قوعام • 21 قاڭتار، 2022

وتكەن جىلى كاسىپورىنداردا 200 ادام كوز جۇمعان

50 رەت كورسەتىلدى

قازاقستاندا 2021 جىلى وندىرىستە جاراقات الۋ مەن ءولىم-ءجىتىم دەڭگەيى تومەندەگەن، دەپ حابارلايدى Egemen.kz.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، ەلىمىزدىڭ كاسىپورىندارىندا 1465 ادام زارداپ شەكتى، بۇل وتكەن جىلدىڭ سايكەس كەزەڭىمەن سالىستىرعاندا 2،5%-كە تومەن (2020 جىلى – 1503 ادام).

سونىمەن قاتار 200 ادام قايتىس بولدى، بۇل 205 ادام قايتىس بولعان 2020 جىلمەن سالىستىرعاندا 2،4%-كە تومەن.

ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ بۇگىنگى تاڭدا قازاقستاندا 6،7 ميلليون ادام جۇمىس ىستەيتىن 340 مىڭنان استام بەلسەندى كاسىپورىن بار ەكەنىن حابارلادى.

«جۇمىسكەرلەر ەڭبەك قۇقىقتارىنىڭ ساقتالۋىن 246 مەملەكەتتىك ەڭبەك ينسپەكتورى باقىلايدى، ولار 2021 جىلى 5 130 تەكسەرۋ جۇرگىزدى، ناتيجەسىندە 10 783 زاڭ بۇزۋشىلىق انىقتالدى. جۇرگىزىلگەن جۇمىس قورىتىندىسى بويىنشا جۇمىس بەرۋشىلەرگە 3 371 ۇيعارىم بەرىلىپ، 278،2 ميلليون تەڭگە سوماسىنا 1 334 ايىپپۇل سالىندى»، دەدى سەرىك شاپكەنوۆ.

تۇجىرىمدامانى ىسكە اسىرۋ بارىسىندا 2030 جىلعا قاراي زياندى جانە باسقا دا قولايسىز ەڭبەك جاعدايلارىندا جۇمىس ىستەيتىن قىزمەتكەرلەر سانىن 15%-كە دەيىن تومەندەتۋ، وندىرىستەگى جازاتايىم وقيعالار سالدارىنان زارداپ شەككەندەر سانىن 0،24-كە دەيىن (1000 جۇمىسشىعا) تومەندەتۋ، سونداي-اق ەڭبەكتى قورعاۋ سالاسىنداعى زاڭ بۇزۋشىلىقتاردى ەلدەگى جالپى كورسەتكىشكە شاققانداعى ۇلەسىن 15%-كە دەيىن تومەندەتۋ جوسپارلانۋدا.

ۇكىمەت قىزمەتكەرلەردىڭ ەڭبەك قۇقىقتارى مەن جۇمىسقا ورنالاسۋىن قامتاماسىز ەتۋ جۇمىسىن جالعاستىرۋدى، ەڭبەك جانجالدارىنا جول بەرمەۋ جونىندە شارالار قابىلداۋدى تاپسىردى.

سوڭعى جاڭالىقتار

ۇقساس جاڭالىقتار