كوروناۆيرۋس • 24 قاڭتار، 2022

كوروناۆيرۋس قايتا كۇشەيدى

كوپتى الاڭداتقان كوروناۆيرۋس ىندەتى قايتا كۇشەيدى. قازىرگى كەزدە ىندەت جۇقتىرعانداردىڭ سانى كۇرت وسكەن. ماسەلەن، وسى ۋاقىتقا دەيىن جامبىل وبلىسى اۋماعىندا كوروناۆيرۋس ينفەكتسياسىنىڭ 23 275 جاعدايى تىركەلىپ، 8 361 تۇرعىن پنەۆمونياعا شالدىققان. ال وڭىردە وتكەن تاۋلىكتە 257 ادام قاۋىپتى ىندەتتى جۇقتىرىپ، 6 ادام وكپە دەرتىمەن اۋىرعان.

حاميت ەسامان

وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ ىندەتكە تاپ بولعانداردىڭ ىشىندە 13 465 تۇرعىن تاراز قالاسىنان ەكەنىن ايتتى. بۇل كۇندە كوروناۆيرۋس ىندەتى وبلىس ورتالىعىندا ءجيى تىركەلۋدە. سونىمەن قاتار بايزاق اۋدانىندا – 1 647، جامبىل اۋدانىندا – 1 050، جۋالى اۋدانىندا – 572، قورداي اۋدانىندا – 2 065، ت.رىسقۇلوۆ اۋدانىندا – 530، مەركىدە – 682، مويىنقۇمدا – 332، سارىسۋدا – 359، تالاس اۋدانىندا – 560 جانە شۋ اۋدانىندا 1 781 جاعداي انىقتالعان.

«اسكەرگە شاقىرىلۋشىلار اراسىنان 125 جاعداي، باسقا وبلىس تۇرعىندارى اراسىنان 99 دەرەك تىركەلدى. پنەۆمونيا تۋرالى ايتساق، تاراز قالاسىندا – 2 478 تۇرعىن، بايزاق اۋدانىنان –

1 141، جامبىل اۋدانىنان – 705، جۋالىدان – 745، قوردايدان – 300، ت.رىسقۇلوۆ اۋدانىنان – 433، مەركى اۋدانىنان – 939، مويىنقۇم اۋدانىنان – 196، سارىسۋ اۋدانىنان – 558، تالاس اۋدانىنان – 527 جانە شۋ اۋدانىنان 328 ادام اۋىرعان. وڭىردەگى وزگە وبلىس تۇرعىندارى اراسىنان 5 جاعداي تىركەلدى. قازىرگى تاڭدا ينفەكتسيالىق ستاتسيونارلاردا 373 ناۋقاس ەم الۋدا. ال ونىڭ ىشىندە 28 ناۋقاس جانساقتاۋ بولىمىندە جاتىر. كارانتيندىك ستاتسيونارعا 87 ازامات ورنالاستى. سونداي-اق وڭىردەگى 10 زەرتحانادا تاۋلىگىنە شامامەن 2 600 – 2 800 پتر-زەرتتەۋ جۇمىستارى جۇرگىزىلۋدە»، دەيدى ءا.قاليەۆ.

سونىمەن قاتار بۇگىندە وبلىس بويىنشا 23 العاشقى مەديتسينالىق-سانيتارلىق ۇيىمدارىندا 45 ەگۋ پۋنكتى بار. ونىڭ ىشىندە 16 پۋنكت تاراز قالاسىندا جانە 29 پۋنكت وبلىس اۋداندارىندا ورنالاسقان. بۇگىندە ايماقتا 66 مىڭ 824 ادام رەۆاكتسينالاۋدان وتكەن.

قازىرگى كەزدە وڭىردە ىندەتتىڭ الدىن الۋ ماقساتىندا جۇمىس كۇشەيتىلگەن. وبلىس بويىنشا سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى باعلان قىدىرباەۆتىڭ ايتۋىنشا، جاڭا شتامداردىڭ تارالۋىن بولدىرماۋ ءۇشىن ۇجىمدىق يممۋنيتەتتىڭ قاجەتتى دەڭگەيىنە جەتۋ ماڭىزدى بولىپ وتىر. سونداي-اق ول ىندەتكە قارسى ۆاكتسينالار اۋىر جاعدايلاردى جانە اۋرۋحاناعا جاتقىزۋدى ازايتاتىنىن ايتتى.

«وتكەن جىلعى اقپان ايىنان باستاپ ايماقتا ءبىرىنشى كومپونەنتپەن 18 جاستان اسقان 633 244 ادام، ەكىنشى كومپونەنتپەن 563 464 ادام ەگىلدى. ال 22 قاراشادان بەرى كوروناۆيرۋسقا قارسى 48 815 ادام قايتا ۆاكتسينالاندى»، دەيدى ول.

بۇگىنگى تاڭدا جامبىل وبلىسى «قىزىل ايماققا» ەنگەن. بۇل رەتتە وڭىردە تۇرعىنداردىڭ قاۋىپسىزدىگىن بارىنشا قامتاماسىز ەتۋ جۇمىستارى ۇيىمداستىرىلۋدا. وبلىستىق ءبىلىم باسقارماسىنىڭ باسشىسى بەيقۇت جامانگوزوۆ بۇگىندە وبلىس بويىنشا 93 مەكتەپتىڭ ءۇشىنشى توقساندى قاشىقتان وقىتۋعا جىبەرىلگەنىن مالىمدەدى. جالپى، اتالعان 93 مەكتەپتە 122 905 وقۋشى وقيتىن بولسا، ونىڭ ىشىندە 84 252 وقۋشى قاشىقتان جانە 38 653 وقۋشى شتاتتىق رەجىمدە وقۋلارىن جالعاستىرۋدا.

جامبىل وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز