احمەت بايتۇرسىن ۇلى • 26 قاڭتار، 2022

احمەت بايتۇرسىن ۇلىنا ەسكەرتكىش ورناتىلادى

233 رەت كورسەتىلدى

بۇل تۋرالى ەرالى توعجانوۆ دەپۋتات ساۋالىنا بەرگەن جاۋابىندا مالىمدەدى. احمەت بايتۇرسىن ۇلىنىڭ 150 جىلدىق مەرەيتويى اياسىندا نۇر-سۇلتان، الماتى، شىمكەنت قالالارى مەن وبلىس ورتالىقتارىندا قايراتكەردىڭ ەسكەرتكىشى ورناتىلماق، دەپ جازادى Egemen.kz.

2021 جىلعى 27 قازاندا قازاقستان رەسپۋبليكاسىنىڭ مەملەكەتتىك حاتشىسى توراعالىعىمەن وتكەن مەملەكەتتىك كوميسسيا وتىرىسىندا احمەت بايتۇرسىن ۇلىنىڭ 150 جىلدىق مەرەيتويىن دايىنداۋ جانە وتكىزۋ جونىندەگى جالپىرەسپۋبليكالىق جوسپار بەكىتىلدى. جوسپاردا احمەت بايتۇرسىن ۇلىنىڭ شىعارماشىلىق مۇرالارىن حالىقارالىق، رەسپۋبليكالىق جانە وڭىرلىك دەڭگەيدە ناسيحاتتاۋ ماقساتىندا عىلىمي، مادەني-اعارتۋشىلىق، اقپاراتتىق-يميدجدىك ءىس-شارالار قامتىلعان.

«بۇل جوسپاردا دەپۋتاتتىق ساۋالدا كوتەرىلگەن بىرقاتار ماسەلەلەر قاراستىرىلعان. اتاپ ايتساق، قوستاناي وبلىسى جانگەلدى اۋدانىنىڭ احمەت بايتۇرسىن ۇلى اۋىلىنداعى تۇلعا ومىرگە كەلگەن ءۇيدى قالپىنا كەلتىرىپ، جادىگەرلەرمەن تولىقتىرىپ، مۋزەي-ءۇي ەتىپ اشۋ جانە بايتۇرسىن اۋلەتىنىڭ قورىمىن قورشاۋىن جاڭارتۋ، قوستاناي وبلىسىنىڭ اۋماعىندا احمەت بايتۇرسىن ۇلىنىڭ مەموريالدىق كەشەنىن سالۋ، احمەت بايتۇرسىن ۇلى اۋىلىنا باراتىن جولدى كۇردەلى جوندەۋدەن وتكىزۋ، قوستاناي وبلىسىنداعى «احمەت بايتۇرسىن ۇلى مەن مىرجاقىپ دۋلات ۇلىنىڭ ادەبي مۇراجايىن»، الماتى قالاسىنداعى «احمەت بايتۇرسىن ۇلى مۋزەي-ءۇيىن» اباتتاندىرۋ جۇمىستارىن جۇرگىزۋ. سونداي-اق قوستاناي وبلىسىنداعى احمەت بايتۇرسىن ۇلىنىڭ دۇنيەگە كەلگەن سارىتۇبەك قونىسى ايماقتىق ماڭىزى بار كيەلى جەرلەر تىزىمىنە ەنگىزىلگەن»، دەدى ەرالى توعجانوۆ.

ونىڭ سوزىنشە، احمەت بايتۇرسىن ۇلى مۋزەي-ءۇيى الماتى قالاسى ءماسليحاتىنىڭ 2021 جىلعى 31 مامىرداعى № 51 شەشىمىنە سايكەس جەكە مەنشىكتەن كوممۋنالدىق مەنشىككە الىندى. اتالعان جوسپارعا سايكەس اعىمداعى جىلى احمەت بايتۇرسىن ۇلىنىڭ مۋزەي-ءۇيىنىڭ عىلىمي-رەستاۆراتسيالىق جۇمىستارى ءۇشىن عىلىمي-جوبالاۋ قۇجاتتاماسى ازىرلەنەدى.

«جانگەلدين اۋدانىنىڭ اتىن وزگەرتۋ، قوستاناي قالاسىنداعى اۋەجايعا احمەت بايتۇرسىن ۇلىنىڭ اتىن بەرۋ ماسەلەسى قوعامنىڭ پىكىرىن ەسكەرۋ ماقساتىندا جەرگىلىكتى حالىقپەن، اۋىلدىق وكرۋگپەن، قوعامدىق كەڭەس مۇشەلەرىمەن، ءماسليحات دەپۋتاتتارىمەن، ارداگەرلەر كەڭەسىمەن تالقىلاۋ جۇمىسى، كەزدەسۋلەر ۇيىمداستىرىلعاننان كەيىن ناتيجەسىنە قاراي قولدانىستاعى زاڭناما تالاپتارىنا سايكەس ىسكە اسىرىلادى. احمەت بايتۇرسىن ۇلىنىڭ ەسىمىن وبلىس ورتالىقتارىنداعى مەكتەپتەرگە، ورتالىق كوشەلەرگە (داڭعىلدارعا) بەرۋ ماسەلەسى جەرگىلىكتى جەرلەردىڭ ونوماستيكالىق كوميسسيا وتىرىستارىندا قارالاتىن بولدى. بۇل ماقساتتاعى جۇمىستار زاڭنامادا بەلگىلەنگەن تارتىپكە سايكەس بارلىق وڭىرلەردىڭ اكىمدىكتەرى تاراپىنان ىسكە اسىرىلادى. سونىمەن قاتار احمەت بايتۇرسىن ۇلىنىڭ ەسكەرتكىشىن ورناتۋ ماسەلەسى دە نۇر-سۇلتان، الماتى، شىمكەنت قالالارىندا جانە وبلىس ورتالىقتارىندا قولدانىستاعى زاڭناما تالاپتارىنا سايكەس جۇزەگە اسىرىلادى. ال تۇركيانىڭ انكارا قالاسىندا، رەسەيدىڭ ورىنبور قالاسىندا احمەت بايتۇرسىن ۇلىنىڭ ەسكەرتكىشىن ورناتۋ ماسەلەسىن قاراستىرۋ اتالعان جوسپاردا قامتىلعان»، دەپ ايتتى پرەمەر-ءمينيستردىڭ ورىنباسارى دەپۋتاتتارعا بەرگەن جاۋابىندا.

ونىڭ سوزىنشە، جوسپاردا احمەت بايتۇرسىن ۇلىنىڭ مۇرالارىن تۇركى الەمىنە ناسيحاتتاۋ ماقساتىندا تۇركسوي ۇيىمىنىڭ، وتاندىق جانە شەتەلدىك زيالى قاۋىم وكىلدەرىنىڭ قاتىسۋىمەن ىستامبۇل قالاسىندا دوڭگەلەك ۇستەل، فوتوكورمە ۇيىمداستىرۋ، تۇركىستان قالاسىندا حالىقارالىق تۇركىتانۋشىلار كونگرەسىن وتكىزۋ، سونىمەن قاتار حالىقارالىق تۇركى اكادەمياسىنىڭ ۇيىمداستىرۋىمەن باكۋ قالاسىندا «باكۋ كونگرەسى جانە احمەت بايتۇرسىن ۇلى» اتتى كونفەرەنتسيا، ورىنبور جانە تاشكەنت قالالارىندا مەرەيتويعا ارنالعان ءىس-شارالاردى وتكىزۋ قاراستىرىلعان.

سوڭعى جاڭالىقتار

ۇقساس جاڭالىقتار