعان بەدەرلى-نۇكتەلى قارىپتى كىتاپتاردىڭ جوقتىعى الاڭداتا-
دى.
سوقىرلىقتىڭ الدىن الۋ جونىندەگى حالىقارالىق اگەنتتىكتىڭ مالىمەتىنشە, بۇگىنگى تاڭدا دۇنيە جۇزىندە 284 ملن ادامنىڭ كورۋ قابىلەتى ناشارلاعان. ونىڭ ىشىندە 39 ملن-نان اسا ادام مۇلدەم كورمەيدى. 19 ملن بالا ءتۇرلى كوز
اۋرۋىنا شالدىققان. عالىمداردىڭ زەرتتەۋىنشە, الەمدەگى وسى ەسەپ 2050 جىلعا قاراي 115 ملن-عا جەتۋى مۇمكىن. وعان, ارينە, تاۋلىكتىڭ كوپ ۋاقىتىن جۇمسايتىن سمارتفون-پلانشەتتەر سەبەپ. ال قازاقستاندا 86 مىڭ زاعيپ ادام بار. ونىڭ ىشىندە ناشار كورەتىن بالالار –
7 934 بولسا, 320 بالا مۇلدەم كور-
مەيدى.
...ءالى كۇنگە دەيىن وقۋلىق ازىرلەنبەگەن
ەلىمىزدە كوزى ناشار كورەتىن جانە كورمەيتىن بالالارعا ارنالعان 8 بالاباقشا جۇمىس ىستەيدى. وندا 828 بالا, جالپى, ءبىلىم بەرەتىن بالاباقشالاردىڭ ارنايى توپتارىندا 451, ال ينكليۋزيۆتى ءبىلىم بەرۋ جاعدايى بار بالاباقشالاردا 2 970 بالا تاربيەلەنۋدە. سونداي-اق زاعيپ بالالارعا ارنالعان 11 ارنايى مەكتەپتە 1 513 بالا ءبىلىم الۋدا (ال جالپى ءبىلىم بەرەتىن مەكتەپتەردە 199 بالا وقيدى).
بۇگىندە مۇمكىندىگى شەكتەۋلى بالالارعا وقۋلىق دايىندايتىن جالعىز مەكەمە – «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق-عىلىمي پراكتيكالىق ورتالىعى» بولىپ وتىر. ورتالىقتىڭ عىلىمي-زەرتتەۋ بولىمىندە ادىستەمەلىك قۇرالدار, وقۋ باعدارلامالارى, ارنايى وقۋلىقتار, ءبىلىم جانە عىلىم مينيسترلىگى اتقارىپ جاتقان نورماتيۆتىك قۇقىقتىق اكتىلەر بويىنشا جۇمىستار دايىندالادى. ونىڭ ىشىندە كوزى ناشار كورەتىن جانە مۇلدەم كورمەيتىن بالالارعا ارنالعان وقۋلىقتار دا بار. زاعيپ بالالارعا برايل قارپىمەن, ال ناشار كورەتىندەرگە ۇلكەيتىلگەن شريفتپەن ازىرلەنەدى.
اتالعان ورتالىقتىڭ باسشىسى ايگەرىم كۇدەرينوۆا برايل جۇيەسىندە كەي سىنىپتارعا ءالى وقۋلىق ازىرلەنبەگەنىن اتاپ ءوتتى.
«بۇل وقۋلىقتار جالپى ءبىلىم بەرەتىن مەكتەپتەرگە ارنالعان وقۋلىقتاردىڭ باعدارلاماسىنا سايكەس ازىرلەنەدى. ماسەلەن, بۇعان دەيىن برايل قارپىمەن 54, ۇلكەيتىلگەن شريفتپەن 63 وقۋلىق دايىندالدى. الايدا مۇلدەم كورمەيتىن بالالارعا ارنالعان 1-12-سىنىپ وقۋلىقتارى ءالى تولىق ازىرلەنگەن جوق. الداعى ۋاقىتتا 4, 6, 11, 12-سىنىپتارعا ارنالعان برايل قارپىندەگى وقۋلىقتار ازىرلەۋدى جوسپارلاپ وتىرمىز. ال قالعان سىنىپتاردا بار. وقۋلىعى جوق سىنىپتار برايل قارپىنە ارنالعان پرينتەر ارقىلى دايىندالعان ماتەريالداردى شىعارىپ وقيدى», دەيدى مەكەمە باسشىسى.
بۇل ورتالىق كىتاپتاردى باسىپ شىعارمايدى, تەك وقۋلىق قۇراستىرادى. ازىرلەنگەن وقۋلىقتاردى ەلورداداعى «وقۋلىق» ورتالىعى قابىلداپ, ءبىلىم جانە عىلىم مينيسترلىگىنىڭ قاراۋىنا ۇسىنادى. ماقۇلدانعان سوڭ جەرگىلىكتى اتقارۋشى ورگاندار وزدەرى كونكۋرس جاريالاپ, وقۋلىقتاردى باسپالاردان ساتىپ الادى. ماسەلەن, سونىڭ ءبىرى «ساتر ورتالىعى» باسىپ شىعارىپ, مەكتەپتەرگە جەتكىزەدى. «وقۋلىق» ورتالىعى باسشىسىنىڭ ايتۋىنشا, قازىرگى تاڭدا مەكتەپ-ينتەرناتتاردا وقۋلىق جەتىسپەۋشىلىگى جوق. سونداي-اق زاعيپ وقۋشىلاردىڭ وقۋلىقپەن قامتاماسىز ەتىلۋىن تەك جەرگىلىكتى اتقارۋشى ورگان مەن مەكتەپتەر عانا قاداعالاي الادى. ياعني وقۋلىقتاردى جەتكىزۋ ورتالىقتىڭ مىندەتىنە جاتپايدى.
ايتا كەتەيىك, اتالعان ورتالىق زاعيپ بالالارعا ارنالعان وقۋلىقتاردى 2017 جىلدان باستاپ دايىنداپ كەلەدى. ياعني وعان دەيىن – تاۋەلسىزدىك جىلدارىنان بەرى مۇنداي وقۋلىقتار مۇلدەم جاسالماعان.
«جالپى ءبىلىم بەرەتىن مەكتەپتەرگە وقۋلىقتاردى باسپالار دايىندايدى. ياعني وندا باسەكەلەستىك بولۋى كەرەك. بىراق قانشاما جىل بويى سول باسپالارعا زاعيپ جاندارعا ارنالعان كىتاپتار شىعارۋ تۋرالى ۇسىنىستار ايتىلسا دا قولعا الىنبادى. ويتكەنى مۇلدەم كورمەيتىن وقۋشىلار كوپ بولماعان سوڭ, جەكەمەنشىك باسپالارعا از دانامەن كىتاپ شىعارعان ءتيىمسىز. نەگىزىنەن, مەكتەپ جاسىنداعى زاعيپ بالالارعا جاسالىپ جاتقان جاعداي جامان ەمەس دەپ ايتۋعا بولادى. مەكتەپتەرى بار, وقۋلىقتارى دايىندالادى. ال مەكتەپتى بىتىرگەننەن كەيىنگى ومىردە كوپتەگەن ماسەلە تۋىندايدى», دەيدى ءا.كۇدەرينوۆا.
ال الماتى قالاسىنداعى ن.وستروۆسكي اتىنداعى زاعيپ جانە كوزى ناشار كورەتىن بالالارعا ارنالعان №4 مەكتەپ-ينتەرناتى ديرەكتورىنىڭ وقۋ-ءىسى جونىندەگى ورىنباسارى باقىتگۇل ءجۇمادىلوۆا مينيسترلىك بەكىتكەن باعدارلامانىڭ ءجيى اۋىسۋىنان زاعيپ بالالاردىڭ باعدارلاماعا ۇلگەرمەيتىنىن ايتادى.
«برايل جۇيەسىندەگى وقۋلىق دايىنداۋدىڭ جۇمىسى وتە اۋىر. ماسەلەن, كىتاپتا جاز, كۇز بەينەسى بولسا, ونى نۇكتەلى-بەدەرلى تۇرگە اينالدىرۋ مۇمكىن ەمەس. اينالدىرۋعا بولادى, بىراق ونى وقۋشى تۇسىنبەيدى. سوندىقتان ول سۋرەتتى اۋىستىرۋ كەرەك. سۋرەتتىڭ رەلەفىمەن ءجۇرىپ وتىرعاندا قانداي سۋرەت بەرىلگەنىن بالا ءتۇسىنىپ وتىرۋى قاجەت. ودان بولەك كەيبىر سۇراقتاردىڭ ءماتىنى ۇزاق بولادى. قولمەن ۇستاپ وقىعان بالا ول سۇراقتىڭ باسىن ۇمىتىپ قالادى. سول ءۇشىن دە ءماتىن بارىنشا قىسقا جاسالادى. ياعني وقۋلىقتى برايل نۇسقاسىنا اۋىستىرۋ – قايتا جازىپ شىققانمەن بىردەي.
ماسەلەن, ءبىر كىتاپ دايىنداۋعا ءۇش جىل ۋاقىت كەتەدى. ايتالىق, 2017 جىلى باستالعان وقۋلىقتاردى 2020 جىلى قولعا الدىق. وسى ارالىقتا باستاۋىش سىنىپتىڭ باعدارلاماسى اۋىسىپ ۇلگەردى. ءبىزدىڭ بۇرىنعى باعدارلاماداعى «ساۋات اشۋ» دايىن بولعانشا, ء«الىپبي» قوسىلدى. ارينە, ءبىز ەسكى باعدارلاماداعى «جاڭا وقۋلىقپەن» وقىتا المايمىز. ال ء«الىپبيدىڭ» زاعيپ بالالارعا ارنالعان نۇسقاسى جوق. ياعني بىزگە كىتاپ جاساپ ۇلگەرمەيدى», دەيدى ول.
مەكتەپ-ينتەرنات وكىلى نەگىزگى ماسەلەنىڭ جوعارى سىنىپقا ارنالعان وقۋلىقتاردىڭ جوقتىعىندا ەكەنىن دە ايتتى. قازاق ءتىلى, ماتەماتيكا, ورىس ءتىلى پاندەرىنىڭ وقۋلىقتارى بار بولسا, ال فيزيكا, گەوگرافيا, بيولوگيا, حيميا, ت.ب. ساباقتاردىڭ كىتاپتارى دايىندالماعان.
«بىزدە زاعيپتارعا ارنالعان وقۋلىقتى دا, ارنايى ادەبيەتتى دە دايىندايتىن جالعىز مونوپوليالىق مەكەمە – ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق-عىلىمي پراكتيكالىق ورتالىعى. ەگەر ودان بولەك, باسقا دا باسپالار تاپسىرىس بويىنشا وقۋعا قاجەتتى ماتەريالداردى شىعارىپ بەرەتىن بولسا, ءبىز ساتىپ الار ەدىك. بىراق بىزدە ونداي مۇمكىندىك جوق. بىزگە نە بەرەدى – سونى الامىز. وقۋلىقتاردىڭ جەتىسپەۋشىلىگىنە مەكتەپ قاۋقارسىز», دەدى ب.ءجۇمادىلوۆا.
زاعيپ جاندارعا ارنالعان كىتاپتاردىڭ جاسالماۋىنىڭ ءبىر سەبەبى – كادر تاپشىلىعى ەكەنى دە انىق. ماسەلەن, اتالعان ورتالىق 2017 جىلى وقۋلىقتار دايىنداۋدى باستاعان كەزدە رەسەيدەن ارنايى ماماندار شاقىرىپ, قاتىسۋشى اۆتورلارعا قالاي جاسالاتىنىن ۇيرەتكەن ەدى. ونىڭ ۇستىنە برايل نۇسقاسىنا اۋىسقان كىتاپتاردىڭ باعاسى دا ءسىز ويلاعانداي ارزان ەمەس.
مەكتەپ-ينتەرنات وكىلىنىڭ ايتۋىنشا, وقۋشىنىڭ ءبىر ماتەماتيكاسى 17 كىتاپتان تۇرادى. ال ورىس ءتىلى 12-13 كىتاپتان, جوعارى سىنىپتاردا دا الگەبرا وقۋلىعى 12-15, گەومەترياسى كەم دەگەندە 10 كىتاپتان تۇرادى. سوندا ءبىر وقۋلىقتىڭ باعاسى 350-400 مىڭعا اينالادى. ۇلكەيتىلگەن شريفت بويىنشا وقۋلىقتاردىڭ ءوزى دە 4-5 دانادان تۇرادى.
توقسان جىلدىق تاريحى بار مەكتەپ-ينتەرناتتا بۇگىندە 247 بالا وقيدى. ب.ءجۇمادىلوۆانىڭ ايتۋىنشا, مەكتەپ-ينتەرناتتاعى بالالار دا قوعامداعى باسقا ساۋ بالالار سەكىلدى كوركەم ادەبيەتتى كوپ وقىمايدى. نەگىزىنەن, اۋديو-نۇسقامەن تىڭدايدى (وندا دا قازاق شىعارمالارىنىڭ كوبىسى اۋديو نۇسقاعا تۇسىرىلمەگەن). وقۋلىق تاپشىلىعىنان بولەك كىتاپحانادا دا سول احۋال: برايل قارپىندە كازاق تىلىندە ەشقانداي كوركەم ادەبيەت جوق. ال ورىس تىلىندەگى ەرتەگىلەر مەن وقۋ ۇردىسىنە ساي كوركەم شىعارمالاردى 2020 جىلى «ەما» قوعامدىق قورى 38 ميلليونعا رەسەيدەن تاپسىرىس بەرىپ, قامتاماسىز ەتكەن. بۇل ارينە, رەسپۋبليكاداعى بارشا زاعيپ بالالارعا ورتاق ماسەلە.
كىتابى جوق كىتاپحانا
زاعيپ جانداردىڭ ءبىلىم نارىمەن سۋسىندايتىن جالعىز ورنى – ارناۋلى كىتاپحانالار عانا. ونىڭ ءوزى شالعاي اۋىل-اۋدانداردا قامتىلماعان, تەك وبلىس ورتالىقتارىندا جۇمىس جاسايدى. ال بار كىتاپحانانىڭ بىرىندە قازاق تىلىندەگى كىتاپ تاپشى بولسا, بىرىندە تەحنيكالىق جابدىقتار جوق. القيسسا.
قازىر ەلىمىزدە وسى ساناتتاعى جاندارعا ارنالعان 1 رەسپۋبليكالىق, 7 وبلىستىق, 4 قالالىق ارنايى كىتاپحانا جانە 5 ءبولىم قىزمەت كورسەتەدى. رەسپۋبليكا بويىنشا ارنايى كىتاپحانالارعا سوڭعى جىلدارى تىركەلگەن جانارى ءالسىز وقىرماندار سانى – 18 128, زاعيپ وقىرماندار سانى – 13 545.
الماتى قالاسىنداعى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانانىڭ كىتاپ قورى – 249 950 (اتاۋى – 70 468), ونىڭ ىشىندە قازاق تىلىندە – 33 969 دانانى (اتاۋى – 10 836) قۇرايدى. ال نۇكتەلى-بەدەرلى قارىپتەگى ادەبيەتتەر – 55 515 دانا (اتاۋى – 6 623) , ونىڭ ىشىندە قازاق تىلىندە – 1 885 (اتاۋى – 218). بۇدان بولەك, كىتاپحانا قورىندا نۇكتەلى-بەدەرلى قارىپتەگى جۋرنالدار, دىبىستاندىرىلعان ادەبيەتتەر, بەدەرلى-گرافيكالىق قۇرالدار,ەلەكتروندى رەسۋرستارداعى باسىلىمدار, ت.ب. ماتەريالدار بار.
كىتاپ قورى سوڭعى كەزدە مەملەكەتتىك تاپسىرىس بويىنشا تولىقتىرىلىپ كەلەدى. ماسەلەن, 2021 جىلى كىتاپحانا قورىندا 784 اتاۋمەن 1 928 دانا باسىلىم تىركەلگەن. ودان بولەك مەملەكەتتىك ساتىپ الۋ بويىنشا جانە كىتاپحاناعا ءارتۇرلى ۇيىمدار مەن وقىرماندار سىيعا بەرگەن كىتاپتارمەن تولىعادى. 2021 جىلى مەملەكەتتىك تاپسىرىس بويىنشا – 140 دانا (قازاق تىلىندە – 125), مەملەكەتتىك ساتىپ الۋ بويىنشا – 478 دانا (قازاق تىلىندە – 196), سىيعا بەرىلگەن كىتاپتار – 199 دانا (قازاق تىلىندە – 91), كىتاپحانانىڭ «سويلەيتىن» جانە برايل كىتاپتارىن شىعارۋ بولىمىنەن 246 دانا (قازاق تىلىندە – 173) كىتاپ الىندى. كىتاپحانا وكىلىنىڭ ايتۋىنشا, مەملەكەتتىك تاپسىرىس بويىنشا كىتاپتار وتاندىق «فوليانت» باسپاسى جشس, «ناتسيونالنايا اكادەميا ناۋك ۆىسشەي شكولى كازاحستانا» نان ۆشك – ءال-فارابي اتىنداعى قازاق ۋنيۆەرسيتەتى باسپاحانالارىنان جانە رەسەيدىڭ يپتك «لوگوس ۆوس», ميپو رەپرو باسپاحانالارىنان كەلەدى.
ال وقىرمان سانىنا كەلسەك, بۇگىندە ارنايى كىتاپحانا قىزمەتىن 2 500-گە جۋىق كوزى ناشار كورەتىن ءھام مۇلدەم كورمەيتىن ازامات قولدانادى. كىتاپحاناشىلاردىڭ ايتۋىنشا, وقىرماندار ءتۇرلى جانرداعى ادەبيەتتەرگە قىزىعادى. نەگىزىنەن كوركەم ادەبيەت, ونىڭ ىشىندە دەتەكتيۆ, فانتاستيكا, تاريحي جانە ماحاببات روماندارى ەرەكشە سۇرانىستا. اباي, م.اۋەزوۆ, ءى.ەسەنبەرلين, ا.مارينينا, ب.اكۋنين, ا.بۋشكوۆ, س.شەلدون, ا.ديۋما, دج.چەيزدى كەلۋشىلەر ءجيى وقيدى.
ايتا كەتەيىك, حاكىم ابايدىڭ 175 جىلدىق مەرەيتويى قارساڭىندا كىتاپحانانىڭ «سويلەيتىن» جانە برايل كىتاپتارىن شىعارۋ بولىمىندە «دۇنيەدە ءسىرا, سەندەي جار جوق ماعان» اتتى دىبىستاندىرىلعان كىتابى مر3 فورماتتا, نۇكتەلى-بەدەرلى برايل قارپىندە ەكى تومدىق شىعارمالارىنىڭ 2-ءشى تومى «اباي» (ولەڭدەر, اۋدارمالار, پوەمالار), م.اۋەزوۆتىڭ «اباي جولى» رومان-ەپوپەياسىنىڭ 3-تومى (قازاق جانە ورىس تىلدەرىندە) جارىققا شىقتى.
كىتاپحانا ومىرىندە كۇرمەۋلى ماسەلەلەر دە جوق ەمەس. ايتالىق, تەحنيكالىق جابدىقتاردى جاڭارتۋ, كىتاپ قورىن جىل سايىن جاڭا كىتاپتارمەن تولىقتىرۋدى قامتاماسىز ەتۋ, سونداي-اق رەسەي ەلىنەن تاپسىرىسپەن الىناتىن ادەبيەتتەر, مەرزىمدى باسىلىمداردىڭ ساپاسى سىن كوتەرمەي, قايتا وقۋعا ءجيى جارامسىز بولىپ قالاتىنى دا راس.
زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا باسشىسى اسحات بايۇزاقوۆ قازاقتىلدى كىتاپتاردىڭ تاپشىلىعى ارنايى باسپاحانانىڭ جوقتىعىنان دەيدى.
«كىتاپحاناداعى كىتاپ قورى, نەگىزىنەن كەڭەس كەزىنەن قالعان كىتاپتاردان تۇرادى. تاۋەلسىزدىك جىلدارىنان بەرى كىتاپ قورى, اسىرەسە قازاقتىلدى كىتاپتار تىم از كولەمدە تولىقتىرىلدى. كەڭەس ۋاقىتىندا الماتى قالاسىنداعى زاعيپتار قوعامىنىڭ ارنايى باسپاحاناسى بولدى. كەيىن جەكەشەلەندىرۋ ناۋقانىنا باسپاحانانىڭ عيماراتى دا ىلىكتى. سودان بەرى زاعيپ جاندارعا ارنالعان ارنايى كىتاپحانالارعا قازاقتىلدى كىتاپتار باسىلىپ شىعارىلعان جوق. قازىرگى تاڭدا كىشىگىرىم باسپاحانالار بار. ولار جىلىنا تەك 15-20 كىتاپ باسۋعا قاۋقارلى. الايدا بۇل باسپاحانالاردىڭ كىتاپ ساپاسى تومەن. ياعني قاتتى مۇقابامەن ەمەس, جۇقا مۇقابامەن عانا شىعارادى», دەدى كىتاپحانا باسشىسى.
سونداي-اق ول الداعى ۋاقىتتا كىتاپحانا جانىنان باسپاحانا اشىلۋى مۇمكىن ەكەنىن دە ايتتى.
«بىلتىر مادەنيەت جانە سپورت مينيسترلىگىنىڭ تاپسىرماسىنا سايكەس كىتاپحانا قىزمەتكەرلەرى ماسكەۋ مەن تاشكەنت قالالارىنا باسپاحانا سالاسىندا تاجىريبە الۋ ءۇشىن بارىپ قايتتىق. ناتيجەسىندە, ءبىز بيىل مينيسترلىككە ۇسىنىس جىبەردىك. ونىڭ ۇستىنە بىلتىر مادەنيەت جانە سپورت ءمينيسترى اقتوتى رايىمقۇلوۆا كىتاپحانانىڭ جانىنان باسپاحانا اشىلادى دەگەن ەدى. وسىعان وراي ءبىز قازىر قۇجاتتارىن جيناپ, مينيسترلىككە جوباسىن وتكىزدىك. ەگەر باسپاحانا اشىلاتىن بولسا, نەگىزىنەن سۇرانىسقا ساي برايل جۇيەسىندەگى قازاق تىلىندەگى كوركەم ادەبيەتتەر, مەكتەپ وقۋشىلارىنا ارنالعان وقۋلىقتار, بالالار شىعارمالارى باسىلادى», دەيدى ا.بايۇزاقوۆ.
كەيىنگى جىلدارى زاعيپتار قوعامى ارنايى كىتاپتار شىعارۋ ءىسىن قولعا العانى بەلگىلى. 2019 جىلدان باستاپ «جىلى ۇيا» وڭالتۋ ورتالىعىنا قاراستى قۇرىلىم رەتىندە ارنايى باسپاحانا اشىلعان. وندا رەسپۋبليكاداعى ارنايى كىتاپحانالاردىڭ سۇرانىسى بويىنشا كىتاپتار شىعارىلادى. قوعامدىق ۇيىمنىڭ وكىلى گۇلبارشىن بالعوجينا باسپاحانا جۇمىسىن كەڭەيتۋ جوسپاردا بار ەكەنىن ايتتى.
«ماسەلەن, 2021 جىلى بەس كىتاپحانانىڭ تاپسىرىسى بويىنشا جۇمىس جاسادىق. ياعني بىلتىر 1 760 تۇبىرتىك (برايل جۇيەسىندە ءبىر كىتاپ بىرنەشە بولىكتەن تۇرادى. مىسالى, جەتى كىتاپقا تاپسىرىس بەرىلسە, ول 34 كىتاپ بولىپ شىعارىلادى) باسىلىپ شىقتى. ال قازىر 100-گە جۋىق اتاۋلى كىتاپ دايىن. ارنايى كىتاپحانالار وزدەرى تاڭداپ الادى. بۇگىندە كوبىنەسە قازاقتىلدى كىتاپتار (كوركەم ادەبيەت, جوعارى وقۋ ورىندارىنا ارنالعان وقۋلىقتار) شىعارىپ جاتىرمىز. الداعى ۋاقىتتا باسپاحانانى جەكە ۇيىم رەتىندە وڭالتۋ ورتالىعىنان بولەك شىعارامىز», دەدى ول.
بۇل جوبا زاعيپتار قوعامىنىڭ قولداۋىمەن عانا ىسكە اسىپ وتىر. ال ارنايى كىتاپحانالار مەملەكەتتىك مەكەمە بولعاندىقتان, كىتاپتاردى ساتىپ الادى. ايتا كەتەيىك, اتالعان قوعام مەملەكەتتىك بيۋدجەتتەن تىكەلەي قارجىلاندىرىلمايدى. باسقا ۇيىمدار سەكىلدى تەندەرگە قاتىسىپ, اقشا تاۋىپ وتىر. ودان بولەك, باسپاحانا جۇمىسىنان تۇسەتىن تابىس تا بار. ماسەلەن, جايپاق باسپالى ءبىر بەتتى نۇكتەلى-بەدەرلى قارىپكە اۋىستىرۋ قۇنى – 220 تەڭگە. ءبىر كىتاپتىڭ جالپى سوماسى بەت سانىنا بايلانىستى. باسپاحانا بىلتىر قىزىلوردا وبلىسىنداعى ارنايى كىتاپحاناعا 7 اتاۋ – 33 تۇبىرتىكتەن تۇراتىن كىتاپتى 237 912 تەڭگەگە ساتقان.
ەسكە سالايىق, بىلتىر مادەنيەت جانە سپورت مينيسترلىگى زاعيپ جانە كوزى ناشار كورەتىندەرگە ارنالعان كىتاپحانالار قورى ۇلعايتىلاتىنىن ايتقان ەدى. ناقتىلاساق, «مينيسترلىكتىڭ 2021-2023 جىلدارعا ارنالعان بيۋدجەتتىك جوسپارىندا جىل سايىن زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحاناعا برايل پرينتەرى مەن ءبرايلدىڭ ءپورتاتيۆتى تاكتيلدى ديسپلەيلەرىن, ماتەريالدىق ەمەس اكتيۆتەردى ساتىپ الۋ ءۇشىن جانە كىتاپحانا قورىن تولىقتىرۋعا ءتيىستى قاراجات قاراستىرىلعان», دەگەن بولاتىن ۆيتسە-مينيستر ن.داۋەشوۆ. اتالعان قۇزىرلى ورگاننىڭ باعدارلاماسى ىسكە اسىپ جاتسا, جوعارىدا اتالعان ماسەلەلەردىڭ شەشىلۋىنە ىقپال ەتەر ەدى. ەل الدىندا ايتىلعان ۋادەنىڭ ورىندالۋىن اسىعا كۇتەمىز.
P.S. بۇل ماقالادا زاعيپ جانداردىڭ ومىرىنە قاتىستى بارلىق ماسەلە قامتىلعان جوق. ولاردىڭ كىتاپ وقۋىنان بولەك الەۋمەتتىك-تۇرمىستىق احۋالىندا دا كۇرمەۋلى تاقىرىپتار جەتەرلىك.
