قاسىم-جومارت كەمەل ۇلى ايتقانداي, بولاشاقتا باسىمىزدان وتكەرگەن قايعىلى جاعدايدان ساباق الۋىمىز كەرەك. بۇل رەتتە, اسىرەسە, ەل بولاشاعى – جاستارمەن جۇمىس ىستەيتىن پەداگوگتەرگە دە ۇلكەن جاۋاپكەرشىلىك جۇكتەلۋگە ءتيىس. بارلىق ءبىلىم بەرۋ ۇيىمدارىندا قاڭتار وقيعاسى تۋرالى وقۋشىلار مەن ستۋدەنتتەر اراسىندا ءتۇسىندىرۋ جۇمىستارى جۇرگىزىلگەنى ابزال. قازاقستاندىق پاتريوتيزمگە تاربيەلەۋگە جاڭاشا تىڭ سەرپىن بەرەتىندەي ناقتى ءىس-شارالار جوسپارى جاسالىپ, جۇزەگە اسىرىلۋى قاجەت. ونىڭ قاتارىندا اشىق تاربيە ساعاتتارى, ارنايى تالقىلاۋلار, قۇقىق قورعاۋ ورگاندارى قىزمەتكەرلەرىنىڭ, ءتارتىپ ساقشىلارىنىڭ شاقىرىلۋىمەن وسى تاقىرىپ شەڭبەرىندە ارنايى كەزدەسۋلەر وتكىزىلەر بولسا, جاستار ساناسىنا قوزعاۋ سالعان بولار ەدى. وسىلايشا, ءبىلىم بەرۋ سالاسىنىڭ قىزمەتكەرلەرى مەملەكەت باسشىسىنا قولداۋ ءبىلدىرىپ, جاس ۇرپاققا ەلدىڭ بىرلىگى مەن بەرەكەسى بارىنەن قىمبات ەكەنىن سەزىندىرەتىنى حاق. ۇستازدارىمىز دا, شاكىرتتەرىمىز دە «ەلىمىز امان, جۇرتىمىز تىنىش بولسىن» دەگەن تىلەكتىڭ قادىرىنە دە تەرەڭىرەك بويلايتىن بولادى.
سونداي-اق جاستارىمىز جەل سوزگە ەرىپ, ارانداتۋشىلىقتىڭ جەتەگىنە ەرىپ كەتپەۋگە ءتيىس. وسى تۇستا تاعى دا پرەزيدەنتىمىزدىڭ «...ينتەرنەتكە ەركىندىك بەرىلگەنىمەن, ويىنا كەلگەندى جازۋعا, جالعان اقپارات تاراتۋعا, بىرەۋگە ءتىل تيگىزۋگە, ارانداتۋشىلىققا جول بەرىلمەيتىنىن ەسكەرتەمىن» دەگەن سوزدەرى تىلگە ورالادى. قىزۋ ەموتسياعا بوي الدىرماي, ءار سوزىمىزگە, ءار ىسىمىزگە اباي بولعانىمىز ءجون. ەل باسىنا قاۋىپ-قاتەر تونگەن قيىن شاقتا مەملەكەت باسشىسىنىڭ باتىل ارەكەتى مەن «قاستەرلى وتانىمىز – قازاقستان الەم كارتاسىنداعى ەگەمەن ەل رەتىندە قۋاتتى مەملەكەتكە اينالادى, ەكونوميكامىز نەعۇرلىم قارقىندى داميدى, ازاماتتارىمىزدىڭ الەۋمەتتىك جاعدايى جاقسارا تۇسەدى. ءبىز مىقتى حالىقپىز. ءتول تاريحىمىزدا تالاي جاۋگەرشىلىك زاماندى, اشارشىلىقتى جانە باسقا دا الاپات قيىندىقتى باستان وتكەردىك. سوڭعى كۇندەردەگى قايعىلى وقيعالار ءبىز ءۇشىن تاعى ءبىر سىناق بولدى. ونى ەڭسەرىپ, بۇرىنعىدان دا مىقتى بولامىز» دەگەن ءسوزى, بولاشاققا دەگەن نىق سەنىمى حالقىمىزدى جىگەرلەندىرىپ, ءۇمىتىن ۇكىلەدى. ەلىمىز قۋاتتى بولۋى ءۇشىن, ءبارىمىز مەملەكەت باسشىسىنا زور قولداۋ ءبىلدىرىپ, بىرلىگىمىزدى بەكەمدەي تۇسەيىك, تاۋەلسىز قازاقستاننىڭ جاڭا ءداۋىرىنىڭ ورلەي بەرۋىنە ۇلەس قوسايىق.
بيالاش سۇيىنكينا,
ءبىلىم بەرۋ ءىسىنىڭ ۇزدىگى,
ءبىلىم بەرۋ سالاسىنىڭ قۇرمەتتى قىزمەتكەرى
قوستاناي
