كوروناۆيرۋس • 21 قاڭتار، 2022

ەلوردالىق پەداگوگتەر كوروناۆيرۋسقا قارسى رەۆاكتسينادان بەلسەندى وتۋدە

62 رەت كورسەتىلدى

ەلوردالىق مەكتەپ مۇعالىمدەرى كوروناۆيرۋستىق ينفەكتسياعا قارسى رەۆاكتسيناتسيادان وتۋدە، دەپ جازادى Egemen.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.

 

پەداگوگتەر وقۋشىلاردىڭ دەنساۋلىعىن قورعاۋ ءۇشىن، سونداي-اق ءداستۇرلى وفلاين فورماتتا وقۋعا قايتا ورالۋ ءۇشىن ەكپە الۋدىڭ ماڭىزدىلىعىن اتاپ ءوتتى.

ەلوردانىڭ بارلىق ەگۋ پۋنكتەرىندە ۆاكتسيناتسيامەن قاتار حالىقتى COVID-19-عا قارسى رەۆاكتسيناتسيالاۋ دا جۇرگىزىلىپ جاتىر.

ءبىرىنشى كەزەكتە قايتا ۆاكتسينانى حالىقپەن تىكەلەي جۇمىس ىستەيتىن ماماندار الادى. ولاردىڭ قاتارىندا قۇقىق قورعاۋ ورگاندارىنىڭ قىزمەتكەرلەرى، مەديتسينا قىزمەتكەرلەرى، مۇعالىمدەر جانە سوزىلمالى اۋرۋى بار وسال توپتاردىڭ ازاماتتارى جانە ت.ب. بار.

ء«بىز بۇگىن ارىپتەستەرىمىزبەن – ءبىلىم باسقارماسىنىڭ قىزمەتكەرلەرىمەن، مەكتەپ، قوسىمشا ءبىلىم بەرۋ نىساندارىنىڭ، مامانداندىرىلعان مەكتەپتەردىڭ باسشىلارىمەن رەۆاكتسيناتسيادان ءوتىپ جاتىرمىز. ءبىز مۇعالىمدەردى رەۆاكتسيناتسيادان وتۋگە شاقىرامىز. 17 قاڭتاردان باستاپ ءۇشىنشى توقسان ونلاين رەجيمدە باستالدى، ءبىز پەداگوگ رەتىندە بالالارىمىزدىڭ ۇيدە قامالىپ، قاشىقتان ەكران ارقىلى ءبىلىم العانىن قالامايمىز. ونلاين وقىتۋ بولعان 1،5 جىل ىشىندە ءبىلىم بەرۋ ساپاسىنىڭ تومەندەگەنىن بايقادىق، بۇل اسىرەسە بالالارىمىزدىڭ تاربيەسىنە اسەر ەتتى. سوندىقتان بالالار مەن اتا-انالاردىڭ دەنساۋلىعىن قورعاۋ جانە جۇقتىرماۋ ءۇشىن مۇعالىمدەر رەۆاكتسيناتسيادان وتەدى»، دەدى قالالىق ءبىلىم باسقارماسىنىڭ باسشىسى قاسىمحان سەنعازيەۆ.

ونىڭ ايتۋىنشا، مۇعالىمدەر ءۇشىن ءبىرىنشى كەزەكتە رەۆاكتسيناتسيادان ءوتۋ ماڭىزدى. ويتكەنى دەنساۋلىقتان بولەك، بۇل وقۋ پروتسەسىنە دە اسەر ەتۋى مۇمكىن. مىسالى، مۇعالىمدە كوروناۆيرۋس انىقتالاتىن بولسا، ول 14 كۇن بويى ءۇي كارانتينىندە بولادى، بۇل وقۋ پروتسەسىنە قوسىمشا كۇش تۇسىرەدى.


«ارىپتەستەرىمدى، مۇعالىمدەردى، بۇكىل قالا تۇرعىندارىن رەۆاكتسيناتسيادان وتۋگە شاقىرامىن. سوڭعى كۇندەرى اۋرۋدىڭ قاتتى كۇشەيىپ جاتقانىن كورىپ وتىرمىز. ءبىز مۇعالىمدەردىڭ اۋرۋدى جۇقتىرماعانىن قالايمىز. 24 قاڭتاردا وقۋشىلاردىڭ وففلاين فورماتتا ءبىلىم الۋى ءۇشىن مەكتەپتەر قايتا اشىلادى. بۇل رەتتە 600-دەن استام وقۋشىعا ارنالعان مەكتەپتەردە وفلاين وقىتۋ 1-4 سىنىپ وقۋشىلارى ءۇشىن عانا باستالادى، قالعان بالالار اتا-انالارىنىڭ ءوتىنىشى بويىنشا مەكتەپكە بارادى. بۇل رەتتە جۇمىس جۇكتەمەسى وقۋ ورنىنىڭ جوبالىق قۋاتىنىڭ 50%-نان اسپاۋى ءتيىس. بۇگىندە بارلىق مەكتەپ بالالاردى قابىلداۋعا دايىن»، دەدى قاسىمحان سەنعازيەۆ.

 

ەستەرىڭىزگە سالا كەتەيىك، ەلىمىزدە جانە ەلوردادا حالىقتى كوروناۆيرۋسقا قارسى ۆاكتسيناتسيالاۋ ناۋقانى 2021 جىلدىڭ 1 اقپانىنان باستالدى. №2 قالالىق ەمحانا ديرەكتورىنىڭ ەمدەۋ-الدىن الۋ جۇمىسى جونىندەگى ورىنباسارى مايرا احمەتوۆا بۇگىنگى كۇنى وسى كەزەڭدە مەديتسينالىق مەكەمەدە 51 مىڭعا جۋىق ازامات ۆاكتسيناتسيادان وتكەنىن مالىمدەدى.

«رەۆاكتسيناتسيا باستالدى، سونىمەن قاتار Pfizer پرەپاراتىمەن 12-18 جاس ارالىعىنداعى جاسوسپىرىمدەردى، 16-37 اپتا ارالىعىنداعى جۇكتى ايەلدەردى، سونداي-اق بوسانعاننان كەيىنگى كەزەڭدەگى ايەلدەردى 41 كۇننەن باستاپ، سول سياقتى 60 جاستان اسقان قارت ادامداردى ۆاكتسيناتسيالاۋدى جالعاستىرامىز. ءبىرىنشى كەزەكتە مەديتسينا قىزمەتكەرلەرى، پەداگوگتەر، سوزىلمالى اۋرۋلارى بار ادامدار ساناتى، قارتتار قايتا ۆاكتسينالانادى. ازاماتتار قانداي پرەپاراتپەن رەۆاكتسينا الاتىنىن تاڭداي الادى. قىتايلىق، قازاقستاندىق ۆاكتسينالار بار، سونداي-اق سپۋتنيك لايتپەن قايتا ۆاكتسينالايمىز. ەمحانامىزدا قىزمەتكەرلەردىڭ 90%-دان استامى رەۆاكتسينادان ءوتتى. بۇل شارا دەنساۋلىقتى ساقتاۋ جانە ۆيرۋستان قورعانۋ ءۇشىن قاجەت، سوندىقتان ءبىز بارلىعىن كوروناۆيرۋسقا قارسى ۆاكتسيناتسيادان جانە رەۆاكتسيناتسيادان وتۋگە شاقىرامىز»، دەدى مايرا احمەتوۆا.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار