تۇتاس ۇلت ازا تۇتقان تۇماندى كۇن بىرتىندەپ سەيىلەر. قيراعان قالا قالپىنا كەلىپ, قالىپتى ءومىر قايتا جالعاسار. انانى بالاسىنان, ءسابيدى اكەسىنەن, جاردى ازاماتىنان ايىرعان الاپات قىرعىندى ەشبىر اقتاۋعا كەلمەيدى. تۋعان قالاسىن جاۋ جاپىرعانداي قيراتىپ, تابان استىنداعى تاس توسەمدەرگە دەيىن تالقانداعان تاسباۋىرلار مەن ويدا جوق ويرانعا وت قويعاندار زاڭعا ساي جازالانار. قىمباتشىلىقتىڭ قىسپاعىن ايتىپ, بەيبىت شەرۋگە شىققانداردىڭ كولەڭكەسىندە جىمىسقى ويىن جۇزەگە اسىرعىسى كەلگەن سودىرلارعا ەش اياۋشىلىق بولمايتىنىن مەملەكەت باسشىسى قاداپ ايتتى. وسى تۇستا پرەزيدەنت ءسوز ەتكەن تاعى ءبىر دۇنيە, قۇقىق قورعاۋ ورىندارىنىڭ تەرگەۋ كەزىندە ءىستىڭ اق-قاراسىن ءادىل تارازىلاۋى. بۇل جايت قالىڭ بۇقارانى دا الاڭداتىپ وتىر.
تىرشىلىك ارناسىنا ءتۇسىپ لاڭكەستەرگە قارسى ءىس-قيمىل بەلەڭ العان تۇستا كۇنىنە جۇزدەگەن, مىڭداعان ادام قولعا ءتۇسىپ جاۋاپقا تارتىلۋدا. سۋىق قارۋلار مەن تونالعان تەحنيكالار تاركىلەنىپ, بەيبەرەكەتسىزدىك تۋدىرىپ, بەينەباقىلاۋعا تۇسكەندەر قىلمىستىق باپقا ساي تەرگەۋگە الىنىپ جاتىر. وقيعا وشاعىنا اينالعان ءبىر عانا الماتىدا كۇنى بۇگىنگە دەيىن بىرنەشە مىڭ ادام تۇتقىنعا الىنعان. بۇل ساندار ءسات سايىن وسۋدە.
كوپتەگەن الەۋمەتتىك جەلى قولدانۋشىلارى ءوز جازبالارىندا تەرگەۋ-تەكسەرۋ جۇمىستارىنىڭ ءادىل ءوتۋىن سۇراعان. بىرقاتار ساراپشىلار دا بۇل پىكىردى قۋاتتاپ «ايران ىشكەن قۇتىلىپ, ءتۇبىن جالاعاندار تۇتىلماسا», دەيدى. البەتتە, مۇنداي قىسىلتاياڭ ساتتە اركىم جەكە باسى مەن ءوز جاقىندارىن اراشالاپ الۋعا تىرىسار. دەسە دە اتالعان جەردە كەزدەيسوق كەتىپ بارا جاتىپ قولعا تۇسكەن جازىقسىز جانعا اۋىر ايىپ تاعىلىپ كەتپەسە دەگەن الاڭ بار.
– مەنەن ساباق الىپ جۇرگەن بەك سارباسوۆ دەگەن اڭقاۋ, اڭقىلداعان ءبىلىمدى ازامات بار. 5 قاڭتار كۇنى الماتىداعى «باۋىرساق» دەپ اتالاتىن ءدامحانادا ەسەنبول ەسىمدى ناعاشى اعاسىمەن بىرگە تاماقتانىپ وتىرعاندا, ميتينگ جاساعان توپ سول ماڭايعا كەلىپ قالعان ەكەن. ۇرەيلەنگەن كافە يەلەرى بارلىق قوناقتاردىڭ دالاعا شىعۋىن سۇراپ, عيماراتتى بوساتۋىن وتىنگەن. بەك تە كوپشىلىكپەن بىرگە سىرتقا شىعىپ, امالسىز ميتينگ جاساپ جاتقان ادامداردىڭ اراسىمەن كوشە بويلاپ كەلە جاتقاندا, پوليتسەيلەر قۋالايدى. ابدىراپ قالعان بەك تە كوپشىلىكپەن بىرگە قاشا جونەلەدى. كەنەت جول جيەگىندەگى ارىققا قۇلاپ, اياعىن سىندىرىپ الادى. جەدەل جاردەممەن اۋرۋحاناعا جەتىپ, سوندا جاتىپ وتا جاساتادى. بۇعان دەيىن ونىمەن حابارلاسىپ وتىرعان ەدىك. ەكى كۇننەن بەرى پوليتسيا الىپ كەتىپ, تابا الماي وتىرمىز. ءوزى تۋمىسىنان اڭقاۋ جىگىتكە ۇرىپ-سوعىپ ءبىر قىلمىستى ءىلىپ جىبەرمەسە دەپ الاڭدايمىز. بەك بىرەۋدى ۇرىپ, سوقپاق تۇرماق بىرەۋدىڭ بەتىنە قاراپ ءسوز ايتاتىن ەمەس, بىرەۋدىڭ زاتىن الماق تۇگىلى ءوز دۇنيەسىن ەلگە بەرىپ قويىپ, قايتىپ سۇراۋعا باتا الماي جۇرەتىن ازامات. قۇقىق قورعاۋ مەكەمەلەرىندە جۇمىس ىستەيتىن ازاماتتار بارىنشا ءادىل بولىپ, جازىقسىز جاندار جابىرلەنبەسە دەيمىز. اركىمنىڭ دە ءوسىپ كەلە جاتقان بالا-شاعاسى بار عوي, – دەيدى الەۋمەتتىك جەلى ارقىلى ويىن جەتكىزگەن كاسىپكەر ا.نۇرسيلا.
قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, اقىن اقبەرەن ەلگەزەك تە ءبىز قاۋزاپ وتىرعان جايعا قاتىستى پىكىر ءبىلدىردى. «بولارى بولىپ, بوياۋى سىڭبەگەن كەزەڭدە وتىرمىز. «بىرەۋ قىز الىپ قاشىپتى, بىرەۋ بوسقا قاشىپتى» دەگەن دە ءبىزدىڭ ءسوز. مەنىڭشە, سول تۇرعىدا قاراۋ كەرەك. وقيعاعا قاتىسۋشى زاڭدى بۇزىپ, قىلمىسى دالەلدەنسە, ول ايىپتى. بىراق ءار قىلمىستىڭ وزىنە ساي جازاسى بولادى. تالاي جاۋىنگەردەن, پوليتسيا جانە قاۋىپسىزدىك قىزمەتىنىڭ قانشاما وفيتسەرىنەن, بەيبىت تۇرعىنداردان, كىپ-كىشكەنتاي بالالاردان ايىرىلدىق. ولاردىڭ ورنىن ەشكىم تولتىرا المايدى. اسىرەسە, اتا-انا ءۇشىن. سولاردىڭ ولىمىنە ناقتى قاتىسى بارلاردى اياۋسىز, قاتاڭ جازالاۋ كەرەك! وعان داۋ جوق! الايدا بىرەۋدىڭ اۋىر قىلمىسىن, يا بولماسا بۇرىندارى اشىلماي جاتقان قىلمىستاردى جاس جىگىتتەرىمىزدىڭ موينىنا ىلە سالۋ بولماسىن. ارقايسىسىنىڭ قىلمىسىن ناقتى انىقتاپ, ءىستى ءادىل جۇرگىزۋ ۇلكەن جاۋاپكەرشىلىك. سوندىقتان ءبىزدىڭ تەرگەۋشىلەر, وزگە دە قۇقىق قورعاۋشى ماماندار ءىستى اشۋ ۇستىندە ارىپتەسىمنىڭ ءوشىن الام دەپ, بولماسا ءىستى تەزىرەك بىتىرەم دەپ ناۋقانشىلدىققا سالىنىپ, بىرەۋدىڭ اۋىر قىلمىسىن ناقاقتان-ناقاق جابا سالۋعا جول بەرمەڭىزدەر», دەيدى اقبەرەن ەلگەزەك.
باسقا دا وسى سارىنداس ءوتىنىش-تىلەكتەر مەن وي-پىكىرلەر قوعام بەلسەندىلەرى تاراپىنان اۋىق-اۋىق ايتىلىپ جاتىر. مۇنداي جايمەن بەتپە-بەت كەلگەن قاراپايىم وقىرماندار دا جەلى ارقىلى ءوز ءۇنىن بىلدىرۋدە. البەتتە ولاردىڭ ءبارىن اقتاپ, باعا بەرۋدەن اۋلاقپىز. قۇزىرلى ورىندار ءار ءىستىڭ اق-قاراسىن انىقتاپ, ءادىل تارازىلاي جاتار. ءسوز جوق, كورسەقىزارلىعى ۇستاپ دۇكەن توناعانداردىڭ, بەيبىت تۇردە كوپپەن بىرگە ازاماتتىق ءۇنىن بىلدىرگەندەردىڭ, قولىنا قارۋ الىپ ادام قانىن جۇكتەگەندەردىڭ اراجىگى جەر مەن كوكتەي...
الماتى
