ونىڭ ايتۋىنشا, قازىرگى كوزقاراس پەن مۇنداي ستاتيستيكانىڭ ناتيجەلەرى سەنىمدى ەمەس.
«جەرگىلىكتى اتقارۋشى ورگاندار, ۇكىمەت جۇمىسسىزدىق پەن كەدەيشىلىك دەڭگەيىن ۇنەمى تومەن كورسەتۋمەن كەلەدى. 2021 جىلى ۇكىمەت ەلدە 450 مىڭ ادام جۇمىسسىز دەپ كورسەتسە, كەدەيشىلىك دەڭگەيى 4,5 % اسپايدى دەگەن رەسمي اقپارات بەردى. وسى شىندىققا سايكەس كەلە مە؟ كەزىندە رەسپۋبليكانىڭ ستاتيستيكا قىزمەتىن باسقارعان ءسىز بىزدە ستاتيستيكالىق مالىمەتتەر وبلىس اكىمدەرى مەن مينيسترلىكتەردىڭ ىڭعايىنا قاراي, بۇرمالانىپ بەرىلىپ كەلگەندىگىن جاقسى بىلەسىز عوي دەپ ويلايمىن. ەلدەگى وسى كەزگە دەيىنگى كەدەيلىك دەڭگەيىن انىقتاۋدا قولدانىپ كەلە جاتقان قازاقستاندىق ءتاسىل كەدەيلىكتى تومەندەتىپ كورسەتىپ كەلەدى. كەدەيلىك شەگىن ولشەيتىن الەمدىك ستاندارتتارعا شىعۋعا بىزگە نە كەدەرگى بولىپ وتىر؟ سوندىقتان دا ۇكىمەت ءبىرىنشى كەزەكتە كەدەيشىلىكپەن كۇرەسۋدىڭ جاڭا جۇيەسىن جاساۋ كەرەك. كەلەشەكتە جالعان ستاتيستيكادان تولىققاندى ارىلۋ كەرەك», دەدى سەناتور.
سونىمەن قاتار مەملەكەتتىك ورگانداردىڭ ۇكىمەتتىڭ دەپۋتاتتىق ساۋالدارىنا جاۋاپ بەرۋگە دەگەن كوزقاراسىن سىنعا الدى.
«سەناتتاعى ارىپتەستەر تاراپىنان قوعامدا ءار ءتۇرلى سالاعا قاتىستى دەپۋتاتتىق ساۋالدار ۇكىمەت باسشىسىنا, ۇكىمەت مۇشەلەرىنە جولدانىپ جاتادى. بىراق ولاردىڭ بەرگەن جاۋاپتارى ناقتى ەمەس ەكى ۇشتى بولىپ كەلەدى. سوندىقتان دا دەپۋتاتتىق ساۋالدارعا ءبىر جاپىراق قاعازبەن قايتاراتىن جاۋاپتاردى دوعارۋ كەرەك. دەپۋتات ساۋالىنا جان-جاقتى زەردەلەپ جاۋاپ بەرۋدى جولعا قويساڭىز دەيمىن», دەدى ول.
سونداي-اق, كەيدە ۇكىمەتتەن پارلامەنتكە «شيكى» كەلەتىن زاڭ جوبالارىن جازۋ سالاسىنداعى پروبلەمالارعا دا توقتالدى. سوندىقتان ۇكىمەتكە زاڭ جوبالارىن مەملەكەتتىك تىلدە ءارى ءجيى دايىنداۋدى ۇسىندى.
