كاسىپقوي بوكس • 26 قاڭتار، 2022

الۆارەستى اندرادەمەن كەزدەسپەگەنى ءۇشىن ايىپتادى

659 رەت كورسەتىلدى

ەكىنشى ورتا سالماق دارەجەسىندەگى الەمنىڭ ءابسوليۋتتى چەمپيونى ساۋل «كانەلو» الۆارەستى ۇزاق جىلدار بويى امەريكالىق بوكسشى دەمەتريۋس اندرادەمەن جۇدىرىقتاسپاعانى ءۇشىن ايىپتادى، دەپ حابارلايدى Egemen.kz.

boxingnews24.com پورتالىندا جاريالانعان ماقالادا اۆتور «كانەلونى» اندرادەدەن قورقادى دەپ مالىمدەگەن.

«بوكس جانكۇيەرلەرى الۆارەستىڭ دەمەتريۋس اندرادەمەن ەشقاشان جەكپە-جەككە شىققىسى كەلمەگەنىن بىلەدى. اندرادە ءبىر ەمەس، ەكى بىردەي سالماقتا الەم چەمپيونى اتانعانى ءمالىم. ونىڭ ۇستىنە ەكى بوكسشى ۇزاق جىلدار بويى ءبىر سالماقتا باق سىنادى. سول كەزدە دە «كانەلو» ونىمەن شارشى الاڭدا بەتپە-بەت كەلۋدەن قايمىقتى.

«كانەلو» نەلىكتەن اندرادەمەن كەزدەسكىسى كەلمەيدى؟ ويتكەنى اقش بوكسشىسى ول ءۇشىن وتە قاۋىپتى قارسىلاس ەكەنى بەلگىلى. ستيل جاعىنان دا مەكسيكالىق بوكسشى ءۇشىن ىڭعايسىز. ءتىپتى كوپتەگەن جانكۇيەرلەر ءابجىل قيمىلدارىمەن قارسىلاستارىن ابىگەرگە سالاتىن سولاقاي اندرادە «كانەلونى» جەڭە الاتىنىن، ونىڭ شەبەرلىگى، قارسىلاستى سەزىنۋ قابىلەتى جوعارى ەكەنىن بىلەدى. ءتىپتى رينگتە الۆارەستى اقىماق قىلىپ كورسەتە الاتىنىن دا سەزەدى.

اندرادە سەكىلدى مىقتى قارسىلاسى بولا تۇرا، الۆارەس ءوزى انىق جەڭەتىن بيللي دجو سوندەرس، كالەب پلانت سەكىلدى بىلعارى قولعاپ شەبەرلەرىمەن قولعاپ ءتۇيىستىرىپ، وڭاي اقشا تاپتى. ويتكەنى ول دەمەتريۋسكە شاماسى كەلمەيتىنىن سەزدى. ول الداعى ۋاقىتتا دا دەمەتريۋس اندرادەمەن كەزدەسۋدەن قاشقاقتاي بەرەتىن بولادى. ايتكەنمەن، جاقىن كۇندەرى اقش بوكسشىسى ورتا سالماقتاعى WBO بەلدىگىن بوس قالدىرىپ، ەكىنشى ورتا سالماققا اۋىسۋى ىقتيمال. سول كەزدە ول ۇيىمنان ءوزىن الۆارەستىڭ مىندەتتى قارسىلاسى رەتىندە بەلگىلەۋدى سۇراۋى ءتيىس. ونداي جاعداي تۋىنداسا الۆارەس WBO بەلدىگىن بوس قالدىرىپ، اندرادەمەن كەزدەسپەۋدىڭ تاعى ءبىر امالىن قاراستىراتىن شىعار»، دەلىنگەن ماقالادا.

الايدا اۆتور اندرادەنىڭ مىندەتتى قارسىلاس جانىبەك الىمحان ۇلىمەن كەزدەسكىسى كەلمەيتىنى تۋرالى ءلام-ميم دەمەگەنى تاڭ قالدىردى.

سوڭعى جاڭالىقتار

ۇقساس جاڭالىقتار