ەلىمىزدىڭ ساياسي ومىرىندە وزگەرىستەر كەزەڭى باستالدى جانە بۇل ءبىزدىڭ قوعامنىڭ دەموكراتيالىق, قۇقىقتىق نەگىزدە نىعايا تۇسۋىنە جول اشادى. وسى ورايدا Nur Otan پارتياسىنىڭ كەزەكتەن تىس ءححى سەزىندە قاسىم-جومارت توقاەۆ قوعامدىق قۇندىلىقتار جۇيەسىنە, ساياسي جانە الەۋمەتتىك-ەكونوميكالىق سالالارعا تۇبەگەيلى وزگەرىس ەنگىزۋ قاجەت ەكەنىنە تاعى دا نازار اۋداردى.
جاڭا قازاقستان جاعدايىنداعى ەندىگى پارتيا قانداي بولۋى كەرەك دەگەن ماسەلەنى پرەزيدەنت ورىندى كوتەرىپ, ۇسىنىستار ەنگىزدى. اتا زاڭىمىز بويىنشا پرەزيدەنت – بارلىق قازاقستاندىقتىڭ بوستاندىقتارى مەن تەڭ قۇقىقتارىنىڭ ساقتالۋىنا كەپىل تۇلعا. ولاي بولسا مەملەكەت باسشىسى قازاقستانداعى بۇكىل پارتياعا ورتاق تۇلعا بولۋى كەرەك.
بۇعان دەيىن پرەزيدەنت جانە وبلىس اكىمدەرى Nur Otan پارتياسىنىڭ جەتەكشىلەرى بولعان سوڭ, وسى پارتياعا جاپپاي مۇشە بولۋ ەتەك الدى. ء«بىز سان جاعىنان مۇشەلەرى ەڭ كوپ پارتيامىز» دەگەن داقپىرتقا جول بەرىلىپ, ءتىپتى تىزىمدەپ, ەرىكسىز وتكىزۋگە دەيىن باردىق. كوڭىل-ىقىلاسى مەن سەنىمى جوق, پارتياعا ەرىكسىز مۇشە بولعانداردىڭ الدى كەشەلى-بۇگىندى ارىزدارىن بەرىپ, Nur Otan پارتياسىنىڭ مۇشەلىگىنەن شىعىپ جاتقانى وسى ايتىپ وتىرعان جايدىڭ اقيقاتىنا كوز جەتكىزگەندەي.
«Nur Otan ءوزىن-ءوزى جاڭارتۋى كەرەك. پارتيانىڭ بۇكىل جۇمىسىن ءسوز جۇزىندە عانا ەمەس, تۇبەگەيلى قايتا قۇرۋ قاجەت», دەگەن ق.توقاەۆ ەندىگى ارادا ءبىراز باسىمدىققا باسا ءمان بەرۋگە شاقىردى. ەڭ اۋەلى پارتيا ىشىندەگى ىنتىماقتى نىعايتۋدى, قوعامداعى بارلىق كونسترۋكتيۆتى كۇشتى بىرىكتىرۋدى ءبىرىنشى مىندەت رەتىندە اتادى. پرەزيدەنتتىڭ «جاڭا قازاقستاندى قۇرۋ ءۇشىن اۋىزبىرشىلىكتىڭ, سەرىكتەستىكتىڭ, نىق ۇستانىم مەن بولاشاققا سەنىمنىڭ ماڭىزى زور» دەگەن پىكىرىن تولىق قولداپ, سويلەر سوزىمىزدە دە حالقىمىزدىڭ ەرتەڭگى جاقسى كۇنىنە دەگەن سەنىمىن بەكىتەتىن ءسوز ايتا بىلسەك ەتتى.
راس, ءبىز قازاقستاننىڭ جاڭا ءداۋىرىن قۇرۋدى باستادىق. «وتىز جىل بويى قايدا بولدىڭدار, بۇرىن نەگە ايتپادىڭدار؟» دەگەن بوس ءسوزدى قويا تۇرالىق تا, ەلىمىزدى قالاي جاڭارتامىز, ادىلەتتى قوعامدى قالاي قۇرامىز, قايتسەك باي دا باقۋاتتى ءومىر سۇرەمىز, سول جايىندا ويلانىپ, ىسكە كىرىسكەنىمىز ابزال.
وتكەن وتىز جىلعا دا جانە كىمنىڭ كىم ەكەنىنە دە ۋاقىت, سول ۋاقىتتىڭ يەلىگىندەگى تاريح جاۋاپ بەرەدى. ال ازىرگىمىز بوس ءسوز بولىپ قالا بەرەدى. وسى ورايدا پرەزيدەنتىمىز قاسىم-جومارت توقاەۆتىڭ ەلباسىنىڭ 30 جىلدا ەل مۇددەسى ءۇشىن اتقارعان جۇمىسىن جوققا شىعارماۋ كەرەك ەكەنىن, بۇل تاريحقا قيانات جاساۋ ەكەنىن وتە ورىندى ايتتى. بۇل – ەلدىك ءسوز.
قازاقستاننىڭ جاڭا ءداۋىرىن قالىپتاستىرىپ, ەلىمىزدى قازىرگى تىعىرىقتان الىپ شىعا الاتىن جانە ادىلدىك پەن ادالدىق ورناتا الاتىن كەزەڭنىڭ باستالعانىنا سەنەيىك. قازىرگى ۋاقىتتا ءبارى ارزانداسىن دەگەن تالاپ قويۋمەن بىرگە, ءبارى ارزان بولۋى ءۇشىن شاحتاعا ءتۇسىپ كەنىڭدى, كومىرىڭدى ءوزىڭ ءوندىر, تەمىرىڭدى ءوزىڭ بالقىت, مالىڭدى ءوزىڭ باق, استىعىڭدى ءوزىڭ ءوسىر دەگەن قاعيداتتى العا تارتقانىمىز دا ءجون. بىرلىكتە, ىنتىماقتا بولايىق, تاۋەلسىزدىكتى نىعايتايىق!
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى
كوكشەتاۋ
