جوعارى وقۋ ورىندارى شەتەلدىك وقۋ ورىندارىمەن باسەكەگە قابىلەتتى بولۋى قاجەت. بۇل رەتتە وتاندىق جوعارى وقۋ ورىندارى شەتەلدىك ۋنيۆەرسيتەتتەرمەن حالىقارالىق بايلانىستى كۇشەيتۋى كەرەك. بىراق وسىنداي جۇمىستار قاعاز بەتىندە, جوسپار جۇزىندە عانا ەمەس, ءىس جۇزىندە دە جوعارى ناتيجەدە ىسكە اسىرىلعانى ابزال.
پرەزيدەنت تاپسىرماسىنا ويىسساق, وتاندىق جوعارى وقۋ ورىندارىنىڭ باسەكەگە قابىلەتتىلىگىن ارتتىرۋ ونداعى وقىتۋشىلىق قۇرامنىڭ ساپاسىن ارتتىرۋعا تىكەلەي بايلانىستى. ويتكەنى مىقتى كادرلارمەن عانا كەز كەلگەن مەكەمەنىڭ قادىرى ارتادى. قازىر ءار ۋنيۆەرسيتەت وزىندىك ىشكى تارتىبىنە قاراي جۇمىس ىستەيدى عوي, سوندىقتان ءار جوعارى وقۋ ورنىنىڭ وقىتۋشىلىق قۇرامعا, ولاردىڭ بىلىكتىلىگىن ارتتىرۋعا دەگەن كوزقاراسى ءارتۇرلى بولۋى مۇمكىن.
بىزگە ۋنيۆەرسيتەت وقىتۋشىلارىنىڭ كەمى ەكى نەمەسە ءۇش جىلدا ءبىر رەت حالىقارالىق دەڭگەيدە, شەتەلدىك ۋنيۆەرسيتەتتەردە ءبىلىمىن جەتىلدىرۋىن, حالىقارالىق عىلىمي-تاجىريبەلىك كونفەرەنتسيالارعا قاتىسۋىن مىندەتتەيتىن جۇيە كەرەك سەكىلدى. بۇل ءوز كەزەگىندە جوعارى وقۋ ورنىنىڭ قانداي دا ءبىر مارتەبەسىنە, قاي ۆەدومستۆوعا باعىنىشتى ەكەنىنە قاراماستان بىردەي مىندەت بولعانى دۇرىس. سەبەبى ەلىمىزدە مەملەكەتتىك, جەكەمەنشىك, وڭىرلىك, ۇلتتىق, حالىقارالىق ۋنيۆەرسيتەتتەرمەن قاتار دارىگەرلەردى, اسكەري قىزمەتكەرلەردى, ونەر ادامدارىن دايارلايتىن جوعارى وقۋ ورىندارى بار. بارلىعىندا كادردىڭ كاسىبيلىگىنە دەگەن جاۋاپكەرشىلىك بىركەلكى بولعانى ءجون-اق.
جاقىندا مەملەكەت باسشىسى قۇقىق قورعاۋ ورگاندارى سالاسىن رەفورمالاۋ كەرەك ەكەنىن ايتتى. نەگىزى وزگەرىس, جۇيەلەۋ سول سالاعا مامان دايارلاۋدان باستالۋى قاجەت. سول سەكىلدى بىلىكتى دارىگەرلەردىڭ دە قانشالىقتى سۇرانىستا ەكەنىن پاندەميا انىق كورسەتتى. ال كەيبىر وڭىرلەرگە مىقتى مۇعالىمدەر جەتىسپەي جاتقانىن پرەزيدەنتتىڭ ءوزى ايتتى. تۇپتەپ كەلگەندە بارلىق سالاعا كاسىبي كادر كەرەك. كاسىبي كادردى مامان دايارلايتىن وقۋ ورىندارى قالىپتاستىرادى. ال ماماندى وقىتىپ, دايارلاپ شىعاراتىن وقىتۋشىنىڭ ءوزى بىلىكتى بولۋعا ءتيىس.
ۆەنەرا مۋسينا,
ە.بوكەتوۆ اتىنداعى قاراعاندى
ۋنيۆەرسيتەتىنىڭ اعا وقىتۋشىسى
