بۇل رەتتە Nur Otan پارتياسىنان سايلانعان دەپۋتاتتارعا ۇلكەن جاۋاپكەرشىلىك جۇكتەلىپ وتىر. مەملەكەت باسشىسى پارتيا وزگەرۋى كەرەك دەگەن ويدى ايتتى. مەنىڭشە, ەلىمىزدەگى ءىرى ساياسي قۇرىلىم ءبىرىنشى كەزەكتە اشىقتىققا ايرىقشا ءمان بەرۋى كەرەك. اسىرەسە پارتيا فراكتسياسى بارىنشا اشىق بولۋى كەرەك. ياعني پارتيا دا, پارتيا اتىنان سايلانعان دەپۋتاتتار دا حالىق الىندا ەسەپ بەرۋدى قالىپتى ادەتكە اينالدىرۋى كەرەك.
پرەزيدەنت بايانداماسىنان كەيىن اركىم پارتيانى قالاي وزگەرتۋگە بولادى دەگەن ساۋالعا جاۋاپ ىزدەپ, وي-پىكىرلەرىن بىلدىرۋدە. وسى ورايدا مەن دە از-كەم پىكىر ايتۋدى ءجون كورىپ وتىرمىن. مەنىڭشە, حالىقتى كەڭسەدە وتىرىپ قابىلداۋدى ازايتۋ كەرەك. حالىقتىڭ سەنىمىنە يە بولۋ ءۇشىن حالىقتىڭ ىشىندە جۇرگەن دۇرىس. كەڭسەدەن تىس جەردە كەزدەسۋلەر ۇيىمداستىرىپ, تۇرعىنداردىڭ بەتپە-بەت كەلىپ وتىرعان تۇيتكىلدى ماسەلەلەرىمەن تانىسۋى كەرەك. نەگىزى مۇنداي جۇمىستار بۇرىن دا جۇرگىزىلەتىن. ەندى سونى ودان ءارى كۇشەيتە تۇسكەن ابزال جانە بۇل جاساندى بولماعانى دۇرىس.
پرەزيدەنت ايتقانداي, ەل ىشىندەگى پارتيا بەدەلىن ءوسىرۋ ماڭىزدى. بۇل رەتتە پارتيانىڭ ورگاندارىن ءتيىمدى پايدالانۋ كەرەك. پارتيا بەلسەندى جاستاردى كوبىرەك تارتۋ كەرەك جانە ولار ءارتۇرلى سالانىڭ وكىلى بولۋعا ءتيىس. سونىمەن قاتار پارتيا قاتارىنا شاعىن جانە ورتا بيزنەس وكىلدەرى الىنۋى كەرەك.
جالپى العاندا, پرەزيدەنت قولدان كەلەتىن جانە وڭ ناتيجە بەرەتىن تاپسىرمالار جۇكتەدى. ەندى ونى ساپالى ءارى تياناقتى ورىنداۋ كەرەك.
بەرىك بياتوۆ,
«تەمىرماش» زاۋىتىنىڭ ديرەكتورى
پاۆلودار وبلىسى
