قورقىتتىڭ قاراعايدان قايىرىپ, ۇيەڭكىدەن ءۇيىرىپ العان قىل قوبىزى – الەمدەگى ەڭ كونە اسپاپ. بۇگىندە ونىڭ ءتىلىن بىلەتىن ونەرپازدار كوپ ەمەس. سونداي-اق كوپشىلىككە ۇيرەتۋ باعىتى دا اقساپ تۇرعانى ءمالىم.
– قوبىزدىڭ ۇنىندە قازاقتىڭ مۇڭى, قۋانىشى مەن قايعىسى جاتىر. مۇنداي ساف ونەردى جوعالتىپ الماۋ ماڭىزدى. ونى ناسيحاتتاۋ ايماقتاعى مادەنيەت, رۋحانياتتىڭ ورداسى سانالاتىن حالىق شىعارماشىلىعى ورتالىعى ءۇشىن ماڭىزدى مىندەت بولىپ تابىلادى, – دەيدى وبلىستىق «شاڭىراق» حالىق شىعارماشىلىعى ورتالىعىنىڭ باسشىسى جارقىنبەك امانتاي.
ال «شالقىما» ۇيىرمەسىنىڭ جەتەكشىسى بوكەن جىگەردىڭ ايتۋىنشا, باسىمدىق قوبىزعا بەرىلەدى.
– قازاقتىڭ ءداستۇرلى, حالىق اندەرىن, كۇيىن ۇيرەتەمىز. بىزدەگى باستى ەرەكشەلىك, قاتىسۋشىلار تەك دومبىرا عانا ەمەس, قوبىزدا ويناۋدى دا ۇيرەنەدى. ۇيىرمە جۇمىسىندا وسى كونە اسپابىمىزعا باسىمدىق بەرۋدى جوسپارلاپ وتىرمىز. ونداعى ماقسات – قىل قوبىزدى دارىپتەۋ. ونىمەن قوسا, قوعام اراسىندا, اسىرەسە جاستار تاراپىنان قوبىزعا دەگەن قىزىعۋشىلىقتىڭ جوعارى ەكەنىن بايقادىق, – دەيدى ول.
