«بيىل ديرەكتورلاردىڭ روتاتسياسى باستالادى. الدىڭعى جىلى زاڭنامانى قابىلداپ, بەكىتتىك. ەندى بيىل ناقتى مىڭنان استام ديرەكتور روتاتسياعا ىلىنەدى», دەدى اسحات ايماعامبەتوۆ.
روتاتسيانىڭ ەرەجەلەرى تومەندەگىدەي:
بىرىنشىدەن, ءبىر ءبىلىم بەرۋ ۇيىمىندا 4 نەمەسە 7 جىلدان استام ۋاقىت جۇمىس ىستەگەن باسشىلار روتاتسيالانادى.
بۇل رەتتە, وسى ءبىلىم بەرۋ ۇيىمىندا لاۋازىمعا تاعايىندالعان كۇننەن باستاپ 4 جىل جۇمىس اتقارعان ءبىرىنشى باسشى روتاتسيادان ءوتىنىشى نەگىزىندە بوساتىلىپ, تيىسىنشە قولدانىستاعى ەڭبەك شارتى شەڭبەرىندە ءوز جۇمىسىن جالعاستىرا الادى.
الايدا ەگەر باسشى اتالعان ۇيىمدا 7 جىلدان استام ۋاقىت جۇمىس ىستەسە, وندا ول مىندەتتى تۇردە روتاتسيالانادى. وسىلايشا, ءبىر ءبىلىم بەرۋ ۇيىمىنا جەتەكشىلىك ەتۋ مەرزىمى 7 جىلدان اسپاۋى ءتيىس.
ەكىنشىدەن, روتاتسيالاۋدىڭ تومەندەگىدەي شارتتارى بار:
– روتاتسيالاۋدى وبلىستاردىڭ جانە رەسپۋبليكالىق ماڭىزى بار قالالاردىڭ ءبىلىم باسقارمالارى جۇزەگە اسىرادى;
– روتاتسيا ءبىر ەلدى مەكەن اۋماعىندا جۇرگىزىلەدى;
– روتاتسيالاۋدى ءبىر دەڭگەيدەگى ۇيىم باسشىلارى اراسىندا جۇرگىزەدى.
– روتاتسيالاۋ كەزىندە ءبىرىنشى باسشىلاردىڭ بىلىكتىلىك ساناتى, ياعني اتالعان سانات ءۇشىن تولەنەتىن قوسىمشا اقى دا مەرزىمى اياقتالعانعا دەيىن ساقتالادى.
