دەنساۋلىقتى قورعاۋ جولىندا

ەلباسىنىڭ ۇستىمىزدەگى جىلعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا دەنساۋلىق ساقتاۋ سالاسىن دامىتۋ ماسەلەلەرى ىشىندە العاشقى مەديتسينالىق-سانيتارلىق كومەك ماسەلەسىنە باستى باسىمدىق بەرىلگەنى ءمالىم. جالپى العاندا, مەديتسينا قىزمەتكەرلەرىنىڭ كاسىبي بىلىكتىلىگىن ورنىقتىرۋ, جوعارى تەحنولوگيالاردى ەنگىزۋ ارقاسىندا كۇردەلى وپەراتسيالاردى وبلىس ورتالىقتارىندا جاساۋ تاجىريبەسى قالىپتاستى. سونىمەن بىرگە, «سالاماتتى قازاقستان» باعدارلاماسى اياسىندا دا ناقتى جۇمىستار اتقارىلىپ كەلەدى. سولتۇستىك قازاقستان وبلىستىق دەنساۋلىق ساقتاۋ باسقارماسىنىڭ باسشىسى قابدىراحمان ساقتاعانوۆ جەرگىلىكتى مەديتسينانىڭ باسەكەگە قابىلەتتىلىگىن ارتتىرۋ جونىندە اڭگىمەلەيدى. وبلىس مەديتسينا مەكەمەلەرىنىڭ باسەكەلەستىك قارىمىن كوتەرۋدىڭ الەۋەتى زور. دارىگەرلەر ەلىمىزدىڭ ۇزدىك كلينيكالارىندا, شەتەلدەردە بىلىكتىلىكتەرىن ارتتىرىپ ءجۇر. ماسەلەن, 2013 جىلى رەسەيدە, بەلارۋستە, وڭتۇستىك كورەيادا, ليتۆادا, اۆستريادا بىلىمدەرىن جەتىلدىرىپ قايتتى. بۇدان تىسقارى مەديتسينا مەكەمەلەرىنىڭ بازاسىندا وقىتۋ مودۋلدەرىنە قاتىسادى. دەنساۋلىق ساقتاۋ مەكەمەلەرىن زاماناۋي مەديتسينالىق قۇرال-جابدىقتارمەن تولىقتىرىپ وتىرۋ ۇدايى نازارىمىزدا. سوڭعى ءۇش جىلدا كوپتەگەن وزىق ۇلگىدەگى تەحنيكالار ساتىپ الىندى. مۇنداي بىرەگەي جۇيەنى جاقسارتۋ وبلىستىق اكىمدىكتىڭ قولداۋىمەن جانە دەنساۋلىق ساقتاۋ مينيسترلىگىنىڭ قاتىسۋىمەن مەملەكەتتىك ليزينگتىك كومپانيا – «قازمەدتەح» اق ارقىلى مۇمكىن بولدى. بۇل ورايدا, الدىن الا بەرىلگەن تاپسىرىسقا مۇقيات ساراپتاما جۇرگىزىلىپ, جەتە ەسكەرىلەتىنىن ايتا كەتكەن ءجون. ول ءۇشىن جابدىق كورسەتەتىن قىزمەتتەر سپەكترى مەن سەرۆيستىك قولايلىلىققا باسا كوڭىل اۋدارىلادى.ساراپشىلار مەديتسينا ۇيىمدارى ورىنداۋعا ءتيىس بارلىق تالاپتار كورسەتىلگەن تۇجىرىمداما قورىتىندىسىن بەرگەننەن كەيىن عانا تەحنيكالاردى ليزينگ شارتىمەن ساتىپ الۋعا رۇقسات الادى. ليزينگتىك تولەمدەردى قايتارۋ تەتىگى مەديتسينالىق تەحنيكانى ءتيىمدى قولدانۋمەن قاتار دياگنوستيكالىق جانە ەمدىك قىزمەتتەردىڭ قولجەتىمدىلىگىن ارتتىرۋعا اسەر ەتەرى ءسوزسىز. بىلتىر «سالاماتتى قازاقستان» مەملەكەتتىك باعدارلاماسى بويىنشا 446 ميلليون 360 مىڭ تەڭگەگە 12 مەديتسينالىق قۇرال-جابدىق ساتىپ الىندى. جەرگىلىكتى دەنساۋلىق ساقتاۋ ۇيىمدارىنىڭ ماتەريالدىق-تەحنيكالىق بازاسىن نىعايتۋ ءۇشىن 239 ميلليون 980 مىڭ تەڭگە جۇمسالدى. باۋىر اۋرۋلارىن ءدال ءارى جەدەل انىقتايتىن اپپارات پەن كومپيۋتەرلىك توموگراف اكەلىندى. جۋىردا وبلىستىق بالالار اۋرۋحاناسىنا ليزينگ بويىنشا جاڭا قوندىرعى ورناتىلدى. گەرمانيالىق مۋلتيسپيرالدىق-كومپيۋتەرلىك توموگراف باس مي­ىنا, ىشكى اعزالارعا, سۇيەك-بۇل­شىق ەت جۇيەسىنە جان-جاقتى زەرت­تەۋ جۇرگىزۋگە مۇمكىندىك بە­­رەدى. جاڭا جابدىق 240 ميلليون تەڭگە تۇرادى. وسىنداي ناق­تى شارالاردىڭ ارقاسىندا تۇر­عىندارعا كورسەتىلەتىن مە­ديتسينالىق قىزمەت تۇرلەرى كو­بەيىپ, ساپاسى دا ايتارلىقتاي جاقساردى. قازىرگى ۋاقىتتا مۇن­داي مەديتسينالىق كومەكپەن ال­تى مەديتسينا ۇيىمى اينالىسادى. بىلتىر كارديولوگيالىق بولىمشەدە 1347 كوروناروگرافيا, 539 ستەند قويىلىپ, اشىق جۇرەككە 181 وتا جاسالدى. ناتيجەسىندە جۇرەك-قان تامىرلارى اۋرۋلارى ايتارلىقتاي كەمىدى. جوعارى مامانداندىرىلعان مەديتسينالىق كومەكتى دامىتۋدىڭ ارقاسىندا ءۇشىنشى اۋرۋحانانىڭ تراۆماتولوگيا بولىمشەسىندە قيمىل-ءتى­رەك جۇيەسىنىڭ اۋرۋىمەن جانە جا­راقات العان ناۋقاستار اراسىندا مۇگەدەكتىك دەڭگەيىن ازايتۋ, وپەراتسيادان كەيىنگى اسقىنۋلاردىڭ الدىن الۋ مۇمكىن بولدى. 32 ەم­دەلۋشىنىڭ جامباس-سان بۋىنى تولىق اۋىستىرىلدى. ءىرى بۋىندارعا 174 ارتروسكوپيا, بلوك قويىلاتىن ينترامەدۋلليارلىق وستەوسينتەز بويىنشا 100 وپەراتسيا جاسالدى. وبلىستىق اۋرۋحانانىڭ وفتالمولوگيا بولىمشەسىندە گلاۋكوما, كاتاراكتا جانە باسقا دا كوز اۋرۋلارىنا جوعارى مامانداندىرىلعان مەديتسينالىق كومەك كورسەتىلەدى. ابدومينالدىق جانە توراكالدىق حيرۋرگيادا دا زاماناۋي تەحنولوگيالار كەڭىنەن قولدانىلادى. لاپاروسكوپيالىق ادىستەر قولدا­نىلىپ جاسالعان وپەراتسيالاردان كەيىن قاۋىپتى اسقىنۋلارعا جول بەرمەۋگە بولادى. قازىرگى ۋاقىتتا وبلىستا ءوت شىعۋ جولدارىنا جاسالاتىن وپەراتسيالاردىڭ 100, سوقىرىشەك وپەراتسيالارىنىڭ 65 پايىزى لاپاروسكوپيالىق ءادىستىڭ كومەگىمەن جاسالدى. مەملەكەت باسشىسى قازاق­ستاندىقتاردىڭ ءومىر ءسۇ­رۋ ۇزاق­تىعىن 80 جاسقا دەيىن ارت­تىرۋعا مۇمكىندىك بەرەتىن جولداردى ايقىنداپ بەردى. ءومىر ءسۇرۋ ۇزاقتىعىنىڭ ارتۋى – بۇل مەديتسينانىڭ, ەكونوميكانىڭ, ينفراقۇرىلىمنىڭ جاقسى دامۋى دەگەن ءسوز. ادام دەنساۋلىعىنىڭ 15-20 پايىزى عانا مەديتسيناعا تاۋەلدى ەكەنىن ەسكەرسەك, ۇزاق ءارى باقىتتى ءومىر ءسۇرۋ اركىمنىڭ ءوز قولىندا ەكەنى تالاسسىز شىندىق. جازىپ العان يننا كەلىمبەت. پەتروپاۆل.