ورىنباسار مەرقۇل ۇلى 1951 جىلى ماقتاارال اۋدانى قازىرگى اتاكەنت اۋىلىندا دۇنيەگە كەلگەن. ەس بىلگەلى سپورتقا جاقىن بولىپ ءوستى. وسە كەلە ول ءوزىن سپورتشى ەمەس, ۆولەيبول باپكەرى رەتىندە سىناپ كوردى. ول بالالارمەن تەز ءتىل تابىسىپ, ناتيجەلى ديالوگ ورناتا بىلەتىن. ءاربىر شاكىرتىنىڭ جان دۇنيەسىنە تەرەڭ ءۇڭىلدى. ماقتاارال اۋدانىندا ۆولەيبول سپورتىن تىنىمسىز ەڭبەگىنىڭ ارقاسىندا جاڭا بەلەسكە شىعاردى. ونىڭ جەتەكشىلىگىمەن اۋداننان قازاق ەلىن تامساندىرعان تالاي تالانتتى ۆولەيبولشى قىزدار شىقتى. ۇزدىك ويىنشىلارى ۇلتتىق قۇراما كومانداسىنىڭ ساپىندا حالىقارالىق ءدۇبىرلى دودالاردا قازاقستاننىڭ نامىسىن قورعاپ, جاسىنداي جارقىلدادى.
ورىنباسار پاشيموۆتىڭ مۇمكىندىگى مەن قابىلەتىن جوعارى باعالاعان باسشىلىق اۋداندىق سپورت مەكتەبىنىڭ ديرەكتورى ەتىپ تاعايىندايدى. ديرەكتور رەتىندە تالاي بالالار مەن جاسوسپىرىمدەردى قاناتتاندىرىپ, ومىردەن ءوز ورنىن تابۋعا سەپتىگىن تيگىزدى. توقسانىنشى جىلداردىڭ توقىراۋ زامانىندا اۋدانداعى سپورت مەكتەبىنىڭ جويىلىپ كەتپەۋى ءۇشىن بار كۇش-جىگەرىن جۇمسادى. اۋدان, وبلىستاعى ءتيىستى مەكەمەلەردىڭ, ەلورداداعى مينيسترلىكتەردىڭ تابالدىرىعىن توزدىرىپ, ايلاپ-جىلداپ جالاقى الماسا دا ءوز ىسىنە دەگەن ادالدىعىنان اينىماعان ەل اعاسىنا ءوڭىر تۇرعىندارى ءدان ريزاشىلىقتارىن جاسىرعان ەمەس.
تۋعان جەرى مەن ەلىنە بەرگەنى كوپ ەل اعاسىنىڭ قازاسى كوپشىلىكتىڭ قابىرعاسىن قايىستىردى. تۇركىستان جۇرتى مارقۇمنىڭ ورنى تولماس قازاسىنا قايعىرىپ, ارتىندا قالعان وتباسىنا كوڭىل ايتۋدا.
