«بولاشاق» باعدارلاماسى بويىنشا الەمنىڭ بەدەلدى ۋنيۆەرسيتەتىندە ساپالى ءبىلىم الىپ, ەلىمىزدەگى يننوۆاتسيالىق ءبىلىم پلاتفورمالارىندا جۇمىس ىستەپ, تاجىريبە جيناپ, قازىرگى ۋاقىتتا تۋعان جەرىم اقتوبەدە ق.جۇبانوۆ ۋنيۆەرسيتەتىن باسقارۋ سەنىمىنە يە بولۋىم – جاستارعا بەرىلگەن مول مۇمكىندىك پەن قولداۋدىڭ كورىنىسى. مەن سياقتى مەملەكەت قولداۋىمەن ءوسىپ-وركەندەپ, ەندى سول ينۆەستيتسيانى ەلگە ادال قىزمەت ەتۋ ارقىلى وتەۋگە دايىن جاستار كوپ.
جاقىندا وتكەن Nur Otan پارتياسىنىڭ كەزەكتەن تىس ءححى سەزىندە سويلەگەن سوزىندە ەل پرەزيدەنتى قاسىم-جومارت توقاەۆ جاستاردى پايدالى قوعامدىق قىزمەتكە تارتۋدىڭ, سونداي-اق قازاقستانداعى جۇمىسپەن قامتۋ جانە ءبىلىم بەرۋ سالاسىنداعى جوبالارعا قولجەتىمدىلىكتى كەڭەيتۋدىڭ ماڭىزدىلىعىنا توقتالدى.
ءوزىم قىزمەت ەتەتىن ق.جۇبانوۆ اتىنداعى اقتوبە وڭىرلىك ۋنيۆەرسيتەتى – ەلىمىزدەگى ەڭ ءىرى وڭىرلىك جوعارى وقۋ ورىندارىنىڭ ءبىرى. بۇگىندە ۇجىمىمىزدىڭ الدىندا اكادەميالىق ساپا ستاندارتتارىن ودان ءارى جەتىلدىرۋ, ءبىلىم بەرۋ مازمۇنىن جاڭارتۋ, عىلىمدى جان-جاقتى قولداۋ, باسقارۋ پروتسەستەرىن ترانسفورماتسيالاۋ جانە تسيفرلاندىرۋ, سول ارقىلى ەلىمىزدىڭ, اقتوبە ءوڭىرىنىڭ, سونداي-اق جوعارى ءبىلىمنىڭ دامۋىنا ايتارلىقتاي ۇلەس قوسۋ مىندەتى تۇر. اتالعان ماڭىزدى وزگەرىستەردى جۇزەگە اسىرۋدا ستۋدەنتتەر ۇلكەن ءرول اتقارادى. ۋنيۆەرسيتەتىمىزدەگى ستۋدەنتتىك پارلامەنت پەن وتىزدان اسا جاستار كلۋبى مەن ۇيىمعا جان-جاقتى قولداۋ كورسەتۋ ۇنەمى نازاردا.
سونىمەن قاتار قازىرگى تاڭدا وتكىزىلەتىن ءىس-شارالاردىڭ سانىنان گورى مازمۇنى مەن ساپاسىنا باسىمدىق بەرۋدىڭ جانە ءتۇرلى باعىتتاعى جۇمىستاردى ورتاق تۇجىرىمداماعا نەگىزدەۋدىڭ ماڭىزى ارتىپ وتىر. تەك ۋنيۆەرسيتەت قاۋىمداستىعى ءۇشىن عانا ەمەس, قالا مەن ءوڭىردىڭ دامۋىنا ايتارلىقتاي ۇلەس قوسۋعا ىنتالى ەرىكتىلەر قوزعالىسى بەلسەندى تۇردە دامىپ كەلەدى. الداعى ۋاقىتتا ەرىكتىلىك پەن قوعامعا پايدالى قىزمەت ەتۋ جۇبانوۆ ۋنيۆەرسيتەتىنىڭ ءار ستۋدەنتىنىڭ ويىندا بولسا دەيمىن.
ۋنيۆەرسيتەتىمىزدە 15 مىڭنان اسا ستۋدەنت ءبىلىم الىپ جاتىر. ارينە, جاقسى وقۋ ۇلگەرىمىن كورسەتىپ, ءوز الەۋەتىن تولىق دامىتۋ ءۇشىن ستۋدەنتتەردىڭ ەموتسيونالدى كۇيى ورنىقتى بولۋى كەرەك. ستۋدەنتتەرىمىزدىڭ جايلىلىعى مەن تىنىشتىعىن قامتاماسىز ەتۋ ماقساتىندا وسى وقۋ جىلىندا ەڭ جوعارى ستاندارتتارعا ساي كاسىبي پسيحولوگ مامانداردى جۇمىلدىرىپ, پسيحولوگيالىق ورتالىق اشتىق. پسيحولوگيالىق ورتالىق قازاقستانداعى پسيحواناليز ورتالىعىمەن تىعىز بايلانىستا جۇمىس ىستەپ وتىر.
ستۋدەنتتەر مەن جاس ماماندارعا «ەلىمىز جاساپ وتىرعان مۇمكىندىكتەردى جاسامپازدىققا جۇمساپ, ساپالى ءبىلىم الىڭىز جانە ەلىمىزدىڭ ەرتەڭى مەن بۇگىنى ءۇشىن جاۋاپكەرشىلىكتى وزىڭنەن باستا!» دەگىم كەلەدى. ەلىمىزدىڭ بىرلىك-بەرەكەسىن ارتتىرۋعا بىرگە جۇمىلايىق!
لاۋرا قاراباسوۆا,
ق.جۇبانوۆ اتىنداعى
اقتوبە وڭىرلىك ۋنيۆەرسيتەتىنىڭ رەكتورى
اقتوبە
