پارتيادا ەكى جىل ىشىندە رەفورما ءجۇرىپ, پرايمەريز وتكىزىلىپ, قوعاممەن تىعىز بايلانىس تەتىكتەرى جاسالدى. وسى تەندەنتسيانى تەرەڭدەتۋ ماڭىزدى. ەندى Nur Otan پارتياسىنىڭ الدىندا قوعامنىڭ, ازاماتتاردىڭ, ادامداردىڭ ساياسي, ەكونوميكالىق مۇددەلەرىن قورعاۋعا قابىلەتتى ۇيىمعا اينالۋ مىندەتى تۇر. وتە اۋىر مىندەت. وسى مىندەت ۇدەسىنەن شىعا الساق, پارتيا ناقتى «پارلامەنتتىك» رەڭك الىپ, پروگرەسسيۆتى ۇيىمعا اينالادى.
ول ۇدەدەن شىعۋ ءۇشىن نە ىستەۋ كەرەك ەكەندىگىن پارتيا توراعاسى قاسىم-جومارت توقاەۆ جان-جاقتى ايتىپ بەردى. بارلىق ساياسي كۇشتەرگە «اشىق ەسىك» ساياساتى پارتيانىڭ ەڭ باستى قۇندىلىعى بولۋى كەرەك.
پارتياعا رەبرەندينگ قاجەت. اتىن وزگەرتۋ كەرەك شىعار. ونى دا ويلانۋ كەرەك. ياعني پارتيانىڭ الدىندا وتە كۇردەلى, قيىن, قىم-قيعاشى مول ساپار تۇر. پارتيانىڭ ينتەللەكتۋالدىق پوتەنتسيالى, ادامي كاپيتالى, ۇجىمدىق ساناسى وسى ماقساتقا جەتۋگە قابىلەتتى دەپ ويلايمىن.
قازاقستان رەسپۋبليكاسى ءوزىنىڭ ساياسي تاريحىندا ءبىرىنشى رەت اسا كۇردەلى, شۇعىل بۇرىلىستارى كوپ ساياسي-ەكونوميكالىق رەفورمانى باسىنان كەشىرىپ جاتىر. مەملەكەتتىلىكتى ساقتاپ قالۋ ءۇشىن بۇل وزگەرىستەر باقىلاۋدان شىعىپ كەتپەۋى كەرەك.
مەملەكەتتىلىكتەن ايىرىلىپ قالۋ ءبىر عانا مەزەتتە ەكەندىگىن «قاسىرەتتى قاڭتار» كورسەتتى. قاسىم-جومارت توقاەۆتىڭ پارتيا توراعاسى لاۋازىمىنا كەلۋىنىڭ ءوزى وسى لوگيكاعا بايلانىستى. ياعني Nur Otan-نىڭ پارلامەنتتەگى فراكتسياسىن پايدالانىپ, ۇكىمەتكە ىقپالىن كۇشەيتە وتىرىپ تەزىرەك, ەكونوميكالىق تيىمدىلىككە جەتۋ.
ويتكەنى قازىر ءبىزدىڭ بارلىعىمىزعا – حالىققا, ازاماتتارعا ولاردىڭ ءومىرىنىڭ جاقسارىپ كەلە جاتقانى جونىندە ناقتى «بەلگى» قاجەت. پرەزيدەنت – قازاقستاننىڭ مەملەكەتتىلىگى ءۇشىن جاۋاپتى بىردەن-ءبىر تۇلعا. بۇل وتە اۋىر جۇك! سوندىقتان ول كىسى جۇيەلى تۇردە, بىرتە-بىرتە, جان-جاعىن باعدارلاپ, ون رەت ويلانا وتىرىپ شەشىم قابىلداۋى قاجەت.
ەرلان سايروۆ,
ءماجىلىس دەپۋتاتى
