ايماقتار • 18 قاڭتار، 2022

بقو اكىمىنىڭ ورىنباسارى قىزمەتىنەن بوساتىلدى

باتىس قازاقستان وبلىسى اكىمىنىڭ ورىنباسارى امانجول الپىسباەۆ قىزمەتىنەن بوساتىلدى، دەپ حابارلايدى Egemen.kz.

بقو اكىمىنىڭ ءباسپاسوز قىزمەتى ايماق باسشىسىنىڭ 2021 جىلعى 30 جەلتوقسانداعى وكىمىمەن بقو اكىمىنىڭ ورىنباسارى امانجول الپىسباەۆ قىزمەتىنەن بوساتىلعانىن مالىمدەدى. ونىڭ وكىلەتتىلىگى مەملەكەتتىك قىزمەتكە سايكەس كەلمەيتىن جۇمىسىنا بايلانىستى توقتاتىلعان.

«بۇل لاۋازىمدا امانجول الپىسباەۆ 2019 جىلدىڭ شىلدەسىنەن باستاپ جۇمىس ىستەدى. وسى ارالىقتا ءوزىنىڭ جاۋاپتى ءارى تاجىريبەلى ەكەنىن كورسەتتى. ەل پرەزيدەنتىنىڭ شىعىستى وڭتايلاندىرۋعا، سىبايلاس جەمقورلىق دەرەكتەرىن انىقتاۋعا جانە ت.ب. قاتىستى تاپسىرمالارىن ورىنداۋ بويىنشا ۇلكەن جۇمىس ىستەدى. ول مەملەكەتتىك ساتىپ الۋدىڭ ءۇش جىلدىق جوسپارىن ازىرلەۋ كەزىندە تالداۋ جانە بيۋدجەت قاراجاتىن ۇنەمدەۋ، نەعۇرلىم ءتيىمدى جۇمساۋ سەكىلدى ماسەلەلەرمەن اينالىستى. امانجول ءاليحان ۇلىنا جۇمىسى ءۇشىن العىس بىلدىرەمىز جانە ودان ءارى كاسىبي تابىس تىلەيمىز»، دەدى اكىمدىكتىڭ ءباسپاسوز قىزمەتى وكىلى.

امانجول الپىسباەۆ ساۋلەت، قالا قۇرىلىسى جانە قۇرىلىس، تكش سالاسىنداعى ستراتەگيالىق جوسپارلاۋ ماسەلەلەرىنە، سونداي-اق، تاريف ساياساتى، ءمجا-ءنى دامىتۋ، مەملەكەتتىك ساتىپ الۋ، تابيعاتتى پايدالانۋ، جانۋارلار مەن وسىمدىكتەر دۇنيەسىن قورعاۋ ماسەلەلەرىندە جەتەكشىلىك ەتتى.

ەسكە سالايىق، بىلتىر ماۋسىمدا ول «مەملەكەتتىك قىزمەت تۋرالى» زاڭدى بۇزدى دەگەن كۇدىككە ىلىنگەن بولاتىن.

مەملەكەتتىك قىزمەت ىستەرى اگەنتتىگى دەپارتامەنتىنىڭ مالىمەتىنشە، امانجول الپىسباەۆ مەملەكەتتىك قىزمەتكەر بولا تۇرا، «سامۇرىق گيدرو» جشس قۇرىلتايشىسى ءارى ديرەكتورى قىزمەتىن اتقارعان. دەپارتامەنت وبلىس اكىمدىگىنە اكىم ورىنباسارىنىڭ وكىلەتتىگىن توقتاتۋى تۋرالى ۇسىنىس جىبەردى. امانجول الپىسباەۆتىڭ ءوزى بۇعان كەلىسپەي، ءتورت رەت سوتقا جۇگىندى. سوت ونىڭ پايداسىنا شەشىم شىعارعان جوق. شاعىم كاسساتسيالىق سوتتا دا قابىلدانبادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز