ايماقتار • 24 قاڭتار، 2022

ساپا ارتپايىنشا، سۋبسيديا جوق

قاراعاندى وبلىسىندا جولاۋشىلار تاسىمالىنىڭ ساپاسىن جاقسارتۋ ماسەلەسىنە ايرىقشا نازار اۋدارىلا باستادى. بۇل شارۋا اۋەلى قاراعاندى مەن تەمىرتاۋ اۆتوپاركتەرىنەن باستالماق.

قايرات ءابىلدا

جاسىراتىنى جوق، اتالعان سالادا شەشىلمەگەن ماسەلەلەر كوپ جانە ولار ءبىراز ۋاقىتتان بەرى كۇن تارتىبىندە وتكىر تۇر. ماسەلەن، مونوپوليستەر قيت ەتسە سۋبسيديا مولشەرىن ارتتىرۋ جونىندەگى اڭگىمەنى ءجون-جوسىقسىز قوزعاي بەرەتىن. ەندى ولار قىزمەت كورسەتۋ سەرۆيسىنىڭ دەڭگەيىن جوعارىلاتپايىنشا، بۇل تۋرالى اۋىز اشا المايدى. بۇل تۋراسىندا وبلىس اكىمدىگىندە وتكەن ونلاين-كەڭەستە ءوڭىر باسشىسى جەڭىس قاسىمبەك ايتتى.

– جولاۋشىلار تاسىمالى ساپاسىنا قاتىستى شاعىمدار وتە كوپ. تۇرعىندار الەۋمەتتىك جەلىلەردە جازادى. ماعان ءتارتىپ ورناتۋ تۋرالى وتىنىشتەر كەلەدى. اۆتوبۋستاردىڭ جەتىسپەۋىنە، كەستەنىڭ ساقتالماۋىنا، جۇرگىزۋشىلەر مەن كوندۋكتورلاردىڭ دورەكىلىگىنە، سانيتارلىق تالاپتاردىڭ بۇزىلۋىنا شاعىمدانادى، – دەپ كەمشىلىكتەردى جىپكە ءتىزدى وبلىس اكىمى.

قاراعاندىداعى ەڭ ءىرى تاسىمالداۋشىنىڭ ءبىرى – №3 اۆتوپارك ديرەكتورى ارتۋر گريگوريان كاسىپورىننىڭ بىرقاتار پروبلەماسىن تىلگە تيەك ەتىپ اقتالعانىمەن، ايتىلعان سىنمەن كەلىسپەسكە امالى قالمادى.

– قىزمەت كورسەتۋ مادەنيەتىنە كەلەتىن بولساق، ءبىز مۇنى بىلەمىز. كۇن سايىن، اي سايىن ءبىزدىڭ كاسىپورىن بويىنشا ەلۋگە جۋىق شاعىم تۇسەدى. بىراق بۇل جەردە ەشكىمدى اقتاعىم كەلمەيدى. شاعىمداردىڭ سانىن ازايتۋ كەرەك، – دەدى ول.

اتالعان اۆتوپارك ديرەكتورىنىڭ ايتۋىنشا، اۆتوپاركككە ەڭبەكاقىسى از بولعاندىقتان جۇرگىزۋشىلەر كەلمەيدى. بۇدان وزگە پاندەميا كەزىندە جولاۋشىلار سانى ازايىپ كەتكەن. سايكەسىنشە، امورتيزاتسيالىق شىعىندار وسە ءتۇستى.

ونلاين-كەڭەستە جۇرگىزۋشىلەردىڭ جەتىسپەۋشىلىگى جانە سۋبسيديالار مولشەرىن ارتتىرۋ قاجەتتىلىگى تۋرالى قاراعاندى مەن تەمىرتاۋدىڭ باسقا تاسىمالداۋشىلارى دا ايتتى. بۇعان وبلىس اكىمىنىڭ بەرگەن جاۋابى ناقتى ءارى قاتاڭ بولدى.

– ءبىز سۋبسيديالاردى كوبەيتەمىز. بىراق سىزدەر ساپالى قىزمەت كورسەتىڭىزدەر جانە اۆتوبۋستاردى جاڭارتۋ بويىنشا مىندەتتەمەلەر الىڭىزدار! – دەدى ول.

ەسكە سالار بولساق، بىلتىر ساران قالاسىندا شىعارىلاتىن وتاندىق ءوندىرىستىڭ 40 جاڭا اۆتوبۋسى پايدالانۋعا بەرىلگەن. وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، تەمىرتاۋدا – 20، جەزقازعاندا – 20 جانە ساراندا ءدال وسىنداي 11 اۆتوبۋس جولاۋشىلاردى تاسىپ ءجۇر.

بۇگىندە قاراعاندى قالاسىندا ەلەكتروندى تولەم جۇيەسىن ەنگىزىلگەنىن ايتا كەتكەن ءلازىم. قازىرگى ۋاقىتتا 160 مىڭعا جۋىق ONAY! كارتاسى ساتىلىپتى. قالا اكىمى ەرماعامبەت بولەكپاەۆتىڭ ايتۋىنشا، قولما-قول اقشاسىز تولەم بۇگىندە اينالىمنىڭ تورتتەن ءبىر بولىگىن قۇراپ وتىر.

قاراعاندى وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز