ورىستەن قايتقان ەنەسىن ىزدەگەن قوزى-لاق ماڭىراپ, سيىر موڭىرەپ, ساۋىننان بوساعان بيەلەر ق ۇلىندارىمەن شۇرقىراپ ازان-قازان بولادى. ازدان سوڭ بۇيىردەن قىزارىپ كۇن باتادى. ءسويتىپ, كەشكى شارۋانىڭ ءبارى ىڭعايلانعاننان كەيىن دالادا وتىرىپ تاماق ىشەمىز. دالادا ىشكەن اس قانداي ءسىڭىمدى, تەز تويامىز. سوسىن اجەم «باياعىدا...» دەپ عاجايىپقا تولى اڭگىمەسىن باستايدى. بالا كەزىمنەن كوڭىلىمدە قالىپ قويعان وسى كوركەم كورىنىس جاقىندا تاعى ەسىمە ءتۇستى. وعان سەبەپ بولعان كورنەكتى كەسكىندەمەشى, قازاقستاننىڭ حالىق سۋرەتشىسى سابىر مامبەەۆتىڭ «ەل ەسىندە» اتتى ەڭبەگى.
بۇل كارتينادا اۆتور قايماعى بۇزىلماعان قازاقى اۋىلدى عانا ەمەس, ونداعى ادامداردىڭ بەينەسى ارقىلى ۇلتتىق بولمىسىمىزدى ايشىقتى بەدەرلەگەن. كوك مايساسى جايقالعان جايلاۋ, ارعى جاعىنان زاڭعار تاۋلاردىڭ سۇلباسى اعاراڭدايدى. ات ۇستىندەگى وتاعاسىنىڭ الدىندا كىشكەنتاي بالاسى وتىر, وعان كەلىنشەگى ءوز اتىنىڭ نوقتاسىن ۇستاتىپ جاتقان سەكىلدى. جەردە توسەلگەن كىلەمشەدە اق كيمەشەك كيگەن اجە ۇرشىق ءيىرىپ وتىرسا, ونىڭ قاسىنان اق قالپاق كيىپ, قولىنا كەسە ۇستاپ سۋسىن ءىشىپ, مولداسوقىنىپ وتىرعان جەتكىنشەكتى كورەسىز. سەگىز قانات كيىز ءۇي مەن شەلەك كوتەرگەن جاس قىز بالانىڭ بەينەسى دە كوزىڭىزگە جىلى ۇشىرايدى. سۋرەتكە قاراپ وتىرىپ, قۇددى ءوزىڭىز وسى اۋىلدان كەشە كەلگەندەي تاماشا سەزىمدى باستان كەشەسىز. بۇل تۋىندى وتكەن عاسىردا جارىققا شىقسا دا, ءتۇرلى زامان تالقىسىنان وتكەن حالقىمىزدىڭ بويىندا ساقتالىپ قالعان قازاقى مىنەز, بەكزات بولمىس, كىسىلىك پەن كىشىلىك سەكىلدى اسىل قاسيەتتەرىمىزدى بوياۋ تىلىمەن اسەم سويلەتە بىلگەن سۋرەتشىنىڭ شەبەرلىگىنە ءتانتى بولاسىز.
جالپى, ايتۋلى قىلقالام شەبەرىنىڭ شىعارماشىلىعىندا اۋىل ءومىرى مەن ونىڭ سۇلۋ تابيعاتى ءار قىرىنان جاراسىمدى كورىنىس تاپقان. اسىرەسە اۆتور تابيعاتتى بەينەلەۋگە شەبەر, پەيزاجدارى وتە كوركەم. ماسەلەن, 1965 جىلى سالعان «كوكتەم» اتتى جۇمىسى دا جوعارىدا ايتىپ وتكەن كارتينامەن ۇقساس. اسپانمەن تىرەسكەن بيىك تاۋلار, ونىڭ ەتەگىندەگى ءبىر شوق اعاشتىڭ تۇبىندە اڭگىمەلەسىپ وتىرعان ەر مەن ايەل...ونىڭ بەرگى جاعىنداعى ءۇش جىلقى تۇر قاڭتارىلىپ, ونىڭ بىرەۋى – ق ۇلىندى بيە. كىشكەنتاي ق ۇلىن ەنەسىن ەمىپ, راحاتقا باتىپ تۇر... وسى كورىنىستىڭ ءوزى ادامدى اسەرلى سەزىمگە بولەپ, بۇگىندە الىس قالعان اۋىلىڭدى ساعىندىرادى.
سابىر اعامىزدىڭ تابيعاتى سىرشىل, ونى «سۇحبات» (1954), «م.اۋەزوۆ» (1957), «تاۋدا» (1957), «قونىس اۋدارۋ» (1959), «مەنىڭ قالامدا» (1959), «تەرەزە الدىنداعى قىز» (1961), «كوكتەم» (1965), «جاستار» (1968) جانە تاعى باسقا پەيزاجدارى مەن پورترەتتەرىنەن بايقايمىز. بۇلاردى بەينەلەۋ ونەرىمىزدىڭ قازىناسىنا قوسىلعان سۇبەلى دۇنيەلەر دەپ ايتۋعا بولادى.
قىلقالام شەبەرىنىڭ قولتاڭباسىن دارالاعان ەڭبەكتەرىنىڭ ءبىرى –«تاۋدا» مەن «كيىز ءۇي» كارتيناسى. ول كەزىندە وداق كولەمىندە جوعارى باعالانىپ, «يۋنوست» جۋرنالىندا جاريالانعان. بەلگىلى سۋرەتشى سەرگەي گەراسيموۆ اۆتوردىڭ وسى تۋىندىلارى تۋرالى 1958 جىلى ماسكەۋدە وتكەن قازاق ونەرىنىڭ ونكۇندىگىندە: «س.مامبەەۆتىڭ پولوتنولارى تۋعان حالقىنىڭ بولمىسىنىڭ قۋانىشىنا تولى. بەينەلەۋ مانەرى وزگەشە اتموسفەراعا تولى ءساندى, ولار جارىقپەن, كۇنمەن, اشىق تۇستەرمەن تولىقتىرىلعان... ۇلتتىق بوياۋىمەن قاتار ءوزىنىڭ ەموتسيونالدىق كەيپىمەن زاماناۋي بولىپ كەلەدى» دەپ ايتىپتى.
سابىر مامبەەۆ − الماتىداعى گوگول اتىنداعى كوركەم سۋرەت ۋچيليششەسىن اياقتاعاسىن قازىرگى سانكت-پەتەربۋرگتەگى ي.رەپين اتىنداعى كەسكىندەمە, ءمۇسىن جانە ساۋلەت ونەرى ينستيتۋتىنا ءتۇسىپ, بىلىكتى مامانداردان ءدارىس الدى. ول كىسىنىڭ تاعى ءبىر قىرى – قوعامدىق قىزمەتى. تالانتتى ازامات 28 جاسىندا قازاق كسر سۋرەتشىلەر وداعىنىڭ توراعاسى بولىپ سايلانىپ, وسى قىزمەتتى ۇزاق جىلدار اتقارىپ, ونىڭ ۇيىتقى بولۋىمەن وبلىس ورتالىقتارىندا سۋرەتشىلەر مەن مۇسىنشىلەرگە ارنالعان شەبەرحانالار, مۋزەيلەر مەن كورمە زالدارى اشىلدى. ەلىمىزدىڭ التى قالاسىندا سۋرەتشىلەر ءۇيى سالىندى.
كورنەكتى تۇلعانىڭ ەڭبەكتەرى ەلىمىزگە عانا ەمەس شەت مەملەكەتتەرگە دە جاقسى تانىمال. ونىڭ «تاۋدا» اتتى كارتيناسى ماسكەۋدەگى شىعىس حالىقتارىنىڭ ونەر مۇراجايىندا تۇرسا, «كيىز ءۇي» تۋىندىسى ترەتياكوۆ گالەرەياسىنىڭ جەكە جيناعىنا ەنگەن. بىرقاتار تۋىندىلارى ءابىلحان قاستەەۆ اتىنداعى مەملەكەتتىك ونەر مۋزەيىندە ساقتالعان.
