كارتينانىڭ اتى – «امەريكالىق گوتيكا». كومپوزيتسيانىڭ كەيىپكەرلەرى – اعاشتان سوعىلعان قاراپايىم ءۇيدىڭ الدىندا تۇرعان فەرمەر مەن ونىڭ قىزى. باقساڭىز, ارتقى فونداعى عيمارات گوتيكالىق ستيلدە جازىلعان. ديقاننىڭ ايىرىن قولىنا مىقتاپ تۇيگەنىن كورەمىز. بۇل جۇمىس قۇرالى ەمەس, قارۋدىڭ ەرەكشە ءتۇرى سەكىلدى. ءبىر اشۋدىڭ لەبى ەسەدى.
سۋرەتشى فەرمەرلەردىڭ تولىقتاي تارتىمسىزدىعىن جەتكىزگەن. ەرىندەرىن قاتتى قىسىپ الىپ, وقتى كوزدەرىمەن اشۋىن ءبىلدىرىپ تۇر. بۇل ساياسي جۇيەگە دەگەن كوڭىل تولماۋشىلىقتان بولۋى مۇمكىن. جانارلارىنان تەرەڭ رەنىش پەن شىنايى وكپەنى وقۋعا بولادى.
فەرمەر قىزىنىڭ ۇستىنەن ەسكىرگەن الجاپقىشتى كورەمىز. ونىڭ بەت-الپەتى جىگەرلى بولعانىمەن كومەككە ءزارۋ جانعا ۇقسايدى. اكەسىنىڭ ارەكەتىن تولىق قولداۋعا تىرىسىپ تۇر. قىزىعى سول, شارۋالار كيىمىنەن قولىنداعى ايىردىڭ كونتۋرىنا ۇقسايتىن تىگىستەردى كورە الاسىز. سول كونتۋرلار ونىڭ ءۇيىنىڭ تەرەزەلەرىندە دە قايتالانادى.
جالپى, كەنەپتەگى كومپوزيتسيا XIX عاسىرداعى امەريكالىق فوتوسۋرەت ستيلىندە جىزىلعان. كەيىپكەرلەر ناعىز پۋريتاندىقتار سياقتى وتە ۇستامدى. اۆتوردىڭ اپكەسى فەرمەر قىزىنا پروتوتيپ بولدى. ارتقى پلان مەن الدىڭعى پلان ەكى سۋرەتتىڭ قوسىندىسى سەكىلدى كورىنەدى. بۇل كارتيناداعى كورىنىس ەشقاشان بولماعان.
قىلقالام شەبەرى ءبىر كۇنى ەشكىمگە ۇقسامايتىن كىشكەنتاي ءۇيدى كورەدى. وعان قاتتى قىزىققانى سونشالىق عيماراتتى بەينەلەپ قانا قويماي, وندا كىم ءومىر سۇرەتىنىن ەلەستەتەدى. سۋرەتشى سول كەزدەگى بارلىق امەريكالىق شارۋانىڭ پورترەتىن جازعىسى كەلدى. سىنشىلار اۆتوردىڭ اۋىلداعى ەڭ قاراپايىم بەينەنى جازعانىنا ريزا بولدى. ونى جاسامپازدىقتىڭ مىزعىماس رۋحىمەن بايلانىستىردى.
ال بىزگە بۇل شىعارما ايىرىن قولىنا ۇستاپ مالىنا ءشوپ ىزدەگەن قازاق شارۋالارىنىڭ جاي-كۇيىن كوز الدىمىزعا اكەلگەندەي بولدى. اۋىلدىڭ تۇرمىسى تۇزەلمەي ەلدىڭ ءال-اۋقاتى ارتپايدى.
